Re Nyaka Mokgatlo wa Jehofa

NA O kile wa kwa motho yo mongwe a re, “Ke dumela go Modimo eupša e sego bodumeding bjo bo rulagantšwego”? Dipono tše di swanago gantši di bolelwa ke batho bao ba bego ba e-ya kerekeng ka phišego eupša bao ba ilego ba nyemišwa moko ke go palelwa ga bodumedi bja bona go fihlelela dinyakwa tša bona tša moya. Gaešita le ge ba nyamišitšwe ke mekgatlo ya bodumedi ka kakaretšo, ba bantši ba phegelela gore ba sa dutše ba nyaka go rapela Modimo. Lega go le bjalo, ba dumela gore go kaone go mo rapela ka tsela ya bona ba nnoši go e na le go dira bjalo ka go itswalanya le kereke goba mekgatlo e mengwe.

Beibele e re’ng? Na Modimo o nyaka gore Bakriste ba itswalanye le mokgatlo?

Bakriste ba Pele ba Ile ba Holwa ke go ba ba Rulagantšwego

Ka Pentekoste ya 33 C.E., Jehofa o ile a tšhollela moya wa gagwe o mokgethwa, e sego feela go badumedi ba mmalwa, eupša godimo ga sehlopha sa banna le basadi bao ba ilego ba bokana gotee “bà le pelotee” ka phapošing ya ka godimo motseng wa Jerusalema. (Ditiro 2:1) Ka nako yeo, phuthego ya Bokriste yeo e ilego ya ba mokgatlo wa ditšhaba-tšhaba e ile ya hlongwa. Se se ile sa itlhatsela go ba tšhegofatšo ya kgonthe bakeng sa barutiwa bao ba pele. Ka baka la’ng? Lebaka la pele, ba be ba neilwe kabelo e bohlokwa—ya go bolela ditaba tše di lokilego tša Mmušo wa Modimo go fihla mafelelong a ‘lefase ka moka.’ (Mateo 24:14) Ka phuthegong basokologi ba bafsa ba be ba ka ithuta go badumedi-gotee le bona bao ba nago le phihlelo kamoo ba ka dirago modiro wa boboledi.

Kapejana molaetša wa Mmušo o ile wa phatlalala kgole go feta merako ya Jerusalema. Magareng a 62 le 64 C.E., moapostola Petro o ile a ngwala lengwalo la gagwe la pele le le yago go Bakriste bao “ba xašanexo le dinaxa tša Ponto le Galatia, le Kapadotsia, le Asia le Bithinia,” tšeo ka moka di lego Turkey ya mehleng yeno. (1 Petro 1:1) Go be go e-na le badumedi ba bangwe gape kua Palestina, Libanoni, Siria, Cyprus, Gerika, Kerete le Italy. Ge Paulo a be a ngwalela ba-Kolose ka 60-61 C.E., ditaba tše di lokilego di be di šetše di ‘anegetšwe babopya bohle ba tlase ga legodimo.’—Ba-Kolose 1:23.

Mohola wa bobedi wa go kopanela le mokgatlo e be e le kgothatšo yeo Bakriste ba bego ba ka e neana. Ka go ikopanya le phuthego, Bakriste ba be ba ka kwa dipolelo tše di tutuetšago, ba ithuta Mangwalo a Makgethwa ba le gotee, ba abelana diphihlelo tše di tiišago tumelo le go kopanela thapelong le badumedi-gotee. (1 Ba-Korinthe, kgaolo 14) Banna bao ba godilego ba be ba ka ‘diša mohlape wa Modimo.’—1 Petro 5:2.

Bjalo ka ditho tša phuthego, Bakriste gape ba a  tsebana le go ratana. Bakriste ba pele go e na le go ikwa ba imelwa ke tswalano ya bona le phuthego, ba be ba agiwa le go matlafatšwa ke yona.—Ditiro 2:42; 14:27; 1 Ba-Korinthe 14:26; Ba-Kolose 4:15, 16.

Lebaka le lengwe leo phuthego ya lefaseng ka bophara goba mokgatlo o bego o nyakega ke bakeng sa go godiša botee. Bakriste ba ithutile go ‘bolela se tee.’ (1 Ba-Korinthe 1:10) Se e be e le sa bohlokwa. Ditho tša phuthego di be di e-tšwa ditlogong tše di fapa-fapanego tša thuto le tša tša leago. Ba be ba bolela dipolelo tše di fapa-fapanego, gomme ba be ba e-na le go fapana ga dimelo mo go lego molaleng. (Ditiro 2:1-11) Ka dinako tše dingwe go be go na le go fapana ga kgonthe ga dipono. Lega go le bjalo, Bakriste ba be ba thušwa go rarolla diphapano tše bjalo ka gare ga phuthego.—Ditiro 15:1, 2; Ba-Filipi 4:2, 3. 

