Bahlanka ba Jehofa ba na le Kholofelo ya Kgonthe

“Mašalêla a ba Jakobo, à le xare xa dithšaba tše di ntši, a tlo etša phoka ye e tšwaxo xo Morêna, . . . è sa letêle [“holofele,” NW] motho.”​—MIKA 5:⁠6.

1. Ke bjang Isiraele ya moya e lego mothopo wa tapološo?

JEHOFA ke Modiri yo mogolo wa pula le phoka. Ke ga lefeela go holofela gore batho ba tla tliša phoka goba pula. Moporofeta Mika o ngwadile gore: “’Me mašalêla a ba Jakobo, à le xare xa dithšaba tše di ntši, a tlo etša phoka ye e tšwaxo xo Morêna, a tlo etša pula mabyanyeng, ye e naxo è sa lebêlêlwe, è sa letêle motho.” (Mika 5:⁠6) “Mašalêla a ba Jakobo” a mehleng yeno ke bomang? Ke ba-Isiraele ba moya, mašaledi a “ba-Isiraele ba Modimo.” (Ba-Galatia 6:​16) Go “dithšaba tše di ntši” tša lefase, ba bjalo ka “phoka ye e tšwaxo xo Morêna” yeo e lapološago le “pula mabyanyeng.” Ee, Bakriste ba tloditšwego lehono ke tšhegofatšo e tšwago go Modimo bathong. Ka ge e le bagoeledi ba Mmušo, ba dirišwa ke Jehofa go nea batho molaetša wa gagwe wa kholofelo ya kgonthe.

2. Ke ka baka la’ng re e-⁠na le kholofelo ya kgonthe go sa šetšwe gore re phela lefaseng le la mathata?

² Ga se ra swanela go makatšwa ke gore lefase le le hlaelelwa ke kholofelo ya kgonthe. Go se tsepame ga tša dipolitiki, go goboga boitshwarong, bosenyi, mathata a tša boiphedišo, botšhošetši le dintwa​—re letetše dilo tše bjalo lefaseng leo le bušwago ke Sathane Diabolo. (1 Johane 5:​19) Ba bantši ba boifišwa ke seo bokamoso bo ka bago bo se hupere. Lega go le bjalo, ka ge re le barapedi ba Jehofa ga re boife ka gobane re na le kholofelo e kgonthišeditšwego ya bokamoso. Ke kholofelo ya kgonthe ka gobane e theilwe Lentšung la Modimo. Re na le tumelo go Jehofa le Lentšung la gagwe ka gobane seo a se bolelago ka mehla se a phethagala.

3. (a) Ke ka baka la’ng Jehofa a be a tlo gata mogato malebana le Isiraele le Juda? (b) Ke ka baka la’ng mantšu a Mika a šoma lehono?

³ Boporofeta bjo bo buduletšwego ke Modimo bja Mika bo re matlafaletša go sepela ka leina la Jehofa gomme bo re nea motheo wa kholofelo ya kgonthe. Lekgolong la boseswai la nywaga B.C.E., ge Mika a be a porofeta, batho ba Modimo ba kgwerano ba be ba arogantšwe ka ditšhaba tše pedi​—Isiraele le Juda​—gomme bobedi bja tšona di be di hlokomologile kgwerano ya Modimo. Mafelelo e bile go goboga boitshwarong, bohlanogi bja bodumedi le go rata dilo tše di bonagalago ka mo go feteletšego. Lega go le bjalo, Jehofa o ile a lemoša gore o tla di gatela mogato. Go ba gona, ditemošo tša Modimo di be di lebišitšwe bathong ba mehleng ya Mika. Lega go le bjalo, boemo bja mehleng yeno bo swana kudu le bja nakong ya Mika moo e lego gore mantšu a gagwe a a šoma le gona bjale. Se se tla ba molaleng ge re dutše re ahla-ahla tše dingwe tša dintlha tše dikgolo tša dikgaolo tše šupago tša puku ya Mika.

 Seo Kakaretšo ya Puku ya Mika e se Utollago

4. Mika kgaolo 1 go ya go 3 e nea tsebišo efe?

⁴ Anke re lebeleleng ka bokopana dikagare tša puku ya Mika. Go kgaolo 1, Jehofa o pepentšha borabele bja Isiraele le Juda. Ka baka la go se kwe ga yona, Isiraele e tla fedišwa gomme kotlo ya Juda e tla fihla gaešita le dikgorong tša Jerusalema. Kgaolo 2 e utolla gore bahumi le batho ba matla ba gatelela bao ba fokolago le bao ba hlokago thušo. Lega go le bjalo, go na le kholofelo e tšwago go Modimo. Batho ba Modimo ba tla kgobokanywa ka botee. Kgaolo 3 e bega ka dikahlolo tša Jehofa malebana le baetapele ba setšhaba le baporofeta bao ba sa kwego. Baetapele ba kgopamiša toka gomme baporofeta ba bolela maaka. Go sa šetšwe se, Mika o newa matla ke moya o mokgethwa gore a tsebatše kotlo ya Jehofa e tlago.

