“Lentsu la Modimo e Tloga e le le Matla Gakaakang!”

“LENTŠU la Modimo ké le le phelaxo, ké le matla.” (Ba-Hebere 4:​12) Ge e hlatsela go ba matla ga Lentšu la Modimo, 2003 Calendar of Jehovah’s Witnesses e ile ya gatiša diphihlelo tše tshela tša kgonthe tše tšwago lefaseng ka bophara. Tlase ga sehlogo se se rego “Pele le ka Morago,” almanaka e ile ya bontšha kamoo modiro wa go ruta wa Dihlatse tša Jehofa o thušago batho go kaonefatša boitshwaro bja bona, go tlogela mekgwa ya bophelo e gobatšago, go tiiša bophelo bja bona bja lapa le go hlagolela tswalano ya motho ka noši le Modimo.

Go amogetšwe mangwalo a mmalwa a tebogo a lego mabapi le almanaka ya 2003. Tše dingwe tša ditlhaloso tša ona ke tše:

“Almanaka ye ke bohlatse go Bakriste ba therešo bja gore go na le ba bangwe ba ba tlogago ba swana le bona bao ba ilego ba swanelwa ke go lwela tumelo ka go tia. Ga bjale ba ka lebelela diswantšho e le dikgopotšo tša diphetogo tšeo ba bangwe ba di dirilego.”​—Steven, United States.

“Ke be ke tloga ke nyaka go ngwala mantšu a a sego kae e le go le tsebiša kamoo almanaka ya 2003 e nkgomilego pelo. Almanaka ga se ya ka ya nkgoma ka tsela ye le ka mohla. Diphihlelo tše e tla ba karolo ya dipuku tšeo ke di swarago ka mokotleng wa-ka wa ge ke yo nea bohlatse e le gore ke bontšhe batho bohlatse bja kgonthe le bjo bo kgahlišago bja tutuetšo yeo Beibele e ka bago le yona bathong.”​—Marc, Belgium.

“Almanaka e ile ya nkgoma kudu. Ke ile ka ba le maikwelo a tseneletšego a go bala le go bona kamoo Jehofa a fetotšego batho ba. Ka baka leo, ke tutueleditšwe go tšwela pele ke dira diphetogo bophelong bja-ka. Ga bjale go feta le ge e le neng pele, ke ikwa ke le karolo ya borwarre bja rena bja lefase ka bophara.”​—Mary, United States.

“Jesu o ile a kgongwa kudu ke boemo bja moya bjo bo nyamišago bja mašaba. Ke leboga ge le ekišitše mohlala wa Kriste ka go gatiša diphihlelo tšeo di tšwelelago go almanaka ya rena ya 2003. Le ka mohla bophelong bja-ka almanaka ga se ya ka ya nkgoma gore ke be ke sekiše megokgo.”​—Cassan­dra, United States.

“Ge ke be ke e-⁠na le nywaga e 11, ke ile ka thoma go kgoga, gomme ka morago ke ile ka diriša dihlare-tagi. Ka mehla ke be ke nagana go ipolaya. Ge ke be ke thoma go tseba Jehofa, ke ile ka thušwa go tlogela mekgwa yeo. Almanaka ye ke ya bohlokwa kudu go nna. Mehlala ya bana bešo le dikgaetšedi ba tšwago lefaseng ka bophara e ile ya mmatlafatša. Bjale ke a tseba gore ga ke noši ntweng ye le gore selo sa bohlokwa kudu ke go rata Jehofa le go mo hlankela ka pelo ka moka.”​—Margaret, Poland.

“Ruri, Lentšu la Modimo e tloga e le le matla gakaakang! Ge ke be ke amogela almanaka ya 2003, go be go le thata go nna gore ke se ke ka lla. Diphihlelo tše gotee le diswantšho, ke tšeo di tlogago di matlafatša tumelo.”​—Darlene, United States.

“Mokgwa wa pele wa bophelo wa ba bangwe ba batho ba o tloga o swana kudu le mokgwa wa-ka wa pele wa bophelo. Jehofa o nneile matla a go tlogela mekgwa e mebe yeo e bego e bonagala e sa fenyege. Ke le leboga kudu bakeng sa diphihlelo tše tša kgonthe.”​—William, United States.