Mehlala e Mebotse​—Na e a go Hola?

“LA BÁ la ba dikxwadi [“mehlala,” PK] tša badumedi ka moka ba Matsedonia le ba Akaya.” Moapostola Paulo o ile a ngwalela Bakriste ba botegago bao ba bego ba dula Thesalonika mantšu a. Mohlala woo ba ilego ba o beela badumedi-gotee le bona e be e le wo o retegago e le ka kgonthe. Go sa dutše go le bjalo, ba-Thesalonika ka bobona ba be ba arabela mohlaleng woo Paulo le bagwera ba gagwe ba o beilego. Paulo o itše: “Ka xe Ebangedi ya rena e sa ka Ya Le tlêla ka polêlô fêla; e Le tletše ka matla le ka Môya-mokxêthwa ka mokxwa o kxodišaxo ruri, byalo ka xe Le tseba se re bexo re le sôna rè na le lena, le tše re di dirilwexo ka ’baka la lena, lena la tla la ba baetši ba rena.”​—1 Ba-Thesalonika 1:5-7.

Ee, Paulo o ile a dira se se fetago go fo nea dithero. Bophelo bja gagwe ka bobjona e be e le tutuetšo​—mohlala wa tumelo, kgotlelelo le boikgafo. Ka baka la se, Paulo le bagwera ba gagwe ba ile ba ba tutuetšo e matla maphelong a ba-Thesalonika, ba ba tutuetša gore ba amogele therešo ‘ka tlase ga tlaišego e kgolo.’ Lega go le bjalo, e be e se Paulo le badirišani ba gagwe feela bao e bego e le tutuetšo e botse go badumedi bao. Mohlala wa ba bangwe bao ba ilego ba kgotlelela tlaišego le wona e be e le kgothatšo. Paulo o ile a ngwalela ba-Thesalonika gore: “Lena Bana bešo, Le tšere ka mohlala wa diphuthêxô tšela tša naxeng ya Juda, e lexo tša Modimo ka Kriste Jesu; xobane le lena Le hlokofaditšwe ke ba sethšaba sa xeno ka mokxwa wo bala ba hlokofaditšwexo ka wôna ke Ba-Juda.”​—1 Ba-Thesalonika 2:14.

Kriste Jesu​—Mohlala o Mogolo

Gaešita le ge Paulo ka boyena a ile a bea mohlala wo o swanelwago ke go ekišwa, ga se a ka a tlogela go šupa Jesu Kriste e le mohlala o mogolo woo Bakriste ba swanetšego go o latela. (1 Ba-Thesalonika 1:6) Kriste e be e le Mohlala wa rena o mogolo e bile e sa dutše e le wona. Moapostola Petro o ngwadile gore: “Ké sôna se Le bileditšwexo sôna; xobane le Kriste ó tlaišitšwe ka ’baka la lena, a ba kêta-pele ya lena, xore Le tšeê ka mohlala wa xaxwe.”​—1 Petro 2:21.

Lega go le bjalo, Jesu o feditše bophelo bja gagwe e le motho nywaga e nyakilego go ba 2 000 e fetilego. Ga bjale o “axile seetšeng se se sa fihlelwexo,” e le sebopiwa sa moya seo se sa hwego. Ge a le bjalo, ke “yo xo sexo motho wa xo mmôna le xo ka mmôna.” (1 Timotheo 6:16) Ka gona, re ka mo ekiša bjang? Tsela e nngwe ke ka go ithuta dipego tše nne tša Beibele mabapi le bophelo bja Jesu. Diebangedi di nea temogo ka semelo sa gagwe, tsela ya bophelo le “kxopolô” ya gagwe. (Ba-Filipi 2:5-8) Temogo e oketšegilego e ka hwetšwa ka go ithuta ka kelohloko puku ya Motho yo a Phagamego Kudu yo a Kilego a Phela, yeo e hlalosago ditiragalo tša bophelo bja Jesu ka botlalo le ka tatelano ya tšona. *

Mohlala wa Jesu wa boikgafo o bile le tutuetšo e matla go moapostola Paulo. O ile a botša Bakriste ba ba-Korinthe gore: “Xomme nna nka ikxafa ka ipheletša, xore ke phološê meôya ya lena.” (2 Ba-Korinthe 12:15) A boemo bja kgopolo bjo bo swanago le bja Kriste gakaakang! Ge re dutše re naganišiša ka mohlala o phethagetšego wa Kriste, le rena ka mo go swanago re swanetše go tutueletšega go mo ekiša tseleng ya rena ka noši ya bophelo.