5. Kgwekgwe ya Mika kgaolo 4 le 5 ke efe?

⁵ Kgaolo 4 e bolela e sa le pele gore bofelong bja mabaka, ditšhaba ka moka di tlo tla thabeng e phagamego ya ntlo ya Jehofa gore di rutwe ke yena. Pele ga moo, Juda e tla išwa bothopša Babele eupša Jehofa o tla e phološa. Kgaolo 5 e utolla gore Mesia o tla belegelwa Betlelehema ya Juda. O tla diša batho ba gagwe gomme o tla ba phološa ditšhabeng tša bagateledi.

6, 7. Ke dintlha dife tšeo di bolelwago go dikgaolo 6 le 7 tša boporofeta bja Mika?

⁶ Mika kgaolo 6 e bega ka ditatofatšo tša Jehofa malebana le batho ba gagwe ka sebopego sa tsheko ya molao. O dirile’ng seo se bakilego gore batho ba gagwe ba rabele? Ga se a dira selo. Ge e le gabotse, dilo tše a di nyakago ke tšeo di kwagalago. O nyaka gore barapedi ba gagwe ba bonagatše toka gomme ba be botho gotee le go ba le boipoetšo ge ba dutše ba sepela le yena. Go e na le go dira seo, Isiraele le Juda di ile tša latela tsela ya borabele gomme tša swanelwa ke go lebeletšana le ditla-morago tša seo.

⁷ Kgaolong ya mafelelo ya boporofeta bja gagwe, Mika o sola bokgopo bja batho ba mehleng ya gagwe. Lega go le bjalo, ga se a ka a nyama pelo ka gobane o be a ikemišeditše go “bontšha boemo bja kgopolo bja go letela” Jehofa. (Mika 7:⁠7, NW) Puku ye e phetha ka mantšu ao a bontšhago kholofelo ya gore Jehofa o tla bontšha kgaugelo bathong ba gagwe. Histori e hlatsela gore kholofelo ye e ile ya phethagatšwa. Ka 537 B.C.E., ge Jehofa a be a feditše go  laya batho ba gagwe, ka kgaugelo o ile a bušetša mašaledi nageng ya ona.

8. O be o ka akaretša bjang dikagare tša puku ya Mika?

⁸ A tsebišo e botse gakaakang yeo Jehofa a e utollago ka Mika! Puku ye e buduletšwego e nea mehlala ya temošo ya kamoo Modimo a dirišanago ka gona le bao ba ipolelago gore ba a mo hlankela eupša ba sa botege. E bolela e sa le pele ka ditiragalo tšeo di diregago lehono. Le gona e nea keletšo e tšwago go Modimo ya kamoo re swanetšego go itshwara ka gona mehleng ye e thata e le gore re matlafatše kholofelo ya rena.

Morena yo a Phagamego Jehofa o a Bolela

9. Go ya ka Mika 1:⁠2, Jehofa o be a tla dira’ng?

⁹ Ga bjale anke re hlahlobeng puku ya Mika ka mo go nabilego. Go Mika 1:⁠2 re bala gore: “Hee lena dithšaba, kwang ka moka xa lena! Hee wêna lefase, le tšohle tše di lexo mo xo lôna, theetšang! Hlatse ye Le lebanexo nayô’ ké Morêna Mong ’a bohle à le mo Ntlong e kxêthwa y’axwe.” Ge nkabe o phetše mehleng ya Mika, ka ntle le pelaelo mantšu ao a ka ba a ile a tanya tlhokomelo ya gago. Ka kgonthe, a tanya tlhokomelo ya gago ka gobane Jehofa o bolela a le tempeleng ya gagwe e kgethwa gomme ga a bolele feela le Isiraele le Juda eupša o bolela le batho kae le kae. Mehleng ya Mika, batho ba ile ba hlokomologa Morena yo a Phagamego Jehofa ka nako e telele. Kgaufsinyane seo se be se tla fetoga. Jehofa o be a ikemišeditše go gata mogato wa makgaola-kgang.

