KELETŠO YA BEIBELE: “Yo a diegago go galefa o phala mogale.”—Diema 16:32.

SEO KELETŠO YE E SE BOLELAGO: Re a holega ge re laola maikwelo a rena. Ke nnete gore ka dinako tše dingwe re fela re galefa ka mabaka a go kwagala, eupša ge e ba re sa laole kgalefo ya rena, seo se ka re gobatša. Banyakišiši ba bangwe ba bolela gore ge batho ba galefile, gantši ba bolela dilo tša go tšwa tseleng goba go dira dilo tšeo ka morago ba tlago go itsholela tšona.

SEO O KA SE DIRAGO: Ithute go laola kgalefo ya gago pele yona e go laola. Batho ba bangwe ba nagana gore motho wa go rata go galefa ke mogale, eupša ge e le gabotse ga go bjalo. Beibele e re: “Motho yo a sa kgonego go itshwara o etša motse wo o phušotšwego wo o se nago morako.” (Diema 25:28) Seo se ka go thušago go laola kgalefo ke gore pele o dira selo le ge e le sefe, o tsebe ditaba ka botlalo. Beibele e re: “Temogo ya motho e fokotša bogale bja gagwe.” (Diema 19:11) Ge re ka tseba mahlakore ka moka a taba, re tla kgona go laola kgalefo ya rena.

KELETŠO YA BEIBELE: “Ipontšheng le le ba lebogago.”—Bakolose 3:15.

SEO KELETŠO YE E SE BOLELAGO: Go thwe batho bao ba lebogago ke bona bao ba thabago. Batho bao ba ilego ba hlokofalelwa ke motho yo ba mo ratago goba ba loba dilo tšeo ba di ratago, le bona ba dumelelana le keletšo ye. Batho bao ba re dilo tšeo di bego di ba thuša go kgotlelela, ke go leboga dilo tšeo ba sa nago le tšona, go e na le go dula ba nagana ka tšeo ba di lobilego.

SEO O KA SE DIRAGO: Letšatši le letšatši, nagana goba o ngwale dilo tšeo o di lebogago bophelong.  Ga se gore dilo tšeo e swanetše go ba tše dikgolo. O ka nagana le ka dilo tše di bonagalago di sa re selo, tša go swana le letšatši leo le hlabilego gabotse, gore o sa phela gaešita le poledišano e botse yeo o bilego le yona le wa geno goba mogwera. Dilo tše di ka dira gore o ikwe o thabile ge e ba o ipha nako ya go nagana ka tšona.

Go nagana ka dilo tšeo di dirago gore o leboge ba lapa le bagwera go ka go thuša kudu. Ge e ba go na le dilo tšeo o di ratago ka batho ba bangwe ba botše tšona. O ka ba botša dilo tšeo ka molomo, ka go ba ngwalela lengwalo goba e-mail goba ka go ba ngwalela molaetša ka founo. Se se tlo dira gore segwera sa gago le batho bao se tie e bile sa dira gore o ikwe o thabile. Ka baka la’ng? Ka gore Beibele e swantšha seo le go nea.—Ditiro 20:35.

TLOGA GE NGANGIŠANO E THOMA.

“Go thoma ga dikgang go etša ge motho a tšholla meetse; ka gona o tloge pele ga ge ntwa e ka thoma.”—DIEMA 17:14.

O SE KE WA BELAELA KUDU KA DILO TŠA NAKONG E TLAGO.

“Le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.”—MATEO 6:34.

O SE KE WA TŠEWA KE MAIKWELO, NAGANA PELE O DIRA SELO.

“Tlhaologanyo e tla go diša gomme temogo ya go šireletša.”—DIEMA 2:11.