Dipotšišo tše di tseneletšego tšeo di bego di ka se kgone go rarollwa ke bagolo ba lefelong leo di be di romelwa go balebeledi ba basepedi bao ba godilego ka tsebo, ba bjalo ka Paulo. Ditaba tše bohlokwa tša thuto ya tumelo di be di romelwa go sehlopha sa motheo se bušago seo se bego se le Jerusalema. Mathomong sehlopha se bušago se be se dirilwe ka baapostola ba Jesu Kriste, eupša ka morago se ile sa katološwa bakeng sa go akaretša banna ba ba godilego ba phuthego kua Jerusalema. Phuthego e nngwe le e nngwe e be e lemoga matla ao a neilwego ke Modimo a sehlopha se bušago le baemedi ba sona bakeng sa go rulaganya bodiredi, go kgethela banna maemong a tirelo le go dira diphetho ditabeng tša thuto ya tumelo. Ge taba e be e rarolotšwe ke sehlopha se bušago, diphuthego di be di amogela phetho gomme di “thabêla keletšô yeo.”—Ditiro 15:1, 2, 28, 30, 31.

Ee, Jehofa o be a diriša mokgatlo lekgolong la pele la nywaga. Eupša go thwe’ng ka lehono?

Re Nyaka Mokgatlo Lehono

Go swana le bagwera ba bona ba lekgolong la pele la nywaga, Dihlatse tša Jehofa lehono di tšeela godimo taelo ya go bolela ditaba tše di lokilego tša Mmušo. Tsela e nngwe yeo ka yona di dirago modiro wo ke ka go aba Dibeibele le dithušo tša go ithuta Beibele, tšeo di nyakago thulaganyo.

Dipuku tša Bokriste di swanetše go lokišetšwa ka kelohloko, di hlahlobje bakeng sa go nepagala, di gatišwe gomme di romelwe diphuthegong. Ka morago, Bakriste ka o tee ka o tee ba swanetše go ithapa go iša puku go bao ba nyakago go e bala. Molaetša wa Mmušo o fihleletše ba dimilione ka tsela ye. Bagoeledi ba ditaba tše di lokilego ba katanela go phetha modiro wa bona wa boboledi ka mokgwa o rulagantšwego, ba kgonthišetša gore ga go na karolo ya tšhemo yeo e šongwago ka mo go feteletšego mola dikarolo tše dingwe di hlokomologwa. Tše ka moka di nyaka thulaganyo.

Ka ge ‘Modimo a sa bebe motho,’ Dibeibele le dipuku tša Beibele di swanetše go fetolelwa. (Ditiro 10:34) Mo nakong ye, makasine wo o hwetšagala ka maleme a 132, gomme mogwera wa wona Phafoga!, o gatišwa ka maleme a 83. Seo se nyaka dihlopha tše di rulagantšwego gabotse tša bafetoledi go dikologa lefase.

Ditho tša phuthego di hwetša kgothatšo ge di e-ba gona dibokeng tša Bokriste le dikopanong. Moo ba kwa dipolelo tše di tutuetšago tša Beibele, ba ithuta Mangwalo ba le gotee, ba abelana diphihlelo tše di agago le go kopanela le barapedi-gotee le bona thapelong. Le gona, bjalo ka banababo bona ba lekgolong la pele la nywaga, ba thabela maeto ao a tiišago tumelo go tšwa go balebeledi ba lerato ba basepedi. Ka gona, Bakriste lehono ba bopa “mohlape o tee le modiši o tee.”—Johane 10:16.

Ee, Dihlatse tša Jehofa ga se tša phethagala, gaešita le bagwera ba tšona ba pele ba be ba sa phethagala. Go sa dutše go le bjalo, di šoma gotee ka botee. Ka baka leo, modiro wa go bolela ka Mmušo o phethwa lefaseng ka moka.—Ditiro 15:36-40; Ba-Efeso 4:13.

[Seswantšho go letlakala 31]

Bakriste lehono ba bopa “mohlape o tee le modiši o tee.”