10. Ke ka baka la’ng mantšu a Mika 1:⁠2 a le bohlokwa go rena?

¹⁰ Se se swanago ke sa therešo mo mehleng ya rena. Kutollo 14:​18-20 e bontšha gore Jehofa o bolela gape a le tempeleng ya gagwe e kgethwa. Kgaufsinyane o tla gata mogato wa makgaola-kgang gomme ditiragalo tše bohlokwa di tla tšhoša batho gape. Mo nakong ye, ‘morara o kgopo wa lefase’ o tla tsenywa bofotlelong bjo bogolo bja bogale bja Jehofa go fihlela phedišong ya tshepedišo ya Sathane ya dilo.

11. Ke’ng seo se bolelwago ke mantšu a Mika 1:​3, 4?

¹¹ Theetša seo Jehofa a tlago go se dira. Mika 1:​3, 4 e re: “Tsebang xobane Morêna ó tlo tšwa felô xa xaxwe, ó tlo foloxa a xata dirwaolô tša lefase. Xe a xata, dithaba di tlo toloxa, meedi e tlo fatoxa, xwa tlo etša mola moti ò le mollong, meetse xe a thšoloxêla leribeng.” Na Jehofa o tla tloga bodulong bja gagwe bja legodimong gomme a gate dithaba le meedi ya Nageng ya Kholofetšo ka tsela ya kgonthe? Aowa. Ga go hlokagale gore a dire bjalo. O tla fo swanelwa ke go lebiša tlhokomelo ya gagwe lefaseng gore thato ya gagwe e phethagatšwe. Go feta moo, badudi ba naga ke bona ba tlago go tlaišwa ke dilo tšeo di hlalositšwego, e sego naga ka boyona. Ge Jehofa a gata mogato, mafelelo e tla ba a boifišago go bao ba sa botegego​—bjalo ka ge eka dithaba di tologile go swana le mmotu gomme meedi e fatotšwe ke tšhišinyego ya lefase.

12, 13. Ka go dumelelana le 2 Petro 3:​10-12, ke’ng seo se šireletšago kholofelo ya rena?

¹² Mohlomongwe mantšu a boporofeta a Mika 1:​3, 4 a ka go gopotša ka boporofeta bjo bongwe bjo bo buduletšwego bjo bo boletšego e sa le pele ka ditiragalo tša masetla-pelo tšeo di tlago go direga lefaseng. Go etša ge go begilwe go 2 Petro 3:​10, moapostola Petro o ngwadile gore: “’Tšatši leo la Morêna le tlo tla bo-ka lehodu le-tla-bošexo; xomme ka lôna maxodimo a tlo široxa ka lešata la modumô o moxolo; xomme tše lefase le bopilwexo ka tšôna di tlo fedišwa ke mollô, xwa tlo fsa xwa fêlêla lefase le medirô ka moka e lexo mo xo lôna.” Ka go swana le boporofeta bja Mika, mantšu a Petro ga a šupe go magodimo a kgonthe le lefase la kgonthe. A šupa masetla-pelong a magolo ao a tlelago tshepedišo ye ya dilo ya go se boife Modimo.

¹³ Go sa šetšwe kotsi yeo e tlago, Bakriste ba ka kgodišega ka bokamoso go swana le ge Mika a be a kgodišegile. Bjang? Ka go latela keletšo yeo e hwetšwago ditemaneng tše di latelago tša lengwalo la Petro. Moapostola o re: “Xo swanetše ruri-ruri xe Le le ba xo swara ka tsela e kxêthwa ya borapedi, Lè le ba xo letêla le xo phafoxêla xo tla xa letšatši leo la Modimo.” (2 Petro 3:​11, 12) Kholofelo ya rena ka bokamoso e tla ba e kgonthišeditšwego ge e ba re hlagolela go ba le pelo e kwago le go kgonthišetša gore boitshwaro bja rena ke bjo bokgethwa gotee le gore bophelo bja rena bo tladitšwe ka ditiro tša boineelo go  Modimo. E le gore re šireletše kholofelo ya rena, re swanetše go gopola gape gore letšatši la Jehofa le tla tla e le ka kgonthe.

14. Ke ka baka la’ng Isiraele le Juda di be di swanelwa ke kotlo?

¹⁴ Jehofa o hlalosa lebaka leo ka lona batho ba gagwe ba bogologolo ba bego ba swanelwa ke go otlwa. Mika 1:⁠5 e re: “Tšé ka moka di tla ka phapoxô ya Jakobo, le ka dibe tša moloko wa Isiraele. Diphapoxô tša Jakobo è sa le tše fe, xe e se tša Samaria? ’Me meboto ya medimo ya Juda e kae, xe e se Jerusalêma?” Isiraele le Juda di bile gona ka baka la Jehofa. Lega go le bjalo, di ile tša rabela malebana le yena, gomme borabele bja tšona bja fihla gaešita le metse-mešateng ya tšona e lego Samaria le Jerusalema.