Ka mohlala, Jesu o re rutile gore re swanetše go ithekga ka kholofetšo ya Modimo ya go re hlokomela nameng. Eupša o dirile seo se fetago seo. O  ile a bontšha tumelo e bjalo gotee le kholofelo go Jehofa letšatši le letšatši. O itše: “Diphukubyê di na le melete, le dinonyana tša sebakeng di na le dihlaxá; xe e le Morwa-motho xa a na mo a kaxo samiša hlôxô.” (Mateo 6:25; 8:20) Na go tshwenyega ka dilo tše di bonagalago go buša monagano wa gago le ditiro tša gago? Goba na bophelo bja gago bo nea bohlatse bja gore o tsoma Mmušo pele? Le gona go thwe’ng ka boemo bja gago bja kgopolo mabapi le tirelo ya Jehofa? Na bo swana le bja Mohlala wa rena Jesu? Beibele e bontšha gore Jesu o be a sa bolele ka phišego feela eupša o ile a bontšha phišego e kgolo mabakeng a mantši. (Johane 2:14-17) Go oketša moo, a mohlala o mobotse gakaakang woo Jesu a o beilego ge go be go tliwa leratong! Ke ka baka leo a ilego a neela bophelo bja gagwe ka noši bakeng sa barutiwa ba gagwe! (Johane 15:13) Na o ekiša Jesu ka go bontšha lerato go bana beno ba Bakriste? Goba na o dumelela go se phethagale ga ba bangwe go šitiša lerato leo o ba ratago ka lona?

Ge re dutše re phegelela go latela mohlala wa Kriste, re tla fela re foša. Eupša ka mo go sa belaetšego Jehofa o kgahlišwa ke maiteko a rena ao re a dirago a ‘go apara Morena Jesu Kriste.’​—Ba-Roma 13:14.

“Mehlala go Mohlape”

Na lehono ka phuthegong go na le batho bao ba ka dirago e le mehlala go rena? Ka kgonthe ba gona! Banababo rena bao ba lego maemong ao ba a kgethetšwego a boikarabelo ba swanetše go bea mohlala kudu. Paulo o ile a botša Tito yo a bego a hlankela diphuthego tša Kereta le yo a bego a kgetha balebeledi, gore mogolo yo mongwe le yo mongwe yo a kgethilwego e swanetše go ba ‘monna yo a se nago bosodi.’ (Tito 1:5, 6) Moapostola Petro ka mo go swanago o ile a eletša “ba e lexo ba baxolo” gore e be “mehlala go mohlape.” (1 Petro 5:1-3, bapiša le NW.) Go thwe’ng ka bao ba hlankelago e le bahlanka ba bodiredi? Le bona ka mo go swanago e swanetše go ba “ba ba dirilexo modirô wó xa-botse.”​—1 Timotheo 3:13.

Ee, ga se mo go kwalago go letela gore mogolo yo mongwe le yo mongwe goba mohlanka wa bodiredi o tla ba le bokgoni ka mo go kgethegilego sebopegong se sengwe le se sengwe sa bodiredi bja Bokriste. Paulo o ile a botša Bakriste kua Roma gore: “Re ba ba filwexo dineô tše di sa swanexo; di ya ka kxauxêlô ye re e neilwexo.” (Ba-Roma 12:6) Banababo rena bao ba sa swanego ba na le bokgoni dikarolong tše di sa swanego. Ga se mo go kwagalago go letela gore bagolo ba tla dira le go bolela selo se sengwe le se sengwe ka mokgwa o phethagetšego. Beibele go Jakobo 3:2 e re: “Re ba xo foša xa-ntši ka moka xa rena. Xe xo ka ba le e a sa fošexo ka leleme, yêna-eo ké monna yo bolô-ka- tlalô, e a kxônaxo xo buša mmele wa xaxwe ka moka ka moxala.” Lega go le bjalo, go sa šetšwe go se phethagale ga bona, go swana le Timotheo bagolo e sa dutše e ka ba “[mehlala go] badumedi xo boleleng le mekxweng le leratong . . . le tumêlong, le ka mokxwa-mokxêthwa.” (1 Timotheo 4:12) Ge bagolo ba dira bjalo, bao ba lego mohlapeng ba tla fo diriša keletšo ya Ba-Hebere 13:7 yeo e rego: “Xopolang baruti ba lena, . . . Le bônê pheletšô ya tsela ya bôná, Le etšê bôná ka tumêlô.”

