Ge e be e sa le ngwana, o be a go botša dilo ka moka. Ge a le mahlalagading, ga a go botše selo. Ge o leka go boledišana le yena, mo gongwe o a go araba gomme a homola goba a tsoša ngangišano yeo e bakago ntwa ka gae.

O ka ithuta go boledišana le ngwana wa gago yo a lego mahlalagading. Lega go le bjalo, thoma ka go ela hloko dintlha tše pedi tšeo di ka oketšago tlhohlo yeo.

Go tsoma go ikemela. Gore e tle e be motho yo mogolo yo a nago le boikarabelo, ka tsela ya seswantšhetšo, ngwana wa gago yo a lego mahlalagading o swanetše gore a tlogele go swana le monamedi feela eupša a etše mootledi gomme a ithute go kalokana le ditsela tša mararankodi tša bophelo. Ke therešo gore bafsa ba bangwe ba nyaka go hwetša tokologo e fetago yeo e ba swanetšego; ka lehlakoreng le lengwe, batswadi ba bangwe ba nea bana tokologo e nyenyane go feta yeo e ba swanetšego. Ntwa yeo e ka bakwago ke seo e ka baka kgakanego e kgolo bakeng sa batswadi le bafsa. Brad * wa nywaga e 16 o belaela ka gore: “Batswadi ba ka ba leka go laola karolo e nngwe le e nngwe ya bophelo bja ka. Ge ba ka se nnee tokologo e oketšegilego ge ke eba le nywaga e 18, ke tlo tšwa ka gae!”

Bokgoni bja go hlatha dilo. Bana ba banyenyane ba na le go nagana dilo ka tsela ya go lebanya le ya go di tšea e le tše nepagetšego goba tše fošagetšego, eupša bafsa ba bantši ba kgona go lemoga go raragana ga taba. Ye ke karolo e bohlokwa ya bokgoni bja go hlatha dilo, gomme e thuša mofsa go ahlola dilo gabotse. Ela hloko mohlala wo: Go ngwana kgopolo ya tekatekano e bonala e le bonolo ge a re: ‘Mma o ngwathagantše kuku ka diripa tše pedi ke moka a nnea seripa se sengwe gomme se sengwe a se nea ngwanešo.’ Tabeng ye, tekatekano e dirwa ka tsela ya dipalo. Lega go le bjalo, ela hloko gore kgopolo yeo ga e nape e le bonolo. Go ba gona, tshwaro ya tekatekano ga se ka mehla e lekanago e bile go swara batho ka go lekana ga se ka mehla e lego ga tekatekano. Bokgoni bja go hlatha dilo bo dira gore ngwana wa gago yo a lego mahlalagading a katane le ditaba tše bjalo tše raraganego. Ka manyami, e bile seo se ka dira gore a lwe le wena.

Ge go kgonega, ebang le dipoledišano tše di sa rulaganyetšwago. Diriša dinako tšeo di sa rulaganyetšwago ka mo go holago. Ka mohlala, batswadi ba bangwe ba hweditše gore go ka direga gore bafsa bao ba bolele ge ba le gare ba dira mešongwana ya ka gae goba ge ba sepela ka koloi, ge ba bapile le batswadi go feta ge ba lebane le bona.—Molao wa motheo wa Beibele: Doiteronomio 6:6, 7.

Poledišano e be e kopana. Ga go nyakege gore le ngangišane ka taba go fihlela go se sa le bose. Go e na le moo, tšweletša ntlha ya gago . . . gomme o homole. Go ka thwe bogolo bja molaetša wa gago bo tla kwewa ke ngwana wa gago yo a lego mahlalagading ka morago, ge a tla be a le noši gomme a kgona go naganišiša ka seo o se boletšego. Le yena mo nee sebaka sa go dira bjalo.—Molao wa motheo wa Beibele: Diema 1:1-4.

Theetša—gomme o itumelelanye le maemo. Theetša ka kelohloko—o sa mo tsene ganong—e le gore o kgone go kwešiša bothata ka botlalo. Ge o araba, bontšha tekatekano. Ge e ba o kgomarela melao ka go se kobakobege, ngwana wa gago yo a lego mahlalagading o tla lekega gore a hwetše ditsela tša go se go kwe eupša a sa otlwe. Puku ya Staying Connected to Your Teenager e lemoša ka gore: “Yeo ke nakong ya ge bana ba phela maphelo a mabedi. Bophelo bjo bongwe ke bja ge ba botša batswadi ba bona seo ba nyakago go se kwa gomme ba dira seo ba se ratago gateetee ge ba tloga pele ga batswadi.”—Molao wa motheo wa Beibele: Bafilipi 4:5.

Dula o išitše maswafo fase. Mofsa yo a bitšwago Kari o re: “Ge re sa dumelelane, mma o kgopišwa ke dilo ka moka tšeo ke di bolelago. Seo se tloga se nnyamiša kudu, ke moka poledišano e fetoga ngangišano.” Go e na le go ferekana, bolela selo seo se tlago go bontšha gore o kwešiša kamoo ngwana wa gago yo a lego mahlalagading a ikwago ka gona. Ka mohlala, go e na le go bolela gore, “Seo ga se selo seo o ka tshwenyegago ka sona!” e re, “Ke a bona gore seo se go tshwenya kudu.”—Molao wa motheo wa Beibele: Diema 10:19.

Go fihla bokgoleng bjo bo kgonegago, nea tlhahlo gomme o se ke wa laela. Bokgoni bja go hlatha dilo bja ngwana wa gago yo a lego mahlalagading bo swana le mešifa yeo e nyakago go tlwaetšwa. Ka gona ge a lebane le bothata, o se ke wa mo direla diphetho. Ge le ahlaahla taba, mo nee sebaka sa go tšweletša ditharollo tša gagwe. Ke moka, ka morago ga ge le boletše ka dipono tše mmalwa, o ka re: “Tšeo ke dikgonagalo tše sego kae. Tšea letšatši goba a mabedi o naganišiša ka tšona, ke moka re tla kopana gape gore re boledišane gore o ka kgetha tharollo efe le gona ka lebaka lefe.”—Molao wa motheo wa Beibele: Baheberu 5:14.