Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Ke eng seo se ka thušago Mokriste wa therešo ge e ba motho yo a mo ratago a tlogela Jehofa?

Ikage moyeng gotee le go aga ditho tše dingwe tše di botegago tša lapa. Dula o swaregile medirong ya moya. E-ba yo a hwetšagalago go thuša ba bangwe. O se ke wa felelwa ke kholofelo ya gore yo o mo ratago a ka boa. O se ke wa ipea molato. Hlompha tokišetšo ya Modimo ya tayo, gomme o bolele le bagwera ba gago mabapi le kamoo o ikwago ka gona.—9/1, matlakala 18-21.

• Ke ditsela dife tše pedi tšeo ka tšona Mangwalo a thušago go hlaola ‘mehla ya bofelo’?

Beibele e bolela e sa le pele ka ditiragalo tšeo di bego di tla direga nakong ya “bofelo bja tshepedišo ya dilo.” (Mateo 24:3, 7, 8; Luka 21:11) Gape e hlalosa mabapi le go fetoga ga boemo bja kgopolo le ditiro tša batho bao ba phelago “mehleng ya bofelo.” (2 Timotheo 3:1-5) Sa bohlokwa, ditaba tše dibotse tša mmušo di be di swanetše go bolelwa nakong ye.—9/15, matlakala 4-6.

• Boikarabelo bja phuthego ke bofe ge Mokriste yo a otlelago koloi a dira kotsi yeo go yona go feleletšago go e-ba le bao ba hwago?

Bagolo bao ba nyakišišago taba ba ka hwetša gore ga go na molato wa madi ka ge mootledi a be a ka se kgone go laola maemo ao a feleleditšego ka go baka lehu. Eupša ge e ba go e-na le molato wa madi gomme motho yo a nago le molato a itshola, o tla hwetša kgalemelo ya Mangwalo gomme a beelwe dithibelo ge e le mabapi le ditokelo ka phuthegong.—9/15, letlakala 30.

• Ke ka baka la’ng bophelo bjo bo sa felego bo se bja ithekga ka tšwelopele ya tša thutamahlale?

Go na le maiteko a tša thutamahlale mabapi le go telefatša bophelo, a bjalo ka go leka go oketša seo go bonalago e le tekanyo ya go ikatiša ga disele goba ka go tsenya balwetši ditho tša maitirelo tše di tšweleditšwego ka mokgwa wa tša kalafo tšeo di šomago gabotse. Eupša Beibele e bontšha gore tsela e nnoši yeo batho ba ka hwetšago bophelo bjo bo sa felego ke ka topollo ya Jesu.—10/1, matlakala 3-5.

• Moetlo wa Sejuda wa go hlapa, na o be o swantšhetša kolobetšo ya Bokriste?

Aowa, o be o sa e swantšhetše. Bajuda ba be ba dira meetlo ya go itlhwekiša bona ka bobona, wo o bego o sa swane le kolobetšo ya Johane. Go itlhwekiša moo go bego go nyakwa ke Molao wa Moše go be go swanetše go dirwa leboelela, eupša kolobetšo ya Bokriste e dirwa gatee feela.—10/15, matlakala 12-13.

• Sekolo sa Tlwaetšo ya Bodiredi ke eng?

Ke lenaneo la thuto la dibeke tše seswai bakeng sa bagolo ba phuthego le bahlanka ba bodiredi bao ba sego lenyalong gape ba le boemong bjoo ba ka abelwago go hlankela moo go nyakegago thušo e kgolo. Ba ka abelwa phuthegong yeo ba tšwago go yona, lefelong le lengwe nageng yona yeo, goba nageng e nngwe.—11/15, matlakala 10-11.

• Molwa-le-Kriste yoo go boletšwego ka yena go 1 Johane 2:18; 4:3, ke eng goba ke mang?

Ka kgopolo e akaretšago, “molwa-le-Kriste” e šupa go bohle bao ba ganetšago goba bao ka maaka ba ipolelago gore ke bo-Kriste goba baemedi ba gagwe. Mantšu a Jesu le Johane a bontšha gore molwa-le-Kriste ke sehlopa seo se dirilwego ka batho ba bantši ba balwa-le-Kriste bao ba phatlalatšago maaka a bodumedi le go gana Mmušo wa Modimo.—12/1, matlakala 4-6.