Motho yo a nago le maikarabelo o a tshepagala. Ge o mo neile mošomo, ga o belaele gore o tlo o dira le gore o tlo o fetša ka nako.

Le ge bana ba se na maitemogelo, ba ka ithuta go ba le maikarabelo le ge e sa le ba banyenyane. Puku ya Parenting Without Borders e re: “Ge ngwana a na le ngwaga le dikgwedi tše tharo, o thoma go dira dilo tšeo batswadi ba gagwe ba rego a di dire. Ge a na le ngwaga le dikgwedi tše tshela, o ekiša seo batswadi ba gagwe ba se dirago. Ditšong tše dintši, batswadi ba thoma go ruta bana ba bona mešongwana ya ka gae ge ba na le mengwaga e mehlano go ya go e šupa. Le ge bana bao e sa le ba banyenyane, ba kgona go dira mešongwana yeo gabotse.”

Mafelong a mangwe, bafsa ba bantši ba tloga gae gore ba yo iphelela maphelo a bona eupša tša fihla tša ba palela, ke moka ba boela gae. Ka dinako tše dingwe, se se bakwa ke gore batswadi ga se ba ba ruta go šomiša tšhelete gabotse, go dira mešongwana ya ka gae goba go ikemela.

Ka gona, batswadi ba swanetše go ruta bana ba bona go ba le maikarabelo e sa le ba banyenyane, gore ge ba gotše ba tle ba kgone go ikemela. Puku ya How to Raise an Adult e re: “O se ke wa lema bana ba gago go fihlela ba eba le mengwaga e 18, ke moka wa letela gore ba tle ba kgone go ikemela bophelong.”

Mo nee mešongwana ya ka gae.

KELETŠO YA BEIBELE: “Boitapišo bja mohuta le ge e le ofe bo a hola.”—Diema 14:23.

Ka tlhago bana ba rata go šoma le batswadi ba bona. Ka baka leo, ba nee mešongwana ya ka gae.

Batswadi ba bangwe ga ba nee bana ba bona mešongwana ya ka gae. Ba re ka ge bana ba bona ba na le mešomo e mentši ya sekolo, go ba nea mešongwana ya ka gae e tla ba go ba imetša.

Seo ga se nnete ka gore bana bao ba newago mešongwana ya ka gae, gantši ba a atlega sekolong, ka ge mešongwana yeo e ba ruta go se tšwafe. Go oketša moo, puku ya Parenting Without Borders e re: “Ge e ba re omanya bana ba rena ge ba nyaka go re thuša, ge e le gabotse re ba ruta gore go thuša batho ba bangwe ga go bohlokwa . . . E bile se se tlo ba dira dibodu.”

Go etša ge puku yeo e bolela, go dira mešongwana ya ka gae go ruta bana gore ba se ke ba inaganela  ba nnoši eupša ba thuše le batho ba bangwe. Ge re nea bana mešongwana ya ka gae, ba tla bona gore lapa le a ba hloka le gore le bona ba na le maikarabelo ka gae.

Ruta ngwana wa gago go amogela diphošo tša gagwe.

KELETŠO YA BEIBELE: “Theetša keletšo gomme o amogele tayo, gore o tle o hlalefe ka moso.”—Diema 19:20.

Ge ngwana wa gago a dirile phošo, go swana le ge a sentše selo sa motho yo mongwe, o se ke wa mo emelela. Ka tlhago, bana ba kgona go amogela diphošo tša bona. Mohlaleng wo re boletšego ka wona, ngwana a ka kgona go kgopela tshwarelo goba mohlomongwe a dira le se sengwe go bontšha gore o kgopela tshwarelo.

Ge ngwana a ka kwešiša gore o ikarabela ka diphošo tša gagwe, seo se tlo mo thuša gore . . .

• a tshepagale le go amogela diphošo tša gagwe

• a se bee batho ba bangwe molato

• a se ikemelele

• a kgopele tshwarelo ge go nyakega