1, 2. (a) Go ba hlatse go bolela’ng, gona mekero ya ditaba ya lefase le e paletšwe bjang o šoro tabeng ye? (b) Ke ka baka la’ng Jehofa a sa hloke thušo ya mekero ya ditaba gore e botše batho ka yena?

GO BA hlatse go bolela’ng? Pukuntšu e nngwe e re hlatse ke “motho yo a bonego tiragalo e itšego ke moka a e botša ba bangwe.” Ka mohlala, motseng wa Pietermaritzburg, Afrika Borwa, kuranta yeo ga bjale e bitšwago The Witness e na le nywaga ya ka godimo ga e 160 e gatišwa. Leina leo le a e swanela ka gobane morero wa kuranta ke go bega ka mo go nepagetšego ditiragalo tša mo lefaseng. Morulaganyi wa pele wa The Witness o ile a ikana ka gore kuranta ye e tla begela batho “therešo, therešo e feletšego, e sego se sengwe, eupša therešo.”

² Eupša ka manyami, mekero ya ditaba ya lefase e hlokomologile wa go šiiša ditaba tša bohlokwa kudu historing gaešita le go di kgopamiša. Ga e botše batho therešo ka Modimo le ka seo a se dirilego. Eupša Jehofa, yena Mmuši yo a Phagamego wa legohle, ga a hloke thušo ya mekero ya ditaba gore e botše batho ka yena. Modimo o boletše ka moporofeta wa gagwe wa bogologolo e lego Hesekiele gore: ‘Ditšhaba di tla tseba gore ke nna Jehofa.’ (Hesek. 39:7) O na le Dihlatse tše e ka bago tše dimilione tše seswai tšeo di botšago batho ba ditšhaba ka moka ka yena le ka ditirišano tša gagwe le batho tša nakong e fetilego le tša gona bjale. Le gona lešaba le la Dihlatse le botša batho seo Modimo a holofeditšego go re direla sona nakong e tlago. Ge re etiša pele modiro wa go nea bohlatse maphelong a rena, re phelela leina leo Modimo a re neilego  lona leo go boletšwego ka lona go Jesaya 43:10 gore: “‘Le dihlatse tša ka,’ o re’alo Jehofa, ‘yena mohlanka wa ka yo ke mo kgethilego.’”—Jes. 43:10.

3, 4. (a) Barutwana ba Beibele ba amogetše leina le lefsa neng, gona ba ile ba ikwa bjang ka lona? (Bona seswantšho seo se lego mathomong a sehlogo.) (b) Re tlo ahlaahla dipotšišo dife?

³ Ruri ke tokelo e kgolo go bitšwa ka leina la Jehofa, ka gobane ke “Kgoši ya bosafelego,” yoo a rego: “Le ke lona leina la ka go iša mehleng ya neng le neng, ke lona leo ke tlago go gopolwa ka lona go iša melokong le melokong”! (1 Tim. 1:17; Ek. 3:15; bapiša le Mmoledi 2:16.) Ka 1931, Barutwana ba Beibele ba ile ba amogela leina le lefsa la Dihlatse tša Jehofa. Ka morago ga moo, makasine wo o ile wa gatiša mangwalo a mantši kudu a ditebogo. Phuthego e nngwe kua Canada e ile ya ngwala gore: “Ditaba tše dibotse tša gore re ‘Dihlatse tša Jehofa’ di re thabišitše kudu, e bile di re file matla a mafsa a gore re swanelwe ke leina leo.”

⁴ O ka bontšha bjang gore o tloga o tšeela godimo tokelo ya go bitšwa ka leina la Modimo? Le gona, na o ka kgona go hlalosa ditaba tše di lego ditemaneng tše di dikologilego temana yeo leina la rena la Dihlatse tša Jehofa le tšerwego go yona?

5, 6. (a) Batswadi ba Baisiraele e be e tla ba dihlatse tša Jehofa bjang? (b) Ke’ng se sengwe seo batswadi ba Baisiraele ba bego ba laetšwe go se dira, gona ke ka baka la’ng batswadi ba swanetše go dira se se swanago lehono?

