Na o Itokišeleditše go Emela Tumelo ya Gago?

NA O kile wa lebeletšana le boemo bjoo go bjona o ilego wa gapeletšega go emela tumelo ya gago? Ela hloko seo se diragaletšego Susana, kgaetšedi wa nywaga e 16 wa kua Paraguay. Ge a be a le ka klaseng sekolong, o ile a kwa go bolelwa gore Dihlatse tša Jehofa ga di amogele “Testamente ya Kgale,” Jesu Kriste goba Maria. Go ile gwa ba gwa bolelwa gore Dihlatse ke batho bao ba feteletšago dilo moo e lego gore ba ka ba ba hwa go e na le go amogela tlhokomelo ya tša kalafo. Nkabe o ile wa dira’ng?

Susana o ile a rapela Jehofa gomme a emiša letsogo. Klase e be e le kgaufsi le go tšwa, ka baka leo o ile a kgopela morutišigadi wa gagwe gore a mo dumelele go nea thero yeo e lego mabapi le ditumelo tša gagwe bjalo ka yo mongwe wa Dihlatse tša Jehofa. Morutišigadi o ile a dumela. Dibekeng tše pedi tše di latetšego, Susana o ile a lokišetša go nea polelo sekolong, a diriša poroutšha e nago le sehlogo se se rego Dihlatse tša Jehofa—Ke Bomang? Di Dumela Eng?

Letšatši la thero le ile la fihla. Susana o ile a hlalosa gore leina la Dihlatse tša Jehofa le tšwa kae. O ile a ba a hlalosa kholofelo yeo re nago le yona ka bokamoso le lebaka leo ka lona re sa amogelego tšhelo ya madi. Ke moka o ile a laletša barutwana go botšiša dipotšišo. Barutwana ba bantši ba ile ba emiša matsogo. Morutišigadi o be a kgahlilwe ke dikarabo tše di theilwego Mangwalong tša ngwanenyana yo yo monyenyane tša dipotšišo tšeo.

Morutwana yo mongwe o ile a bolela gore, “Nkile ka ya Holong ya Mmušo gatee, gomme go be go se na seswantšho le se tee.” Morutišigadi o ile a nyaka go tseba lebaka. Susana o ile a bala Psalme 115:4-8 le Ekisodo 20:4. A tlabegile, morutišigadi o ile a re, “Go tla bjang gore dikereke tša rena di tlale ka diswantšho ka tsela ye mola Beibele e di gana?”

Poledišano ya dipotšišo le dikarabo e ile ya tšwela pele ka metsotso e 40. Ge Susana a be a botšiša barutwana ge e ba ba ka rata go bogela bidio ya No Blood—Medicine Meets the Challenge, ka moka ba ile ba dumela. Ke moka morutišigadi o ile a rulaganya gore go be le poledišano e nngwe letšatšing le le latelago. Ka morago ga go bontšha bidio, Susana o ile a hlalosa mekgwa e mengwe ya kalafo yeo e sa akaretšego madi yeo Dihlatse tše dingwe tša Jehofa di e amogelago. Morutišigadi o ile a bolela mabapi le seo gore: “Ke be ke sa tsebe gore go na le mekgwa e mentši gakaakaa ya go alafa ntle le madi; e bile ke be ke sa lemoge mehola ya go alafša ka ntle le go tšhelwa madi. Na mekgwa ye ya kalafo ke ya Dihlatse tša Jehofa feela?” Ge morutišigadi a be a e-kwa gore ga se ya tšona feela, o ile a re, “Nakong e tlago ge Dihlatse tša Jehofa di nketela, ke tla boledišana le tšona.”

Poledišano ya metsotso e 20 yeo Susana a bego a e lokišeditše e tšere diiri  tše tharo. Beke ka morago ga moo, barutwana ba bangwe ba ile ba nea thero mabapi le ditumelo tša bona bjalo ka ditho tša kereke. Ge ba fetša, go ile gwa rotošwa dipotšišo tše dintši, eupša barutwana bao ga se ba kgona go emela tumelo ya bona. Morutišigadi o ile a ba botšiša gore, “Go tla bjang gore le se ke la kgona go emela tumelo ya lena go swana le morutwana-gotee le lena yo e lego yo mongwe wa Dihlatse tša Jehofa?”

Karabo ya re: “Ba tloga ba ithuta Beibele. E sego rena.”

Ge a retologela go Susana, morutišigadi o ile a re: “O tloga o ithuta Beibele e bile o katanela go dira seo e se bolelago. O swanelwa ke theto.”

Susana a ka be a ile a ikhomolela. Lega go le bjalo, ka go bolela ga gagwe, o latetše mohlala o mobotse wa ngwanenyana wa Moisiraele yo a sa bolelwego ka leina yoo a ilego a thopša ke Basiria. Ngwanenyana yo o be a dula ngwakong wa tona ya madira ya Mosiria e lego Naamane, yo a bego a e-na le bolwetši bja go šiiša bja letlalo. Ngwanenyana wa Moisiraele o ile a bolela le mong wa gagwe a re: “Xe mong wa-ka a ka bê a e-ya xo moporofeta wa Samaria, a ka bê a mo fodiša lephêra lé.” Ngwanenyana yo ga se a ka a fo ikhomolela ge a be a swanetše go nea bohlatse ka Modimo wa therešo. Se se dirile gore mong wa gagwe, Naamane, a be morapedi wa Jehofa.—2 Dikx. 5:3, 17.

Ka mo go swanago, Susana ga se a ka a fo ikhomolela ge a be a swanetše go nea bohlatse ka Jehofa le ka batho ba gagwe. Ka go gata mogato wa pele wa go emela tumelo ya gagwe ge go be go belaelwa ditumelo tša gagwe, Susana o be a e-kwa taelo ya Mangwalo e rego: “Kgethagatšang Kriste e le Morena dipelong tša lena, ka mehla le loketše go itwela pele ga yo mongwe le yo mongwe yo a nyakago lebaka la kholofelo e lego go lena, eupša le dira bjalo ka moya o boleta le ka tlhompho e tseneletšego.” (1 Pet. 3:15) Na o itokišeleditše go emela tumelo ya gago le go gata mogato ge go nyakega gore o dire bjalo?

[Seswantšho go letlakala 17]

Didirišwa tše di ka go thuša go emelela tumelo ya gago