Go Tlogela go Hlankela Ma-SS go Thoma go Hlankela Modimo wa Therešo

Ka ge go anega Gottlieb Bernhardt

Ke be ke le mohlankedi wa ma-SS a Jeremane, sehlopha se se phagamego sa baleti sa Hitler, kua Sebong sa Wewelsburg. Ka April 1945, ke ile ka hwetša taelo ya gore ke bolaye bagolegwa ba lego kampeng ya tshwenyo ya kgaufsi. E be e le Dihlatse tša Jehofa. Ma-SS a be a nyaka gore motho a dire seo a mmotšago sona ntle le go botšiša dipotšišo. Kapejana ke ile ka swanelwa ke go kgetha magareng ga go latela taelo yeo le go dira seo ke tsebago gore se nepagetše. E re ke go hlalosetše gore ka baka la’ng.

KE BELEGWE ka 1922 kua Jeremane, motseng o lego kgaufsi le Noka ya Rhine. Gaešita le ge motse woo o be o tiile bodumeding bja Roma Katholika, lapa lešo e be e le ditho tša ma-Pietist, e lego sehlopha sa bodumedi seo se thomilego lekgolong la bo-17 la nywaga. Ka 1933, ge ke be ke e-na le nywaga e 11, Hitler o ile a thoma go buša Jeremane. Ka ge ke be ke šoma gabotse dithutong tša-ka le dipapading, ke ile ka kgethelwa go tsena sekolo seo se lego kgaufsi le Marienburg, yeo ga bjale e bitšwago Malbork, kua Poland. Moo, lefelong leo e lego dikhilomithara tše makgolo go tloga gae, ke ile ka nwelela ditumelong tša Setšhaba tša Bosošalise goba tša bo-Nazi. Barutwana ba be ba rutwa dilo tše bjalo ka go hlompha, go šoma ka thata, potego, boikokobetšo, go tšeela mošomo godimo gotee le go hlompha setšo sa rena sa Jeremane ka mo go tseneletšego.

Ntwa ya II ya Lefase le Ma-SS

Ge ntwa ya bobedi ya lefase e be e thoma ka 1939, ke ile ka ingwadiša le Leibstandarte SS Adolf Hitler, e lego sehlopha se se phagamego sa madira seo se bego se laolwa ke Hitler ka boyena. Baleti bao ba bego ba leta bahlankedi ba mmušo ba be ba tšewa sehlopheng se, le gona se be se dirišwa go phetha mešomo e kgethegilego ya madira. Ke ile ka ya ntweng kua Belgium, Fora, Netherlands, Romania, Bulgaria, le Gerika. Ge ke be ke le Bulgaria, ke ile ka ya tirelong ya bodumedi yeo e bego e etelelwa pele ke moruti wa madira. Ke ile ka ipotšiša gore: ‘Na ditirelo tše di swanago di swarwa ke manaba?’ Le gona ke ile ka ipotšiša gore: ‘Na Modimo o šegofatša dintwa? Na o tšea lehlakore?’

Ka morago, ke ile ka kgethelwa go tsenela Junkerschule, sekolo sa masogana ao a tlogo newa maemo a phagamego sehlopheng sa madira. Ka morago ga moo, ke ile ka tsenywa sehlopheng seo se bego se leta ntlo-kgolo ya Reich kua Berlin, moo ke ilego ka bona Hitler a omanya radipolitiki wa maemo a phagamego. Ke ile ka nagana gore, ‘Ye ke tiro e lešago dihlong.’ Ke ile ka leka gore ke se ke ka hlaboša lentšu!

Kua Berlin, ke ile ka kopana le Inge, yo le yena a bego a šoma ntlong-kgolo ya mašole. Ge re be re le kgaufsi le go nyalana, sehlopha sa rena se ile sa išwa ka pele go yo lwa le Russia—re se na diaparo tše di swanetšego tša marega! Boemo bo ile bja dira gore rena madira re makale, ka ge marega a 1941/1942, themperetšha e ile ya theogela go di-degree Celsius tše -30. Moo ke ile ka newa Iron  Cross (Sefapano sa Tšhipi) la bobedi. Ka morago ga ge ke gobetše kudu, ke ile ka bušetšwa Jeremane ka sefofane. Nna le Inge re ile ra nyalana ka 1943.

