Dipotšišo tše Tšwago go Babadi

Ke ka baka la’ng Dafida, mohlanka yo a botegago wa Jehofa, a ile a dumelela mosadi wa gagwe Mikala go ba le modimo wa seswantšho, goba modingwana, bjalo ka ge go bontšhitšwe go 1 Samuele 19:12, 13?

Sa pele, anke re ahla-ahleng ka boripana taba e dikologilego. Ge mosadi wa Dafida a be a e-kwa ka leano la Kgoši Saulo la go bolaya Dafida, o ile a arabela le semeetseng. Beibele e re: “A mo nthša ka lešoba, a fulara a thšaba; ya ba xôna xo phônyôkxa. Xomme Mikala a tšea seswanthšô sa modimo [seo go lego molaleng gore e be e le sa bogolo le sebopego sa motho], a se latša mo malaong, a se tatetša hlôxô ka letlalô la pudi, a se apeša ka kobô.” Ge batseta ba Saulo ba be ba e tla go swara Dafida, Mikala o ile a ba botša gore: “Ó a babya.” Leano le le ile la tšweletša sebaka se sebotse, gomme Dafida o ile a kgona go tšhaba.—1 Samuele 19:11-16.

Diphetho tša baepi ba marope di šišinya gore mehleng ya bogologolo, medimo ya diswantšho e be e sa bolokwe feela bakeng sa go dirišetšwa bodumeding eupša gape e be e dirišetšwa merero ya tša molao. Go etša ge dišupo tša bohlatse le mangwalo a molao a go aba lefa a bontšha ditshwanelo tša bohwa lehono, ke seo kgale se bego se dirwa ke medimo ya diswantšho. Ka tlase ga maemo a itšego, go bonagala go ba le modimo wa seswantšho go be go nea mokgonyana tshwanelo ya go tšea dithoto tša ratswal’gwe yo a hlokofetšego. Se se ka hlalosa lebaka leo ka lona, tiragalong ya pejana, Ragele a ilego a tšea medimo ya diswantšho ya tatagwe le lebaka leo ka lona a bego a fagahletše go e hwetša gape. Tiragalong yeo, monna wa Ragele e lego Jakobo, o be a sa lemoge seo mosadi wa gagwe a se dirilego.—Genesi 31:14-34.

Ge ba-Isiraele ba be ba fetoga setšhaba, ba ile ba amogela Melao e Lesome, woo wa bobedi wa gona o bego o iletša ka go lebanya go dirwa ga medingwana. (Ekisodo 20:4, 5) Ka morago, moporofeta Samuele o ile a bolela ka molao wo gape ka tsela ya go se lebanye ge a be a bolela le Kgoši Saulo. O itše: “Xo se kwê ké bobe bo-ka-boloi; bonganga bo etša xo hlanoxa le xo y’o laola [“go direla medimo e šele le diswantšho,” PK].” (1 Samuele 15:23) Ka baka le, ga go bonagale modimo wa seswantšho o be o šoma mererong ya bohwa Isiraeleng. Lega go le bjalo, go bonagala mokgwa wo wa bogologolo wa tumela-khwele ya Sejuda o ile wa tšwela pele ka magaeng a ba-Isiraele ba bangwe. (Baahlodi 17:5, 6; 2 Dikxoši 23:24) Taba ya gore Mikala o ile a boloka modimo wa seswantšho gare ga dithoto tša gagwe e šišinya gore pelo ya gagwe e be e sa felela go Jehofa. Dafida a ka ba a be a sa tsebe ka modimo wo wa seswantšho goba a ile a o dumelela ka ge Mikala e be e le morwedi wa Kgoši Saulo.

Pono ya Dafida ka boineelo bjo bo feletšego go Jehofa e bontšhitšwe mantšung a rego: “Morêna ké Yêna Moxolo, Mmoifya mo xo medimo yohle. Xobane ka moka medimo ya dithšaba e fo ba medimo; Xe e le Morêna, ó dirile maxodimo.”—1 Koronika 16:25, 26.

[Caption on page 29]

Molao wa bobedi go Melao e Lesome o be o iletša go dira medingwana e swanago le modimo wa seswantšho wo o bontšhitšwego fa

[Caption on page 29]

From the book The Holy Land, Vol. II, 1859