Mekgwa e Kgopo e Ile ya Ata

15, 16. Batho ba mehleng ya Mika ba be ba e-⁠na le molato wa ditiro dife tše kgopo?

¹⁵ Mohlala wa bokgopo bja batho ba mehleng ya Mika o hlalositšwe ka mo go kwagalago go Mika 2:​1, 2: “Kotsi e tlo wêla bao, ba e rexo bà le malaong, ba eleletša bobe, ba bo phêtha ka moswana, ka xe ba na le matla xo bo dira. Ba duma mašemo, ’me ba a utswa; ba kxanyoxa nywakô, ba tla ba e tšea; motho le lapa la xaxwe ké tša xo tšewa ka šiši ke bôná.”

¹⁶ Batho ba megabaru ba be ba lala ba phafogile bošego ba loga maano a kamoo ba ka thopago mašemo le nywako ya baagišani ba bona. Mesong ba be ba akgofela go phetha maano a bona. Ba be ba ka se dire ditiro tše bjalo tše kgopo ge nkabe ba be ba gopola kgwerano ya Jehofa. Molao wa Moše o be o na le ditokišetšo tša go šireletša badiidi. Ka tlase ga ona, go be go se na lapa leo le bego le swanetše go lahlegelwa sa ruri ke thoto ya lona ya bohwa. Lega go le bjalo, seo ga se sa tshwenya batho bao ba megabaru. Ba ile ba hlokomologa mantšu a Lefitiko 19:​18 ao a rego: “Wa xeno O mo ratê ka mokxwa wo O ithataxo ka wôna.”

17. Ke’ng seo se ka diregago ge bao ba ipolelago gore ba hlankela Modimo ba bea dilo tše di bonagalago pele bophelong?

¹⁷ Se se bontšha seo se ka diregago ge batho bao ba ipolelago gore ba hlankela Modimo ba lahlegelwa ke pono ya dipakane tša moya gomme ba tsoma dilo tše di bonagalago pele. Paulo o ile a lemoša Bakriste ba mehleng ya gagwe gore: “Ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong.” (1 Timotheo 6:⁠9) Ge motho a dira gore go hwetša tšhelete e be pakane ya gagwe e kgolo bophelong, ge e le gabotse o rapela modimo wa maaka​—Mamona goba Mahumo. Modimo yoo wa maaka ga a nee kholofelo e kgonthišeditšwego ka bokamoso.​—Mateo 6:⁠24.

18. Go be go tla direga’ng ka batho bao ba ratago dilo tše di bonagalago ba mehleng ya Mika?

¹⁸ Ba bantši mehleng ya Mika ba ile ba ithuta ka phihlelo e bohloko gore go ithekga ka dilo tše di bonagalago ke lefeela. Go ya ka Mika 2:⁠4 “Mohla woo ba tlo Le hlabêla koša, ba lla sellô se se rexo: Re šaraketšwe wa xo šarakêlwa. Maxaê a xešo ó a phekxotše. A xa ke a hlakolwa! Mašemo a rena ó a aroletše bahlanoxi.” Ee, mahodu ao a go utswa magae le mašemo a ile a lahlegelwa ke bohwa bja malapa a ona. A ile a rakelwa nageng ya bašele gomme dithoto tša ona di ile tša thopša ke “bahlanoxi” goba batho ba ditšhaba. Dikholofelo ka moka tša bokamoso bjo bo atlegilego di ile tša folotša.

19, 20. Ke’ng seo se ilego sa diragalela ba-Juda bao ba bego ba bota Jehofa?

¹⁹ Lega go le bjalo, kholofelo ya bao ba botago Jehofa e ka se ke ya folotša. Jehofa o botegela dikgwerano tša gagwe tšeo a di dirilego le Aborahama le Dafida, gomme o na le kgaugelo go bao ka go swana le Mika ba mo ratago le go nyamišwa ke go aroga ga magagabo bona go Modimo. Go be go tla ba le go tsošološwa ka nako ya Modimo e swanetšego bakeng sa bao ba lokilego.

