Dipotšišo tše Tšwago go Babadi

Ke ka baka la’ng Elisa a ile a kgopela ‘dikarolo tše pedi’ tša moya wa Eliya?

Pejana ga ge Eliya a ka fetša kabelo ya gagwe e le moporofeta wa Isiraele, moporofeta yo monyenyane Elisa o ile a mo kgopela gore: “A nkê ke fiwê kabêlo ya môya wa xaxo xa-bedi.” (2 Dikxoši 2:⁠9) Ge re bolela ka tsela ya moya, go bonagala Elisa a be a kgopela dikarolo tše pedi tšeo di bego di fiwa morwa wa leitšibulo. (Doiteronomio 21:​17) Go ahla-ahlwa ka boripana ga kanegelo ye, go tla dira gore re e kwešiše le gona go tla re thuša gore re ithute go seo se diragetšego.

Ka go dumelelana le tlhahlo ya Jehofa, moporofeta Eliya o ile a tlotša Elisa go ba mohlatlami wa gagwe. (1 Dikxoši 19:​19-21) Elisa o ile a šoma e le mohlokomedi yo a botegago wa Eliya mo e ka bago ka nywaga e tshela, le gona o be a ikemišeditše go dira se go fihla mafelelong. Elisa o ile a kgomarela mohlahli wa gagwe go ba go fihla gaešita le letšatšing la mafelelo la Eliya e le moporofeta wa Isiraele. Le ge Eliya a ile a kgopela Elisa gore a tlogele go mo latela, moporofeta yo yo monyenyane o ile a bolela gararo gore: “Nka se kê ka bá ka Xo tloxêla.” (2 Dikxoši 2:​2, 4, 6; 3:​11) Ka kgonthe, Elisa o be a tšea moporofeta yo mogolo bjalo ka tatagwe wa moya.​—2 Dikxoši 2:⁠12.

Lega go le bjalo, Elisa e be e se yena feela morwa wa moya wa Eliya. Eliya le Elisa ba be ba kopana le sehlopha sa banna bao ba bego ba tsebja e le “barwa ba baporofeta.” (2 Dikxoši 2:⁠3) Kanegelo e lego go Dikxoši tša Bobedi e bontšha gore “barwa” ba, ba be ba e-⁠na le tswalano ya kgaufsi le tatago bona wa moya e lego Eliya. (2 Dikxoši 2:​3, 5, 7, 15-17) Lega go le bjalo, e le mohlatlami yo a tloditšwego, Elisa e be e le wa mathomo gare ga barwa ba Eliya ba moya​—o be a le bjalo ka leitšibulo. Isiraeleng ya bogologolo, morwa wa kgonthe wa leitšibulo o be a amogela dikarolo tše pedi tša bohwa bja tatagwe, mola yo mongwe le yo mongwe wa barwa ba ba šetšego a be a amogela karolo e tee. Ka gona, Elisa o kgopetše dikarolo tše pedi tša bohwa bja moya bja Eliya.

Ke ka baka la’ng Elisa a ile a dira kgopelo ye ka nako yeo? Ke ka gobane o be a le kgaufsi le go rwala boikarabelo bjo bogolo​—bja go hlatlama Eliya e le moporofeta wa Isiraele. Elisa o lemogile gore, e le gore a phethagatše boikarabelo bjo bo lego mabapi le kabelo ye e boifišago, o be a nyaka matla a moya a fetago bokgoni bja gagwe, matla ao e lego Jehofa feela a bego a ka kgona go a nea. O be a swanetše go se boife go swana le ge Eliya a be a sa boife. (2 Dikxoši 1:​3, 4, 15, 16) Ka gona, o ile a kgopela dikarolo tše pedi tša moya wa Eliya, moya wa sebete le wa go ‘galefa a lwela Morena’​—dika tše dibotse tša go tšweletšwa ka moya wa Modimo. (1 Dikxoši 19:​10, 14) Eliya o ile a arabela bjang?

Eliya o be a tseba gore Elisa o kgopetše selo se sengwe seo a bego a se na matla a go mo nea sona, eupša e le Modimo feela yo a ka kgonago go se nea. Ka gona Eliya ka boipoetšo o ile a araba: “O kxopetše selô se sethata; fêla, di tlo Xo tlêla xe O mpôna kè tlošwa xo wene; di ka se kê tša Xo tlêla kè sešo ka tloxa.” (2 Dikxoši 2:​10) Ka kgonthe, Jehofa o ile a dumelela Elisa go bona Eliya a rotoga ka ledimo. (2 Dikxoši 2:​11, 12) Elisa o ile a newa seo a bego a se kgopetše. Jehofa o mo file moya wo a bego a o nyaka go thoma kabelo ya gagwe e mpsha le go lebeletšana le diteko tše di tlago.

Lehono, Bakriste ba tloditšwego (bao ka dinako tše dingwe ba bitšwago sehlopha sa Elisa) le bahlanka ba Modimo ka kakaretšo ba ka hwetša kgothatšo e kgolo go tšwa kanegelong ye ya Beibele. Ka dinako tše dingwe, re ka nolega moko le go ikwa re sa swanelegele kabelo e mpsha, goba re ka kwa re felelwa ke sebete sa go tšwela pele ka modiro wa rena wa boboledi bja Mmušo ge re lebeletšana le bao ba re hlokomologago goba kganetšo tšhemong ya gabo rena. Lega go le bjalo, ge e ba re kgopela thušo go Jehofa, o tla re nea moya o mokgethwa ka ge re o nyaka gore re lebeletšane le ditlhohlo le maemo a feto-fetogago. (Luka 11:​13; 2 Ba-Korinthe 4:⁠7; Ba-Filipi 4:​13) Ee, bjalo ka ge Jehofa a ile a matlafaletša Elisa go rwala boikarabelo bja gagwe bjo bogolo kudu, o tla re thuša ka moka ga rena, ba bagolo le ba banyenyane, go phetha bodiredi bja rena.​—2 Timotheo 4:⁠5.