Kabelo ya-ka e latetšego e be e le ntlong-kgolo ya mašole a Hitler ya kua Obersalzberg dithabeng tša Bavaria. Yo mongwe yo a bego a le gona ke Heinrich Himmler, hlogo ya ma-SS, yo a ilego a rulaganya gore ke alafše ke ngaka ya gagwe, Felix Kersten. Ka morago, ke ile ka kwa gore Kersten o na le polasa yeo e bego e bitšwa Hartzwalde, kgaufsi le Berlin. Go ya bofelong bja ntwa, o ile a kgopela Himmler gore a dumelele Dihlatse tša Jehofa tšeo di tšwago kampeng ya kgaufsi ya tshwenyo go tla go šoma polaseng ya gagwe. Himmler o ile a dumela, gomme Kersten o ile a swara Dihlatse ka tlhompho. Hlatse yeo e bego e šomela Kersten kua Sweden, ka mehla e be e tsenya kgatišo ya Morokami ka sutukheising ya Kersten gore a e nee Dihlatse tšeo di lego Jeremane. *

Dihlatse tša Jehofa e ba Karolo ya Bophelo Bja-ka

Bofelong bja 1944, Himmler o ile a nkabela go ba mothuši wa molaodi wa madira a SS yo a bego a laola Sebo sa Wewelsburg, sebo seo se nago le nywaga e 400 seo se lego kgaufsi le motse wa Paderborn. Himmler o be a rerile go dira Wewelsburg lefelo leo go rutwago dikgopolo tša ma-SS. Kgaufsi le sebo go be go e-na le kampa ya tshwenyo yeo e bitšwago Niederhagen, moo go bego go golegilwe sehlopha se se kgethegilego—Dihlatse tša Jehofa, tšeo di bego di tsebja e le Barutwana ba Beibele.

Mogolegwa yo a bitšwago Ernst Specht o ile a tla go hlwekiša dintho tša-ka ka makga a mmalwa. O be a tla re: “Thobela, Mohlomphegi.”

Ke ile ka botšiša gore: “Ke ka baka la’ng o sa re, ‘Heil Hitler!’?”

O ile a araba ka bohlale a re, “Na o godišitšwe o le Mokriste?”

Ke ile ka re: “Ee. Ke godišeditšwe dithutong tša ma-Pietist.”

Ke moka a tšwela pele ka gore: “Gona, o tla tseba gore Beibele e holofetša gore phološo (heil) e tla hwetšwa ka motho o tee feela, Jesu Kriste. Ke ka baka leo nka se kego ka re ‘Heil Hitler!’”

Ke maketše e bile ke kgahlegile, ke ile ka botšiša gore, “Ke ka baka la’ng o le mo?”

O ile a re, “Ke Morutwana wa Beibele.”

Dipoledišano tša-ka le Ernst le Hlatse e nngwe e bitšwago, Erich Nikolaizig, yo a bego a šoma go hlokomela meriri, di ile tša nkgoma pelo. Lega go le bjalo, dipoledišano tše bjalo di be di thibetšwe gomme molaodi wa-ka o ile a ntaela gore ke kgaotše. Go sa šetšwe seo, ke be ke nagana gore ge e ba motho yo mongwe le yo mongwe kua Jeremane—yeo e bego e bitšwa naga ya Bakriste yeo e nago le ditho tše dimilione tša kereke—a ka itshwara ka  tsela yeo Dihlatse di itshwarago ka yona, go be go ka se be le ntwa. Ke be ke nagana gore, ‘di swanetše go ekišwa, e sego go tlaišwa.’

Nakong yeo, mohlologadi yo a nyamilego o ile a letša mogala a kgopela senamelwa bakeng sa morwa wa gagwe, yoo lelana (appendix) la gagwe le bego le swanetše go ntšhwa. Ke ile ka laela gore senamelwa se mo late, eupša molaodi o ile a gana. Ka baka la’ng? Monna wa mohlologadi yoo o be a bolailwe e le setho sa sehlopha seo se ilego sa leka go bolaya Hitler ka July 1944. Mošemanyana yoo o ile a hwa, gomme go be go se na seo ke bego nka se dira. Tiragalo yeo e sa dutše e tshwenya letswalo la-ka go fihla le lehono.

Le ge ke be ke le mathomong a nywaga ya bo-20, ke ile ka thoma go bona bophelo ka tsela yeo bo lego ka yona—e sego ka tsela yeo dithuto tša Nazi di bo tšweletšago ka yona. Ka nako e swanago, go rata ga-ka Dihlatse tša Jehofa le dithuto tša tšona go ile gwa oketšega. Se ka lehlakoreng le lengwe se ile sa nthuša go dira phetho e makatšago bophelong bja-ka.