²⁰ Seo se diregile ka 537 B.C.E., ka morago ga go wa ga Babele le nakong ya ge mašaledi a ba-Juda a boa nageng ya gabo ona. Ka nako yeo, mantšu a Mika 2:​12 a bile le phethagalo ya mathomo. Jehofa o itše: “Ke tlo le kxobêla ruri, lena ba xa-Jakobo, ka moka xa lena. Ke tlo bá ka phuta mašalêla a Isiraele ka moka [ka botee, NW], ka ba dira dinku tša lešaka,  mohlape mo phulong ya wôna, mabotho-botho a batho.” Jehofa ke yo lerato gakaakang! Ka morago ga go laya batho ba gagwe, o ile a dumelela mašaledi go boa le go mo hlankela nageng yeo a e neilego bo-rakgolokhukhu ba bona.

Go Swana mo go Makatšago le ga Mehleng ya Rena

21. Maemo a mehleng yeno a bapišwa bjang le a mehleng ya Mika?

²¹ Ge re be re dutše re ahla-ahla dikgaolo tše pedi tša mathomo tša Mika, na o makaditšwe ke kamoo dilo e lego tše swanago le lehono? Ka go swana le mehleng ya Mika, ba bantši lehono ba ipolela gore ba hlankela Modimo. Lega go le bjalo, ka go swana le Juda le Isiraele, ke bao ba aroganego e bile ba ile ba lwantšhana. Ba bantši bao ba humilego Bojakaneng ba gateletše badiidi. Baetapele ba bantši ba bodumedi ba amogela mekgwa yeo e ganetšwago ka go lebanya ka Beibeleng. Ga go makatše gore kgaufsinyane Bojakane bo tla fedišwa gotee le ‘Babele yo Mogolo,’ e lego mmušo wa lefase wa bodumedi bja maaka! (Kutollo 18:​1-⁠5) Lega go le bjalo, ka go latela mohlala wa mehleng ya Mika, Jehofa o tla ba le bahlanka ba botegago bao ba tlago go šala mo lefaseng.

22. Ke dihlopha dife tše pedi tšeo di beilego kholofelo ya tšona Mmušong wa Modimo?

²² Ka 1919, Bakriste ba botegago bao ba tloditšwego ba ile ba itokolla ka mo go feletšego Bojakaneng gomme ba thoma go tsebatša ditaba tše dibotse tša Mmušo ditšhabeng ka moka. (Mateo 24:​14) Sa pele, ba ile ba tsoma mašaledi a Isiraele ya moya. Ke moka go ile gwa thoma go kgoboketšwa “dinku tše dingwê,” gomme dihlopha ka bobedi di ile tša ba “mohlape o tee le modiši o tee.” (Johane 10:​16) Gaešita le ge gona bjale ba hlankela Modimo dinageng tše 234, barapedi ba ka moka bao ba botegago ba Jehofa ba ‘boteeng’ e le ka kgonthe. Mo nakong ye, lešaka la dinku ke la “mabotho-botho a batho,” gotee le basadi le bana. Kholofelo ya bona ga e tshepedišong ye ya dilo, eupša e Mmušong wa Modimo woo kgaufsinyane o tla lebišago lefaseng la paradeise.

23. Ke ka baka la’ng o kgodišegile gore kholofelo ya gago ke ya kgonthe?

²³ Temana ya mafelelo ya Mika kgaolo 2 (PK) e bolela mabapi le barapedi ba botegago ba Jehofa gore: “Kgoši ya bona e tlo ba eta pele, Jehofa e be wa ntlha go bona.” Na o ipona o le molokelokeng woo wa phenyo, o latela Kgoši ya gago Jesu Kriste, gomme Jehofa ka boyena a eteletše pele? Ge e ba go le bjalo, o ka kgodišega gore phenyo ke ya kgonthe gomme kholofelo ya gago e kgonthišeditšwe. Se se tla ba molaleng kudu ge re dutše re ahla-ahla dintlha tše dingwe tše dikgolo tša boporofeta bja Mika.

Boporofeta bja Mika bo ka re matlafatša moyeng

Ka go swana le mašaledi a ba-Juda ka 537 B.C.E., ba-Isiraele ba moya le bagwera ba bona ba godiša borapedi bja therešo

O be o tla Araba Bjang?

• Ke ka baka la’ng mehleng ya Mika Jehofa a ile a phetha ka go gata mogato malebana le Juda le Isiraele?

• Ke’ng seo se ka diregago ge bao ba bolelago gore ba hlankela Modimo ba bea dikgahlego tša dilo tše di bonagalago pele bophelong?

• Ka morago ga go ahla-ahla Mika kgaolo 1 le 2, ke ka baka la’ng o kgodišegile gore kholofelo ya gago ke ya kgonthe?