Go Lewa ke Bodutu Lefaseng Leo le Nago le Mekgwa e Mentši ya Poledišano

GO LELETŠANA megala-thekeng, go ngwalelana melaetša ya megala-thekeng, di e-mail, go dira segwera mekerong ya dipoledišano ya Inthanete—ga se gwa ka gwa ba le nako yeo ka yona go bilego le mekgwa e mentši gakaakaa ya poledišano yeo e hwetšagalago gabonolo. Lega go le bjalo, lefaseng le leo le nago le mekgwa e mentši ya poledišano, batho ba bantši ba banyenyane le ba bagolo, ba ikwa ba lewa ke bodutu kudu. Ka baka la’ng?

Ka pukung ya bona ya Loneliness—Human Nature and the Need for Social Connection, monyakišiši John T. Cacioppo le monyakišiši William Patrick ba bolela ka mo go tseneletšego ka taba ya go lewa ke bodutu. Ba bolela ka nyakišišo yeo e bolelago gore, “go dirišwa mo go atago ga Inthanete go ka dira gore batho ba ipee lekatana kudu gotee le go gateletšega, ge go dira bjalo go tšeela legato mekgwa ya go ikopanya le batho.”

Bophelo bja leema-ema bjo bo bakwago ke batho ba mehleng yeno bo dira gore go ikopanya le batho ba bangwe go be thata. Go myemyela le lerato tšeo di ka bonwago sefahlegong sa motho di ka se ke tša bonagala mogaleng goba ge go ngwalelanwa melaetša sekirining sa khomphutha.

Seo se sa tšwago go bolelwa e ka ba sa therešo lefelong la mošomo eupša se ka ba bjalo kudu ka lapeng. Malapeng a mantši, ditho tša lapa di tla gae di be di tloge ntle le go ja gotee goba go boledišana. Bana bao ba lego mahlalagading ba na le dikhomphutha tša bona gomme ba ikarola go ditho ka moka tša lapa. Se se makatšago ke gore go sa šetšwe go ba ga bona le didirišwa tša poledišano tša elektroniki, bafsa ba bantši ba ikwa ba lewa ke bodutu.

Mehleng yeno, gaešita le manyalo a ka bewa kotsing ke maikwelo a go lewa ke bodutu. Go se boledišane ga balekane ba lenyalo go ka baka boemo bjoo go bjona batho bao ba babedi ba phelago gotee eupša maphelo a bona a sa kopane. Maikwelo a go ba noši mola o na le molekane wa lenyalo, ke sebopego se sengwe sa go lewa ke bodutu seo se gateletšago kudu.

Batswadi bao ba se nago balekane ka mo go kgethegilego ba ka swanelwa ke go lwantšhana le maikwelo a go lewa ke bodutu. Lefase le leo le nago le mekgwa e mentši ya poledišano le lona le ka fediša tswalano yeo ba nago le yona le bana ba bona, la oketša maikwelo a go ikwa ba le noši. Le gona, batho ba bantši bao ba sego lenyalong ba kganyoga go ba le balekane, eupša dinyakwa tša bona tša maikwelo ga di kgotsofatšwe.

Go lewa ke bodutu go fetogile tlhoba-boroko bathong moo go ka feleletšago ka mathata a bjalo ka go lemalela bjala, go ja kudu, go diriša dihlare-tagi gampe, boitshwaro bjo bo gobogilego bja dikopano tša botona le botshadi gaešita le go ipolaya. Ka gona ke gabohlokwa gore re tsebe dibaki tša go lewa ke bodutu. Wo ke mogato wa pele woo o ka lebišago go lebeletšaneng ka katlego le bothata bjo.