⁵ Moisiraele yo mongwe le yo mongwe mehleng ya Jesaya e be e le ‘hlatse’ ya Jehofa, gomme setšhaba ka moka e le “mohlanka” wa Modimo. (Jes. 43:10) Tsela e nngwe yeo batswadi ba Baisiraele e bego e le dihlatse e be e le ka go ruta bana ba bona ditirišano tša Modimo le borakgolokhukhu ba bona. Ka mohlala, ge Baisiraele ba be ba laelwa go bina Paseka ngwaga le ngwaga, ba ile ba botšwa gore: “Ge bana ba lena ba le botšiša gore: ‘Tirelo ye e ra go re’ng go lena?’ Le ba arabe le re: ‘Ke sehlabelo sa paseka seo se direlwago  Jehofa yoo a ilego a feta ka godimo ga dintlo tša rena bana ba Isiraele kua Egipita ge a be a bolaya Baegipita, eupša a hlakodiša malapa a rena.’” (Ek. 12:26, 27) E bile go ka direga gore batswadi bao ba ile ba hlalosetša bana ba bona gore ge Moshe a be a etla la mathomo go mmuši wa Egipita e lego Farao go tlo mo kgopela gore a lese Baisiraele gore ba yo rapela Jehofa lešokeng, Farao o ile a araba ka gore: “Jehofa ke mang, moo nka kwago lentšu la gagwe gomme ka lesa Isiraele ya tloga?” (Ek. 5:2) Le gona ba ile ba ba hlalosetša gore ka morago ga gore dikotlo tše lesome di senye naga ya Egipita le ka morago ga gore Baisiraele ba phonyokge madira a Baegipita Lewatleng le Lehwibidu, batho ka moka ba ile ba iponela ka noši karabo ya potšišo ya Farao. Jehofa e be e le Ramatlaohle, e bile e sa dutše e le yena. Le gona setšhaba sa Isiraele e bile dihlatse tše di phelago tša gore Jehofa ke Modimo wa therešo le Mophethagatši wa dikholofetšo tša gagwe.

⁶ Ga go pelaelo gore Baisiraele bao ba bego ba tšeela godimo tokelo ya go bitšwa ka leina la Jehofa ga se ba botša bana ba bona feela ditiragalo tšeo tše kgahlišago eupša ba di boditše le badiiledi bao e ilego ya ba makgoba ka malapeng a bona. Sa bohlokwa kudu ke gore Baisiraele ba be ba laetšwe go ruta bana ba bona go kwa ditekanyetšo tša Modimo tše kgethwa. Jehofa o itše: “Le be ba bakgethwa, ka gobane nna Jehofa Modimo wa lena ke yo mokgethwa.” (Lef. 19:2; Doit. 6:6, 7) Ruri wo ke mohlala o mobotse go batswadi ba Bakriste lehono, bao le bona ba swanetšego go ruta bana ba bona ditsela tše kgethwa, ka go re’alo ba ba thuša go godiša leina la Modimo la letago!—Bala Diema 1:8; Baefeso 6:4.

7. (a) Ge Baisiraele ba be ba botegela Jehofa, seo se be se eba le mafelelo afe go ditšhaba tša kgauswi le bona? (b) Bohle bao ba bitšwago ka leina la Modimo ba na le boikarabelo bofe?

⁷ Ka gona ge Baisiraele ba be ba botega, ba be ba nea bohlatse bjo bobotse ka leina la Modimo. Ba be ba boditšwe gore: “Merafo ka moka ya lefaseng e tla bona gore leina la Jehofa le a dirišwa mo go wena gomme e tla go boifa.” (Doit. 28:10) Eupša se se nyamišago ke gore Baisiraele ba be ba tsebja kudu ka go se botege. Nako le nako ba be ba boela ba rapela medingwana yeo e dirilwego ke batho. Go feta moo, go swana le medimo ya Kanana yeo ba bego ba e rapela, ba ile ba thoma go ba sehlogo, ba dira dihlabelo ka bana ba bona le go gatelela badiidi. A thuto e matla gakaakaang ya gore re dule re katanela go ba bakgethwa go etša Mokgethwakgethwa, yoo re bitšwago ka leina la gagwe!

8. Ke’ng seo Jehofa a ilego a laela Jesaya go se dira, gona Jesaya o ile a arabela bjang?

⁸ Jehofa o ile a bolela e sa le pele gore setšhaba sa Isiraele se be se tla bona ge a se hlakodiša bokgobeng. (Jes. 43:19) Dikgaolo tša mathomo tše tshelelago tša puku ya Jesaya di bolela kudu ka ditemošo tša mabapi le bošula bjo itšego bjo bo bego bo tla wela Jerusalema le metse ya kgauswi le yona. Jehofa, yena yo a kgonago go bona dipelo, o ile a botša Jesaya gore a tšwele pele a tsebatša ditemošo tšeo gaešita le ge batho ba be ba ka se mo theetše. Jesaya o ile a kwa bohloko gomme a botšiša Modimo gore setšhaba se sa gagwe se be se tla thatafatša dipelo go fihla neng. Modimo o ile a mo araba bjang? O ile a re: “Go fihlela ge metse e eba mašope e hloka badudi, ge dintlo di se sa dulwa ke batho, naga yona e šwalalantšwe.”—Bala Jesaya 6:8-11.

9. (a) Boporofeta bja Jesaya bja mabapi le Jerusalema bo ile bja phethagala neng? (b) Ke temošo efe yeo lehono re swanetšego go e ela hloko?

