NA O be o tseba gore moapostola Paulo o be a e-na le ba leloko bao e bego e le balatedi ba Jesu? *— Go bonagala kgaetšedi’agwe le morwa wa gagwe e be e le balatedi ba Jesu. Gomme morwa yoo wa kgaetšedi’a Paulo o ile a phološa bophelo bja Paulo. Ga re tsebe leina la gagwe goba la mmagwe, eupša re tseba seo a se dirilego. Na o ka thabela go kwa ka taba ye?—

Paulo o sa tšwa go boa leetong la gagwe la boraro la boromiwa gomme o Jerusalema. Go bonagala e le ngwaga wa 56 C.E. Paulo o be a golegilwe gomme o be a swanetše go sekišwa. Eupša manaba a Paulo ga a nyake a e-ya kgorong ya tsheko. A nyaka go mmolaya! Ka go rialo, a loga leano la gore banna ba ka bago ba 40 ba mo emele kgaufsi le tsela e le gore ba mmolaye.

Ka tsela e itšego, morwa wa kgaetšedi’a Paulo o kwa ka leano leo. Na o tseba seo a ilego a se dira?— O ile a ya go Paulo gomme o mmotša ka leano le. Gatee-tee, Paulo o botša tona ya madira gore: “Iša lesogana le go molaodi wa madira, gobane o na le seo a swanetšego go mmegela sona.” Tona ya tšea lesogana leo ya le iša go molaodi Kelaudio Lisia gomme ya hlalosa gore lesogana le na le molaetša o bohlokwa. Kelaudio o iša morwa wa kgaetšedi’a Paulo ka thopeng gomme lesogana leo le mmotša ka leano leo.

Kelaudio o lemoša morwa wa kgaetšedi’a Paulo ka gore: “O se ke wa botša motho gore o ntlhaloseditše dilo tše.” Ke moka o bitša ditona tše pedi tša madira gomme o di botša gore di lokiše gore bahlabani ba ka bago ba 200 le banamedi ba dipere ba 70 gotee le banna ba marumo ba 200 ba gwantele Kesarea. Ka iri ya senyane bošegong bjoo, banna ba 470 ba ile ba tloga gomme ba iša Paulo a šireletšegile go mmušiši Felikisi wa Roma kua Kesarea. Lengwalong leo le yago go Felikisi, Kelaudio o mmotša ka leano la go bolaya Paulo.

Ka baka leo, Bajuda ba gapeletšega go kopana le Paulo kgorong ya tsheko kua Kesarea gore ba mo latofatše. Eupša therešo ke gore ga ba na bohlatse bja gore Paulo o dirile phošo le ge e le efe. Lega go le bjalo, ka go hloka toka Paulo o išwa kgolegong  nywaga e mebedi. Lega go le bjalo, o dira boipiletšo bja gore a ye go seka kua Roma gomme o išwa moo.—Ditiro 23:16–24:27; 25:8-12.

Ke’ng seo re ka ithutago sona pegong ye ya morwa wa kgaetšedi’a Paulo?— Gore go nyakega sebete go bolela dilo tšeo di nepagetšego le gore ge re dira bjalo, re ka phološa maphelo. Gaešita le ge Jesu a be a tseba gore manaba a be a “nyaka go mmolaya,” o ile a tšwela pele a botša batho ka Mmušo wa Modimo. Jesu o re boditše gore re dire se swanago. Na re tla dira seo? Re ka dira bjalo ge re e-na le sebete se swanago le seo morwa wa kgaetšedi’a Paulo a bego a e-na le sona.—Johane 7:1; 15:13; Mateo 24:14; 28:18-20.

Paulo o kgothaditše mogwera wa gagwe yo monyenyane Timotheo ka gore: “O itlhokomele ka mehla, o hlokomele le go ruta ga gago. Dula dilong tše, gobane ka go dira se o tla iphološa le go phološa bao ba go theetšago.” (1 Timotheo 4:16) Ee, morwa wa kgaetšedi’a Paulo o dirile ka go dumelelana le kgothatšo e bjalo e tšwago go malome’agwe. Na o tla dira bjalo?