Na Diabolo ke Motho wa Kgonthe?

O NAGANA’NG ka Diabolo? Na o nagana gore ke motho wa kgonthe yo a lekago batho gore ba dire dilo tše mpe, goba na o fo ba a swantšhetša bobe? Na Diabolo ke motho yo a swanetšego go boifša, goba na o swanetše go lebelelwa e le feela tumela-khwele goba motho wa nonwane? Na lentšu “diabolo” le šupa tutuetšong e senyago yeo e sa tsebjego legohleng? Na lentšu le e ka ba e le feela leswao la mekgwa e mebe ya batho, go etša ge bo-rathutatumelo ba bantši lehono ba bolela?

Ga go makatše gore batho ba na le dikgopolo tše di fapanego tabeng ya gore Diabolo ke mang. Nagana kamoo go ka bago thata ka gona go tseba seo moikgakanyi yo mogolo a lego sona! Go ka ba thata kudu ge e ba a ikemišeditše go dula a sa tsebje. Beibele e hlalosa Diabolo e le motho yo bjalo. Ge e bolela ka yena e le Sathane, e re: “Le yêna Sathane ó ikxanthša a itira Morongwa wa seetša.” (2 Ba-Korinthe 11:14) Gaešita le ge e le motho yo mobe, Diabolo o itira motho yo a lokilego e le gore a fapoše ba bangwe. Ke moka ge a kgona go dira gore batho ba dumele gore ga a gona, seo se tloga se dumelelana gabotse le morero wa gagwe.

Ka gona, Diabolo ge e le gabotse ke mang? O bile gona neng le gona bjang? O tutuetša batho bjang lehono? Na go na le selo seo re ka se dirago bakeng sa go lwantšha tutuetšo yeo? Beibele e na le histori e nepagetšego mabapi le Diabolo go tloga mo a thomilego gona gomme e nea dikarabo tše di nepagetšego tša dipotšišo tše.

[Seswantšho go letlakala 3]

Ruri go ka ba thata go tseba motho yo a ikemišeditšego go dula a sa tsebje!