⁹ Jesaya o amogetše thomo ye ngwageng wa mafelelo wa pušo ya Kgoši Usia, goba mo e ka bago ka 778 B.C.E. O ile a tšwela pele e le moporofeta ka nywaga e ka bago e 46 go ba go fihla ka morago ga 732 B.C.E., nakong ya pušo ya Kgoši Hesekia. Seo se diragetše nywaga e 125 pele Jerusalema e ka fedišwa ka 607 B.C.E. Ka go re’alo, batho ba Modimo ba be ba lemošitšwe ka nywaga e mentši ka seo se bego se tlo diragalela setšhaba sa bona.  Le lehono, ke kgale batho ba Jehofa ba lemoša ba bangwe ka seo se tlago go direga. Ka nywaga e 135, go thoma ka tokollo ya wona ya mathomo, Morokami o be o dutše o lemoša babadi ba wona gore kgauswinyane pušo e kgopo ya Sathane e tlo fela gomme ya tšeelwa legato ke Pušo ya Jesu Kriste ya Nywaga e Sekete.—Kut. 20:1-3, 6.

10, 11. Baisiraele bao ba bego ba le Babilona ba ile ba bona go phethagala ga boporofeta bofe bja Jesaya?

¹⁰ Bajuda ba bantši ba kwago bao ba ilego ba ineela go Bababilona ba ile ba phologa ge Jerusalema e be e fedišwa gomme ba išwa bothopša Babilona. (Jer. 27:11, 12) Ka morago ga nywaga e 70 ba le moo, batho ba Modimo ba ile ba bona go phethagala ga boporofeta bjo bo makatšago bjo bo rego: “Se ke seo Jehofa, Morekolodi wa lena, Mokgethwa wa Isiraele, a se boletšego a re: ‘Ke tla ba romela Babilona ka baka la lena gomme ka wiša ditšhipi tša kgolego.’”—Jes. 43:14.

¹¹ Ka go dumelelana le boporofeta bjo, bošegong bjo bongwe mathomong a October 539 B.C.E., go ile gwa direga selo seo se ilego sa makatša ditšhaba. Ge kgoši ya Babilona le bakgomana ba yona ba dutše ba enwa beine ka dibjana tše kgethwa tšeo di thopilwego tempeleng kua Jerusalema e bile ba reta medimo ya bona yeo e dirilwego ke batho, madira a Bamede le Baperesia a ile a fenya Babilona. Ka 538 goba 537 B.C.E., Korese yo a bego a fentše Babilona, o ile a laela Bajuda gore ba boele Jerusalema e le gore ba tsošološe tempele ya Modimo. Dilo tše ka moka di be di porofetilwe ke Jesaya, go akaretša le kholofetšo ya Jehofa ya gore o be a tla hlokomela batho ba gagwe bao ba sokologilego le go ba šireletša ge ba boela Jerusalema. Modimo o ile a ba bitša “batho bao ke ipopetšego bona e le gore ba ntumiše.” (Jes. 43:21; 44:26-28) Ka morago ga gore batho ba bao e bego e le mathopša ba boele Jerusalema le go tsošološa tempele ya Jehofa, e ile ya ba dihlatse tša gore Jehofa, yena Modimo a nnoši wa therešo, ka mehla o phethagatša seo a se boletšego.

12, 13. (a) Ke bomang bao ba ilego ba tloga le Baisiraele Babilona go yo tsošološa borapedi bja Jehofa? (b) “Dinku tše dingwe” di swanetše go dira’ng ge di dutše di thekga “Isiraele ya Modimo,” gona di na le kholofelo efe?

¹² Batho ba ditšhaba tše dingwe ba diketekete ba ile ba tloga le Baisiraele Babilona gomme ka morago Bantle ba bangwe ba bantši ba sokologela tumelong ya Sejuda. (Esera 2:58, 64, 65; Esitere 8:17) Lehono, “lešaba le legolo” la “dinku tše dingwe” tša Jesu le thekga ka potego Bakriste ba tloditšwego, bao ba bopago “Isiraele ya Modimo.” (Kut. 7:9, 10; Joh. 10:16; Bagal. 6:16) Lešaba le legolo le lona le bitšwa ka leina le leo Modimo a re neilego lona la Dihlatse tša Jehofa.

¹³ Nywageng e Sekete ya Pušo ya Kriste, lešaba le legolo le tla thaba wa go se hlalosege ge le tla be le hlalosetša bao ba tsošitšwego  bahung gore go ba yo mongwe wa Dihlatse tša Jehofa go be go le bjang mehleng ya bofelo bja tshepedišo ye ya dilo. Eupša seo re ka tla ra se thabela ge feela gona bjale re phela ka go dumelelana le leina la rena le go katanela go dula re le ba bakgethwa. Le gona go sa šetšwe gore re katana gakaakaang go dula re le ba bakgethwa, ka mehla re swanetše go kgopela Modimo gore a re lebalele ge re palelwa, re lemoga gore re badiradibe le gore go bitšwa ka leina la Modimo le lekgethwa ke tokelo e sa hlalosegego.—Bala 1 Johane 1:8, 9.

