BEIBELE e re: “Bana ke bohwa bjo bo tšwago go Jehofa; dienywa tša mmele ke moputso.” (Ps. 127:3) Ka gona ga go makatše ge batswadi ba Bakriste ba amogela leseana la bona ka lethabo le legolo.

Go oketša go lethabo leo, go belegwa ga ngwana go tliša boikarabelo bjo bogolo. Ngwana o hloka dijo tše nago le phepo ka mehla gore e be motho yo a fepegilego gabotse ge a godile. E le gore ngwana a emele borapedi bja therešo ka go tia, o nyaka keletšo le tlhahlo ya moya go batswadi bao ba katanelago go mo tlwaetša melao ya motheo ya Modimo. (Die. 1:8) Ba swanetše go thoma neng go mo tlwaetša, le gona tlwaetšo yeo e akaretša eng?

Ela hloko boemo bja Manoa wa moloko wa Badani, yo a phetšego motseng wa Tsora Isiraeleng ya bogologolo. Morongwa wa Jehofa o ile a tsebiša mosadi wa Manoa yo e bego e le moopa gore o be a tla ba le morwa. (Baa. 13:2, 3) Ga go pelaelo gore Manoa yo a botegago le mosadi wa gagwe ba ile ba thabišwa kudu ke se. Lega go le bjalo, ba be ba tshwenyegile kudu. Ka gona Manoa o ile a rapela ka gore: “Tshwarelo Jehofa. Hle anke monna wa Modimo wa therešo yo o sa tšwago go mo roma a boe go rena a re botše kamoo re swanetšego go godiša ka gona ngwana yo a tlago go belegwa.” (Baa. 13:8) Manoa le mosadi wa gagwe ba be ba tshwenyegile mabapi le kamoo ngwana yo a tlago go godišwa ka gona. Ga go pelaelo gore ba ile ba tlwaetša morwa wa bona Simisone molao wa Modimo, gomme maiteko a bona a ile a atlega. Beibele e re: “Ge nako e dutše e tšwela pele moya wa Jehofa wa thoma go . . . tutuetša” Simisone. Mafelelong, Simisone o ile a dira mediro e mentši e matla e le yo mongwe wa baahlodi ba Isiraele.—Baa. 13:25; 14:5, 6; 15:14, 15.

Batswadi ba swanetše go thoma neng go tlwaetša bana ba bona? Timotheo o ile a rutwa “mangwalo a makgethwa” ke mmagwe Yunise le makgolo’agwe Loisa “go tloga boseeng.” (2 Tim. 1:5; 3:15) Ee, Timotheo o thomilwe go rutwa Mangwalo e sa le yo monyenyane kudu.

Ke gabohlale gore batswadi ba Bakriste ba rapelele tlhahlo ya Modimo gomme ba itokišeletše e sa le pele gore ba tle ba kgone go tlwaetša ngwana wa bona “go tloga boseeng.” Diema 21:5 e re: “Maano a motho yo mafolofolo a a mo hola.” Ga go pelaelo gore batswadi ba tla lokišetša dilo ka kelohloko pele ngwana wa bona a ka belegwa. E bile ba ka ba le lenaneo la dilo tšeo ngwana a tlago go di hloka. Le gona, go bohlokwa gore ba lokišetše le mediro ya moya. Pakane ya bona e swanetše go ba go tlwaetša ngwana wa bona go tloga boseeng.

Puku ya Early Childhood Counts—A Programming Guide on Early Childhood Care for Development e re: “Dikgwedi tše ngwana a sa tšwago go belegwa ka tšona di bohlokwa e le gore a gole gabotse ka bjokong. Ka dikgwedi tšeo, megalatšhika yeo e fetišago molaetša go tloga seleng e nngwe go ya go e nngwe—yeo e dirago gore ngwana a kgone go ithuta dilo tše itšego—e oketšega ga masomepedi.” Ka gona, ke gabohlale kudu gore batswadi ba diriše nakwana yeo go thoma go bjala dikgopolo tša moya le ditekanyetšo tša Beibele monaganong wa gagwe!

Mma yo e lego mmulamadibogo wa ka mehla o boletše ka morwedi wa gagwe yo monyenyane gore: “Ke be ke dutše ke e ya le yena bodireding go tloga ge a sa na le kgwedi e tee. Le ge a be a sa tsebe seo ke bego ke se dira ka nako yeo, ke dumela gore seo se mo thušitše kudu. Ge a šetše a na le nywaga e mebedi, o be a efa bao re kopanago le bona bodireding bja tšhemo dipampišana ka sebete.”

