Jesu o be a dula a ekwa Jehofa. (Joh. 8:29) Go tla bjang gore Beibele e re: “O ithutile go kwa dilong tšeo a tlaišegilego ka tšona”?—Baheb. 5:8.

Ge Jesu a be a le mo lefaseng, o ile a kopana le mathata ao a bego a se gona legodimong. O godišitšwe ke batswadi bao ba bego ba rata Jehofa eupša ba be ba se ba phethagala. (Luka 2:51) O ile a kgotlelela ge baetapele ba bodumedi le babuši ba mo tlaiša. (Mat. 26:59; Mar. 15:15) Le gona “o ile a ikokobetša gomme a bontšha gore o a kwa go fihlela a ehwa” lehu le sehlogo.—Bafil. 2:8.

Nakong ya ge Jesu a be a le mo lefaseng, o ile a kopana le mathata ao a ilego a mo ruta go kwa. Ke ka baka leo Jesu e lego Kgoši e phethagetšego le Moperisita yo a Phagamego yoo a kgonago go re kwela bohloko. (Baheb. 4:15; 5:9) Jesu o ile a ba yo bohlokwa kudu go Jehofa ka morago ga gore a ithute go kwa ge a be a tlaišega. Le rena re ka ba bohlokwa kudu go Jehofa. Ge e ba re ekwa le ge re kopana le mathata a ka re diriša go phetha kabelo e nngwe le e nngwe.—Jak. 1:4.