14. Leina Jehofa le bolela’ng?

¹⁴ E le gore re kgone go tšeela godimo kudu tokelo ya go bitšwa ka leina la Modimo, re swanetše go naganišiša ka seo le se bolelago. Leina la Modimo leo gantši le fetolelwago e le “Jehofa,” le tšwa lediring la Seheberu leo le ka hlalosago selo se itšego seo se diregago gomme le ka fetolelwa e le “go ba.” Ka go re’alo, go kwešišwa gore leina Jehofa le bolela gore “Yo a Bakago go ba Gona.” Tlhaloso ye e tloga e swanela tema yeo Jehofa a e kgathago e le Mmopi wa legohle le dibopiwa tše bohlale gotee le ya go ba Mophethagatši wa morero wa gagwe. O tšwela pele a phethagatša thato ya gagwe le morero wa gagwe go sa šetšwe seo lenaba le ge e le lefe, go etša Sathane, le ka se dirago go leka go thibela seo.

15. Jehofa o ile a utolla bjang sebopego se sengwe sa semelo sa gagwe go etša ge se bonagala tlhalosong ya leina la gagwe? (Bona lepokisi le le rego, “ Leina Leo le Nago le Ditlhaloso tše Dintši.”)

¹⁵ Ge Jehofa a be a roma Moshe gore a yo ntšha batho ba Gagwe Egipita, o ile a utolla sebopego se sengwe sa semelo sa gagwe ka go diriša lediri le le tswalanago le leo le boletšwego ka mo godimo go hlalosa leina la gagwe, mo lekgeng le e le yena a itlhalosago. Beibele e re: “Modimo a re go Moshe: ‘Ke tla ba Seo ke Nyakago go ba Sona.’ A oketša ka gore: ‘Se ke seo o tlago go se botša bana ba Isiraele wa re: “Mo go lena ke romilwe ke: ‘Ke tla ba Seo ke Nyakago go ba Sona.’”’” (Ek. 3:14) Ka gona, boemong le ge e le bofe, Jehofa o tla ba selo le ge e le sefe seo se nyakegago gore a phethagatše morero wa gagwe. Go Baisiraele bao e bego e le makgoba, o ile a ba Mohlakodiši, Mošireletši, Mohlahli gotee le Mohlokomedi yo a ilego a ba hlokomela nameng le moyeng.

16, 17. (a) Re ka bontšha bjang gore re tšeela godimo tokelo ya go bitšwa ka leina la Modimo? (b) Re tlo ahlaahla’ng sehlogong se se latelago?

¹⁶ Lehono, Jehofa o tšwela pele a phelela seo leina la gagwe le se bolelago ka go re hlokomela moyeng le nameng. Go oketša moo, seo leina la Modimo le se bolelago ga se akaretše feela seo yena a kgethago go ba sona. Se akaretša le seo a bakago gore se direge ka modiro wa Dihlatse tša gagwe go phethagatša morero wa gagwe. Go naganišiša ka se go tla re tutueletša go tšwela pele re phela ka go dumelelana le leina la gagwe. Kåre wa nywaga e 84, yoo e bego e dutše e le Hlatse e mafolofolo kua Norway nywageng e 70 e fetilego, o re: “Ruri ke tokelo e kgolo kudu go hlankela Jehofa, yena Kgoši ya bosafelego, le go ba karolo ya batho bao ba bitšwago ka leina la gagwe le lekgethwa. E bile ke tokelo e kgolo go ruta batho therešo ya Beibele le go bona ba thaba kudu ge ba kwešiša seo o ba botšago sona. Ka mohlala, go nthabiša kudu go ba hlalosetša kamoo sehlabelo sa Kriste sa topollo se šomago ka gona le kamoo se ka ba thušago go hwetša bophelo bjo bo sa felego lefaseng le lefsa la khutšo le la go loka.”

¹⁷ Ke therešo gore ditšhemong tše dingwe go ba thata le go feta go hwetša batho bao ba nyakago go ithuta ka Modimo. Lega go le bjalo, go swana le Kåre, na ga o thabe kudu ge o kopana le motho yo a theetšago gomme o kgona go mo ruta ka leina la Jehofa? Eupša na go a kgonega gore re be Dihlatse tša Jehofa gomme ka lehlakoreng le lengwe ra ba dihlatse tša Jesu? Potšišo ye e tla ahlaahlwa sehlogong se se latelago.