Go tlwaetša ngwana go tloga boseeng go tšweletša dienywa tše dibotse. Lega go le bjalo, batswadi ba lemogile gore go tlwaetša ngwana dilo tša moya go na le ditlhohlo tša gona.

Go se dudišege ga ngwana goba go se kgone ga gagwe go theetša ka nako e telele e ka ba tlhohlo e kgolo go batswadi. Bana ga se gantši ba theetša selo setee ka nako e telele. Re gopole gore ba sa dutše ba ipotšiša ka dilo tše dintši le gona ba nyaka go tseba selo se sengwe le se sengwe seo ba se bonago. Ke’ng seo batswadi ba ka se dirago go thuša ngwana wa bona gore a theetše ka kelohloko seo ba lekago go mo tlwaetša sona?

Ela hloko seo Moshe a se boletšego go Doiteronomio 6:6, 7 ge a re: “Mantšu a ao ke go laelago ona lehono, o a bee pelong ya gago; o a nweletše ngwaneng wa gago, o bolele ka ona ge o dutše ntlong ya gago, ge o sepela tseleng, ge o robala le ge o tsoga.” Lentšu ‘nweletša’ le bolela go tlwaetša selo se tee kgafetšakgafetša. Lesea le swana le sehlašana seo se swanetšego go nošetšwa kgafetšakgafetša. Ka ge go bušeletša selo se itšego go thuša batho ba godilego go gopola dilo tše bohlokwa, ga go pelaelo gore se se ka thuša bana ba banyenyane!

Go tlwaetša bana therešo ya Modimo go nyaka gore batswadi ba fetše nako le bona. Lefaseng la lehono la semphete-ke-go-fete, go beela nako ka thoko bakeng sa morero woo e ka ba tlhohlo e le ruri. Eupša moapostola Paulo o re eleditše gore re “diriše nako ya [rena] ka bohlale” bakeng sa mediro e bohlokwa ya Bokriste. (Baef. 5:15, 16) Re ka dira bjang seo? Go rulaganya nako ya go tlwaetša ngwana, go hlokomela ditokelo tša ka phuthegong le mošomo wa boiphedišo go ile gwa thatafalela molebeledi yo mongwe  wa Mokriste yoo mosadi wa gagwe a swaregilego kudu ka go ba mmulamadibogo wa ka mehla. Ba be ba ka ba bjang le nako ya go tlwaetša morwedi wa bona? Tate o re: “Mesong e mengwe le e mengwe pele ke eya mošomong, nna le mosadi wa ka re mmalela Puku ya ka ya Ditaba tša Beibele goba pukwana ya Go Hlahloba Mangwalo ka Mehla. Mantšiboa re kgonthišetša gore re mmalela se sengwe pele a robala, gomme re ya le yena bodireding. Ga re nyake go fetwa ke nywaga ye ya mathomo ya bophelo bja gagwe.”

Ruri re nyaka gore ka moso bana ba rena ba be le boikarabelo. Lega go le bjalo, lebaka le legolo la go tlwaetša bana ba rena ke gore ba rate Modimo go tšwa dipelong tša bona.—Mar. 12:28-30.

Psalme 127:4 e re: “Bana bao motho a ba belegetšwego e sa le yo mofsa ba etša mesebe ka seatleng sa mogale.” Ka gona bana ba swantšhwa le mesebe yeo motswadi a swanetšego go e korola gabotse. Mmetši wa mesebe a ka se kgone go swara mosebe wa gagwe gateetee ka morago ga gore a o betše. Batswadi ba na le “mesebe”—bana ba bona—ka nako e nyenyane kudu. Nako yeo e swanetše go dirišwa go tsenya ka dikgopolong le dipelong tša bana ba bona melao ya motheo ya Modimo.

Ge moapostola Johane a bolela ka bana ba gagwe ba moya, o itše: “Ga ke na lebaka le legolo la go thaba go feta le, la gore ke kwe gore bana ba ka ba tšwela pele ba sepela therešong.” (3 Joh. 4) Batswadi ba Bakriste ba ka thaba ka tsela e swanago ge ba bona bana ba bona “ba tšwela pele ba sepela therešong.”