O be a Rata Botho

MILTON G. HENSCHEL yo e bilego setho sa nako e telele sa Sehlopha se Bušago sa Dihlatse tša Jehofa, o feditše tsela ya gagwe ya lefaseng ka Mokibelo, March 22, 2003. O be a e-⁠na le nywaga e 82.

Ge e be e le lesogana, Milton Hen­schel o ile a tlatša bašomi ba ntlong-kgolo ya Dihlatse tša Jehofa gomme a hlankela ka potego ka nywaga e fetago 60. Go se go ye kae o ile a tsebja ka kahlolo ya gagwe e botse le ka go ba le kgahlego ya kgonthe modirong wa go bolela ka Mmušo. Ka 1939 o ile a ba mongwaledi wa N. H. Knorr, yoo ka nako yeo e bego e le molebeledi wa lefapha la go gatiša la Brooklyn la Dihlatse tša Jehofa. Ge Ngwanabo rena Knorr a be a thoma go eta pele Dihlatse lefaseng ka bophara ka 1942, o ile a tšwela pele a dirile Ngwanabo rena Henschel mothuši wa gagwe. Ngwanabo rena Henschel o ile a nyala Lucille Bennett ka 1956, gomme ba ile ba abelana gotee mathabo le ditlhohlo tša bophelo.

Ngwanabo rena Henschel o ile a šoma kgaufsi le Ngwanabo rena Knorr go fihlela lehung la Knorr ka 1977. Ngwanabo rena Henschel o ile a sepela gotee le Ngwanabo rena Knorr go ya dinageng tša ka godimo ga tše 150, ba etela le go kgothatša Dihlatse tša Jehofa lefaseng ka bophara, kudu-kudu baromiwa le bao ba lego diofising tša makala. Ka dinako tše dingwe maeto a bjalo a be a lapiša e bile a le kotsi. Ka 1963 ge a be a le kopanong ya kua Liberia, Ngwanabo rena Henschel o ile a ba mohlaselwa wa tlaišo e šoro ka baka la go gana ga gagwe go tšea karolo tirelong ya borata-naga. * A sa boife, Ngwanabo rena Hen­schel o ile a boela Liberia gape dikgwedi tše sego kae ka morago go ya go kopana le mopresidente wa naga le go nyaka tokologo e oketšegilego ya borapedi bja Dihlatse tša Jehofa fao.

Ge a be a rarolla mathata a magolo le ditlhohlo, Ngwanabo rena Henschel o be a tsebja ka go dira diphetho tše di šomago, e le yo a feto-fetogago le maemo gomme e le yo a leka-lekanego. Bašomi-gotee le yena ba be ba rata kudu go ba ga gagwe le thulaganyo, boipoetšo bja gagwe gotee le go ba le metlae. Ka ge a be a šegofaditšwe ka go gopola dilo, o ile a thabiša baromiwa lefaseng ka bophara ka go gopola maina a bona kapejana, go bolela polelwana e tee goba tše pedi ka leleme la lefelong leo gotee le go bapala ka mantšu​—e lego seo a bego a se bolela ka go myemyela.

Mika 6:⁠8 e re gopotša gore Jehofa Modimo o nyaka gore re ‘rate botho.’ Milton Henschel o tla gopolwa ka go bea mohlala tabeng yeo. Go sa šetšwe go ba ga gagwe le boikarabelo bjo bogolo, o ile a dula e le yo a batamelegago, yo bonolo le yo botho. O be a rata gore, “Ge o dira phetho ya kamoo o ka swaraganago le boemo ka gona, gopola gore selo se botho ke sona se se nepagetšego.” Ge re dutše re llišwa ke go lahlegelwa ke ngwanabo rena yo yo a rategago, re thabela gore o ile a kgotlelela ka potego go fihla bofelong, a kgonthišegile ka go amogela moputso wa gagwe, “mphapahlôxô wa bophelô.”​—Kutollo 2:⁠10.

M. G. Henschel a e-⁠na le N. H. Knorr

A e-⁠na le mosadi wa gagwe Lucille