Ka April 1945, madira a Kopanego a be a batamela, gomme balaodi ba-ka ba ile ba ngwega Wewelsburg. Yo mongwe wa sehlopha o ile a tla le ditaelo tše di tšwago go Himmler tša go senya sebo le go bolaya bagolegwa. Molaodi wa kampa ya tshwenyo ya kgaufsi o ile a nnea lelokelelo la maina a batho bao ba swanetšego go bolawa—ka moka e be e le Dihlatse. Ka baka la’ng? Go ile gwa begwa gore di tseba lefelo leo go lona Pušo ya Boraro e bego e utile mahumo a bokgabo, dilo tša bokgabo tšeo go bonagalago di be di utilwe meagong e mengwe. Sephiri seo se be se swanetše go dula e le sephiri! Ka gona, ke be ke swanetše go dira’ng ka taelo yeo ya go bolaya Dihlatse?

Ke ile ka boledišana le molaodi wa kampa gomme ka re: “Madira a Amerika a a tla. Na ga o bone go le bohlale gore wena le banna ba gago le sepele?” Go be go sa nyakege gore ke mo kgodiše! Ke moka ke ile ka dira selo seo se bego se ka se dirwe ke mohlankedi wa ma-SS—go se latele taelo, gomme Dihlatse di ile tša phela.

Tokelo ya go ba Ngwanabo Bona

Ka morago ga ntwa, nna le Inge re ile ra ikopanya le Dihlatse tša Jehofa gomme ra thoma go ithuta Beibele ka mafolofolo. Mosadi yo mongwe wa Hlatse yo a bitšwago Auguste, gotee le ba bangwe ba ile ba re thuša. Dikgobalo tšeo ke di hweditšego ntweng le maemo a thata a ka morago ga ntwa a dirile gore bophelo bo se be bonolo. Lega go le bjalo, nna le mosadi wa-ka re ile ra ineela go Jehofa gomme ra kolobetšwa—nna ka 1948, Inge ka 1949.

Ka 1950, Dihlatse tše mmalwa tšeo di bego di le Wewelsburg nakong ya ntwa di ile tša boela moo bakeng sa go kopana gape. Di be di akaretša Ernst Specht, Erich Nikolaizig, le mogolegwa yo mongwe yo a ilego a botega, Max Hollweg. Ke bona e le tokelo e kgolo go bitšwa ngwanabo bona, ka ge banna ba ba Modimo ba nago le sebete ba ile ba bea maphelo a bona kotsing e le gore ba nnee bohlatse. Le gona, nakong ya ge ba kopana gape go be go e-na le Martha Niemann, yo e bego e le mongwaledi kua Wewelsburg. Le yena o ile a kgahlwa kudu ke boitshwaro bja Dihlatse gomme ka morago a ba mohlanka wa Jehofa yo a ineetšego.

Ge ke lebelela morago nywageng e fetilego, ke bona bohlatse bjo bontši bja gore “lefase ka moka le rapaletše matleng a [Sathane Diabolo]”—selo seo ke bego ke sa se kwešiše ge ke be ke sa le lesogana leo le se nago le phihlelo le leo le kgomaretšego thuto ya boikgopolelo. (1 Johane 5:19) Le gona, ke bona gabotse phapano magareng ga go hlankela mebušo ya bogateledi, e bjalo ka wa Hitler, le go hlankela Jehofa. Mebušo ya bogateledi e gapeletša batho go ikokobeletša yona, mola Jehofa a nyaka gore re mo hlankele ka gobane re mo rata ka lerato leo le theilwego tsebong e nepagetšego ya semelo sa gagwe le morero wa gagwe o utolotšwego ka Beibeleng. (Luka 10:27; Johane 17:3) Ee, ge feela ke sa phela ke tla hlankela Jehofa.

[Mongwalo wa tlase]

[Seswantšho go letlakala 29]

Seswantšho sa rena sa lenyalo, February 1943

[Seswantšho go letlakala 29]

Sebo sa Wewelsburg se be se tla fetoga lefelo leo go rutwago dikgopolo tša ma-SS

[Seswantšho go letlakala 30]

Ke e-na le mosadi wa-ka, Inge, lehono