Mehlala e Mengwe ya Mehleng Yeno

Nywaga-someng e sego kae e fetilego, ba bangwe bao ba sa balegego ba ile ba ipontšha e le mehlala e mebotse. Go thwe’ng ka baromiwa ba dikete bao ba ikgafilego bao ba ‘tlogetšego malapa a gabo bona, bana babo bona goba dikgaetšedi, goba bo-tatago bona goba bo-mmago bona, goba bana goba mašemo’ bakeng sa go phethagatša thomo ya Bokriste mašemong a šele? (Mateo 19:29) Gape, ela hloko balebeledi ba basepedi gotee le basadi ba bona, banna le basadi bao ba hlankelago e le baithapi diofising tša Mokgatlo wa Watch Tower le babulamadibogo bao ba hlankelago diphuthegong. Na mehlala e bjalo e ka tutuetša ba bangwe? Moebangedi yo mongwe wa Mokriste kua Asia o gopola moromiwa yo a alogilego sehlopheng sa boseswai sa Sekolo sa Beibele sa Watchtower sa Gilead. O boletše gore ngwanabo rena yo yo a botegago o be a “ikemišeditše go lebeletšana le metšhitšhi ya menang le monola o gatelelago. . . . Selo seo se bego se kgahliša kudu gape e be e le bokgoni bja gagwe bja go nea dithero bobedi ka leleme la se-China  le la se-Malay gaešita le ge a be a e-tšwa Engelane.” Mafelelo a mohlala wo o mobotse e bile afe? Ngwanabo rena o itše: “Go fola ga gagwe le kgodišego ya gagwe di ile tša ntutuetša gore ke nyake go ba moromiwa ge ke gola.” Ke mo go sa makatšego gore ngwanabo rena yo o ile a ba moromiwa.

Watch Tower Publications Index e na le lelokelelo le letelele la diphihlelo tšeo di tšwelelago ka dimakasineng tša Morokami le Phafoga! Diphihlelo tše di anega ka batho bao ba ilego ba lahla mediro ya bona ya bophelo ka moka ya lefase le dipakane tša gona, ba fenya mafokodi, ba dira diphetogo tše di bonagalago semelong, ba kgomarela tshekamelo e nepagetšego ge ba lebane le bonaba gomme ba laetša mafolofolo, kgotlelelo, potego e sa kwanantšhego, boikokobetšo le moya wa boikgafo. Mmadi yo mongwe o ile a ngwala mabapi le dipego tše gore: “Di ntira gore ke be Mokriste yo a ikokobeditšego kudu le yo a lebogago kudu ge ke bala seo ba bangwe ba ilego ba feta go sona, gape di nthušitše gore ke se ke ka ikgopola kudu goba go ba le boithati.”

Go oketša moo, o se ke wa lebala mehlala e mebotse phuthegong ya geno: dihlogo tša malapa tšeo ka go se palelwe di hlokomelago dinyakwa tša nama gotee le tša moya tša malapa a tšona; dikgaetšedi​—go akaretša bo-mma bao ba se nago balekane​—bao ba swaraganago le dikgateletšo tša go godiša bana ge ba dutše ba tšea karolo e mafolofolo bodireding; batšofadi le bao ba babjago bao ba tšwelago pele ba botega go sa šetšwe go oketšega ga bofokodi le boemo bja maphelo bjo bo gwahlafetšego. Na ga o tutuetšwe ke mehlala e bjalo?

Ke therešo gore lefase le tletše ka mehlala e mebe. (2 Timotheo 3:13) Lega go le bjalo, ela hloko keletšo yeo Paulo a ilego a e nea Bakriste bao ba dulago Judea. Ka morago ga go laodiša ka boitshwaro bjo bo beago mohlala bja banna le basadi ba bantši ba kgale ba tumelo, moapostola Paulo o ile a ba kgothatša ka gore: “Byale le rena xe re na le leru le lekaakao la dihlatse tše di re ukametšexo, a re . . . kxôtlêlêlê thlabanong ye re lexo mo xo yôna, re išê mahlô xo Mo-êta-pele le Mophethi wa tumêlô, Yêna Jesu.” (Ba-Hebere 12:1, 2) Bakriste lehono le bona ba dikologilwe ke ‘leru le legolo’ la mehlala e mebotse​—ya bogologolo gotee le ya mehleng yeno. Na o holega e le ka kgonthe go bona? O ka holega ge e ba o ikemišeditše go ‘se etše ba babe, eupša wa etša ba bolo.’​—3 Johane 11.

[Mengwalo ya ka tlase]

[Ntlhakgolo go letlakala 20]

Ga se mo go kwalago go letela gore mogolo yo mongwe le yo mongwe goba mohlanka wa bodiredi o tla ba le bokgoni ka mo go kgethegilego sebopegong se sengwe le se sengwe sa bodiredi bja Bokriste

[Seswantšho go letlakala 21]

Bagolo e swanetše go ba “mehlala go mohlape”