Lefase ka Moka le Fedišitšwe!

Lebelela lefase leo le go dikologilego, le metse ya lona e megolo, ditšo tša lona, dilo tša thutamahlale tšeo le di fihleletšego le badudi ba lona ba dimilione tše dikete. Go bonolo go kgahlišwa ke go bonagala ga lona e le la ka mo go sa felego, na ga go bjalo? Na o nagana gore letšatši le lengwe lefase le le tla nyamelela ka mo go sa felego? Go ka ba thata go nagana seo. Lega go le bjalo, na o be o tseba gore go ya ka mothopo o botwago kudu, lefase leo le bilego gona pele ga le le ile la fedišwa ka mo go sa felego?

GA RE bolele ka lefase la meloko ya bogologolo. Lefase leo le ilego la fedišwa le be le hlabologile, le na le metse e megolo, le fihleletše dilo tša bokgabo le tsebo ya tša thutamahlale. Lega go le bjalo, pego ya Beibele e re botša gore ka go panya ga leihlo, ka di-17 tša kgwedi ya bobedi, nywaga e 352 pele ga ge mopatriareka Aborahama a ka belegwa, meetse-fula ao a ilego a gogola lefase ka moka a ile a thoma.

Na pego yeo e nepagetše? Na selo se bjalo se ile sa direga e le ka kgonthe? Na go be go e-na le lefase la bogologolo pele ga le la gona bjale leo le ilego la atlega ke moka la fedišwa? Ge e ba go le bjalo, ke ka baka la’ng le ile la fela? Go be go senyegile kae? Gomme na go na le thuto yeo re ka e hwetšago phedišong ya lona?

 Na Lefase la Bogologolo le Ile la Fedišwa e le ka Kgonthe?

Masetla-pelo a bjalo a magolo ge e ba a bile gona e le ka kgonthe, a be a ka se tsoge a lebetšwe ka mo go feletšego. Lega go le bjalo, ditšhabeng tše dintši go na le dikgopotšo tša phedišo yeo. Ka mohlala, ela hloko letšatši-kgwedi la go lebanya leo le begilwego ka Mangwalong. Kgwedi ya bobedi ya almanaka ya bogologolo e be e thoma go seo ga bjale e lego bogareng bja October go fihla bogareng bja November. Ka gona, letšatši la bo-17 le sepedišana le mo e ka bago letšatši la pele la November. Ka gona, e ka no se be go welana ga ditiragalo gore dinageng tše dintši, menyanya ya bahu e binwa ka nako yeo ya ngwaga.

Bohlatse bjo bongwe bja Meetse-fula bo šaletše ditšong tša batho. Mo e ka bago batho ka moka ba bogologolo ba na le nonwane ya gore bagologolo ba bona ba phologile meetse-fula a lefaseng ka bophara. Dikgopana tša Afrika, ma-Celt a Yuropa, ma-Inca a Amerika Borwaka moka ba na le dinonwane tše di swanago bjalo ka batho ba Alaska, Australia, China, India, Lithuania, Mexico, Micronesia, New Zealand le dikarolong tše dingwe tša Amerika Leboa, ge re bala tše sego kae feela.

Go ba gona, ge nako e dutše e feta dinonwane di ile tša kgabišwa, eupša ka moka ga tšona di akaretša ditaba tše mmalwa tšeo di bontšhago mothopo o swanago wa kanegelo: Modimo o ile a galefišwa ke bokgopo bja batho. O ile a tliša meetse-fula a magolo. Batho ka kakaretšo ba ile ba fedišwa. Lega go le bjalo, baloki ba sego kae ba ile ba phološwa. Ba ba ile ba aga sekepe seo batho le diphoofolo ba ilego ba phološwa ka sona. Ge nako e dutše e tšwela pele, dinonyana di ile tša romelwa ka ntle go ya go tsoma naga e omilego. Mafelelong, sekepe se ile sa ema thabeng. Ge ba tšwile, baphologi ba ile ba dira sehlabelo.

Se se hlatsela’ng? Go swana e ka se ke ya ba ga go welana ga ditiragalo. Bohlatse bjo bo kopantšwego bja dinonwane tše bo hlatsela bohlatse bja Beibele bja bogologolo bja gore batho ka moka ba tšwa go baphologi ba meetse-fula ao a ilego a fediša lefase ka moka la batho. Lega go le bjalo, ga se ra swanela go ithekga ka dinonwane bakeng sa go tseba seo se diragetšego. Re na le pego e bolokilwego ka kelohloko ka Mangwalong a Sehebere a Beibele.Genesi, dikgaolo 6-8.

Beibele e na le pego e buduletšwego ya histori yeo e yago morago kua mathomong a bophelo.  Lega go le bjalo, bohlatse bo bontšha gore ke selo se se fetago histori feela. Boporofeta bja yona bjo bo sa palelwego le bohlale bjo bo tseneletšego bo bontšha gore ke seo bo ipolelago go ba sonapoledišano ya Modimo le batho. Ka go se swane le dinonwane, Beibele e akaretša maina le matšatši-kgwedi gotee le tatelano ya ditaba tša lefase tša go latelana ga mašika le tša thutafase dipegong tša yona tša histori. E re nea seswantšho sa gore bophelo bo be bo le bjang pele ga Meetse-fula gomme e utolla lebaka leo lefase le ilego la fela ka mo go sa letelwago.

Go be go senyegile’ng ka setšhaba seo sa pele ga meetse-fula? Sehlogo se se latelago se ahla-ahla potšišo yeo. Ke potšišo ya bohlokwa bakeng sa bao ba ka bago ba ipotšiša gore bokamoso bja setšhaba sa gona bjale bo šireletšegile gakaakang.

[Mongwalo wa ka tlase]

Genesi 7:​11; 11:​10-25, 32; 12:4.

[Tšhate go letlakala 4]

Dinonwane tša Meetse-fula Lefaseng ka Bophara

NagaDilo tše di swanago12345678910

Gerika7◆◆◆◆◆◆◆

Roma6◆◆◆◆◆◆

Lithuania6◆◆◆◆◆◆

Asiria9◆◆◆◆◆◆◆◆◆

Tanzania7◆◆◆◆◆◆◆

India - ma-Hindu6◆◆◆◆◆◆

New Zealand - ma-Maori5◆◆◆◆◆

Micronesia7◆◆◆◆◆◆◆

Washington U.S.A. - ma-Yakima 7◆◆◆◆◆◆◆

Mississippi U.S.A. - ma-Choctaw7◆◆◆◆◆◆◆

Mexico - ma-Michoacan5◆◆◆◆◆

Amerika Borwa - ma-Quechua4◆◆◆◆

Bolivia - ma-Chiriguano5◆◆◆◆◆

Guyana - ma-Arawak6◆◆◆◆◆◆

1: Modimo o ile a galefišwa ke bokgopo

2: Phedišo ka Meetse-fula

3: A laetšwe ke Modimo

4: Temošo ya Modimo e ile ya newa

5: Batho ba sego kae ba ile ba phologa

6: Ba ile ba bolokega ka sekepeng

7: Diphoofolo di ile tša phološwa

8: Nonyana goba sephedi se sengwe se ile sa romelwa ka ntle

9: Mafelelong se ile sa ema thabeng

10: Ba ile ba nea sehlabelo ge ba se na go tšwa ka sekepeng