Sephiri 2: Boitlamo

“Se Modimo a se tlemagantšego jokong go se be le motho yo a se aroganyago.”—Mateo 19:6.

Se se ra gore’ng? Banyalani bao ba atlegago ba lebelela lenyalo la bona e le tlemagano ya sa ruri. Ge bothata bo tšwelela, ba katanela go bo rarolla go e na le go bo diriša e le lebaka la go fediša lenyalo. Ge banyalani ba ikwa ba tlemagane, ba ikwa ba šireletšegile. Yo mongwe o kgodišegile gore yo mongwe o tla tšwela pele a hlompha lenyalo la bona.

Bohlokwa bja sona. Ka ditsela tše dintši, boitlamo ke motheo o mogolo wa lenyalo. Lega go le bjalo, diphapang tša ka mehla di ka dira gore boitlamo bo bonagale bo swana kudu le molaba go e na le tšhireletšo. Ge e le gabotse, keno ya lenyalo e rego “go fihlela re aroganywa ke lehu” e fetoga kgwerano yeo e sa rego selo—yeo banyalani ba dumago go tšwa go yona. Ba ka no se fediše lenyalo ka go lebanya, eupša ba ka “tšwa go lona” ka ditsela tše dingwe—ka mohlala, ka go homola ka tsela e se nago kwelobohloko ge go nyakega gore go boledišanwe ka ditaba tše bohlokwa.

Leka boitlwaetšo bjo. Diriša dipotšišo tše di latelago e le tlhahlo bakeng sa go bona gore boitlamo bja lena bo tiile gakaakang.

▪ Ge re dutše re ngangišana, na ke itshola gore ke ka baka la’ng ke ile ka nyalana le molekane wa-ka?

▪ Na gantši ke nagana kudu ka motho yo mongwe go e na le go nagana ka molekane wa-ka?

▪ Na ka dinako tše dingwe ke botša molekane wa-ka gore, “Ke a go tlogela” goba “Ke tla hwetša motho yo a nkwešišago”?

Dira phetho. Nagana ka mogato o tee goba e mebedi yeo o ka e gatago bakeng sa go tiiša boitlamo bja lena. (Ditšhišinyo: Dula o ngwalela molekane wa gago lengwalo, bea diswantšho tša molekane wa gago mo o šomelago gona goba o leletše molekane wa gago mogala letšatši le le lengwe le le lengwe ge o le mošomong, e le feela gore o ikgokaganye le yena.)

O re’ng o sa dire ditšhišinyo tše mmalwa ke moka o botšiše molekane wa gago gore ke efe yeo e mo kgahlago kudu?

[Seswantšho go letlakala 4]

Boitlamo bo swana le legora leo le šireletšago lenyalo la gago go tšwa tseleng

[Mothopo]

© Corbis/age fotostock