Pego ya UNICEF ya mabapi le dinaga tša Afrika tša ka borwa bja Sahara e re: “Ke 38 lekgolong feela ya bana ba nywaga ya ka tlase ga e 5 yeo e nago le mangwalo a matswalo.” Lega go le bjalo, Elke Wisch, yo e lego motlatšamolaodi wa selete wa UNICEF wa dinaga tša ka bohlabela le ka borwa tša Afrika o re mafelong a mangwe a karolo yeo ya lefase, “go ngwadišwa ga matswalo a batho go a nyakega bakeng sa gore bana ba hwetše tlhokomelo ya tša maphelo le thuto, gotee le gore ditšhiwana di hwetše bohwa go batswadi ba tšona.”

Go ya ka nyakišišo e nngwe, selo seo bafsa ba bantši bao ba lego mahlalagading ba Mataliana ba se boifago ke go hlaselwa Inthaneteng (cyberbullying). Gare ga ba nywaga e 12 go ya go e 17, ba tekanyo ya 72 lekgolong ba bolela gore ba boifa go hlaselwa Inthaneteng. Tekanyo ya bona ke e kgolo go feta ya bao ba boifago dihlaretagi (55 lekgolong), bao ba boifago go tlaišwa ke motho yo mogolo ka tša thobalano (44 lekgolong), goba bao ba boifago go tsenwa ke bolwetši bjo bo fetelago ka tša thobalano (24 lekgolong).

Ka ge go begilwe ka go The Japan Times, bafsa ba Majapane bao ba tšwilego mahlalagading ga ba amogele go hlatlošetšwa maemong a godimo mošomong. Tekanyo ya 40 lekgolong e hlaswa go se be gona ga melao ya boitshwaro le go ata ga ditiro tša go se botege. Bašomi ba bantši ba ikwa ba sa kgone go hlalosa dipono tša bona goba go boledišana ka bolokologi le balaodi ba bona. Le ge meloko ya kgajana e kgomaretše bathwadi ba yona, fela ga bjale 60 lekgolong ya bašomi bao e sa lego bafsa e fo swarelela mešomong ya yona ge e sa letile gore e hwetše mešomo e kaone.

Go tloga ka 1980 go fihla ka 2010, batho ba e nyakilego go ba ba 800 000 ba bolailwe ka dithunya kua Brazil. Ba ka godimo ga ba 450 000 bao ba bolailwego ba be ba le nywageng ya magareng ga e 15 le e 29. Nyakišišo ya ditiro tša bosenyi tša morago bjale e bontšha gore dipolao tšeo gantši di bakwa ke dingangišano tša ka gae, go lwa le baagišani, lehufa goba dingangišano magareng ga baotledi.