O ka Ithuta go ba le Khutšo

LE GE re belegwe re na le ditshekamelo tše dingwe tšeo di fošagetšego, gantši ga re belegwe re na le bošoro. E bile ga re belegwe re na le khutšo. Eupša ke mang yo a ka re rutago ditsela tša go ba le khutšo ya kgonthe? Ga go pelaelo gore motho yo a swanelegago kudu ke Mmopi wa rena, yoo a nago le bohlale bjo bogolo. Ela hloko dintlha tše di latelago tše hlano tšeo di sepedišanago le dithuto tše bohlale tšeo di hwetšwago ka Beibeleng.

1 “O se ke wa hufegela motho yo a dirago bošoro.” (Diema 3:31) Lemoga gore dika tše bjalo ka boitshwaro le boleta ke tšona di nago le matla kudu. Diema 16:23 e re: “Yo a diegago go galefa o phala mogale.” Go swana le morako o tiilego, o kgona go kgotlelela ge a hlohlwa. Ge e le gabotse, o ba yo boleta ge a galefišwa, ka go re’alo a “phohliša pefelo.” (Diema 15:1) Lega go le bjalo, motho yo a ratago go galefa o galefišwa le ke selo se senyenyane.—Diema 25:28.

2 Kgetha bagwera ka bohlale. Diema 16:29 e re: “Motho yo šoro o tla gokeletša wa gabo bobeng.” Ka lehlakoreng le lengwe, “yo a sepelago le ba bohlale o tla hlalefa.” (Diema 13:20) Ruri ge re gwerana le batho ba khutšo bao ba nago le boitshwaro le moya o boleta, ga go pelaelo gore re tla leka go ba ekiša.

3 Rata ba bangwe go tšwa pelong. Ga go tsela e kaone ya go hlalosa lerato go feta yeo e hwetšwago go 1 Bakorinthe 13:4-7. Ka boripana e re: “Lerato ga le fele pelo e bile le botho. . . . Ga le rumolege. Ga le boloke pego ya bobe. . . . Le tiišetša tšohle, . . . le kgotlelela tšohle.” Jesu o itše lerato leo le le swanago le la Modimo le bontšhwa le manaba.—Mateo 5:44, 45.

4 Dumela gore Modimo o tla fediša ba kgopo. “Le se ke la bušetša bobe ka bobe go motho. . . . Go fihla moo go ithekgilego ka lena, ebang le khutšo le batho bohle. Baratiwa, le se ke la itefeletša, . . . gobane go ngwadilwe gwa thwe: ‘Tefetšo ke ya ka, ke tla lefetša, go re’alo Jehofa.’” (Baroma 12:17-19) Ge re na le tumelo go Modimo le dikholofetšong tša gagwe, re ba le khutšo ya ka gare yeo batho bao ba se nago tumelo ba ka se kgonego go e kwešiša.—Psalme 7:14-16; Bafilipi 4:6, 7.

5 Letela Mmušo wa Modimo gore o tliše khutšo ya kgonthe mo lefaseng. Mmušo wa Modimo ke pušo ya legodimong yeo kgauswinyane e tla fedišago bohle ba kgopo gomme ya laola lefase ka moka. (Psalme 37:8-11; Daniele 2:44) Mmušong woo, “moloki o tla atlega” gomme “le khutšo e tla ata go fihla kgwedi e sa hlwe e le gona.”—Psalme 72:7.

Dithuto tše bjalo tša Beibele di thušitše batho ba dimilione go rata khutšo—go akaretša le ba bangwe bao ba bego ba rata bošoro.