“Ngwaga le ngwaga, mo e ka bago masea a dimilione tše tharo a hlokofala le pele a ka fetša kgwedi, a mantši a bolawa ke dilo tšeo di ka bago di thibetšwe. A ka godimo ga teetharong a hlokofala ka letšatši leo a belegwago ka lona.”—Save the Children International.

Go ya ka Mokgatlo wa tša Maphelo wa Batho Bohle wa kua Engelane, go bile le koketšego ya mahu ao a bakilwego ke tšhilafalo ya moya metseng e 15 ya London ka 2011. Se se makatšago ke gore tisele e lebelelwa e se kotsi gakaalo ka ge e seketša makhura gomme e sa ntšhe carbon dioxide e ntši. Lega go le bjalo, 91 lekgolong ya tšhilafalo ya moya tikologong ye e tšwa dikoloing tša tisele.

Go ya ka nyakišišo ya 2013 yeo e dirilwego ke mokgatlo wa Public Opinion Foundation wa Russia, mo e ka bago 52 lekgolong ya Marussia ao a ipolelago gore ke Bakriste ba Orthodox a re ga se a ka a bala le ge e le karolo e itšego ya Beibele, gomme 28 lekgolong ya ona a re a rapela ka sewelo.

Pego ya World Bank e re: Kgakanego ya go se tsebe beng ba mašemo e šitiša tšweletšo ya tša temo gomme seo se dira gore tlala e oketšege. Seripagare sa lefase sa naga yeo e ka lengwago yeo e lekanago diheketara tše dimilione tše 202 e mo Afrika, moo go tšweletšwago kotara ya dilo tša temo ya seo naga e ka se tšweletšago.

Go e na le go diriša dipuku, dikolo tše mmalwa le diyunibesithi di diriša dithabolete tšeo di tsenywago tsebišo e nyakegago, mananeo a khomphutha le dilo tše dingwe. Lega go le bjalo, go ile gwa belaelwa ge e ba se se fokotša ditshenyagalelo.