Ke Lokolotšwe Ditlemong tša lehloyo

KA GE GO ANEGA JOSÉ GOMEZ

KE BELEGWE ka September 8, 1964, kua Rognac, e lego toropo e nyenyane yeo e lego ka borwa bja Fora. Batswadi ba-ka le bo-makgolo le bo-rakgolo e be e le ma-Gypsy a Andalusia, bao ba belegetšwego kua Algeria le Morocco, Afrika Leboa. Ka ge e le tlwaelo setšong sa ma-Gypsy, lapa lešo e be e le leo le katološitšwego.

Tate e be e le monna yo šoro, gomme tše dingwe tša dilo tšeo ke di gopolago tša kgale ke go mmona a kweša mma bohloko. Ge nako e dutše e e-ya, mma o ile a kgetha go mo hlala—e lego selo seo se sa tlwaelegago gare ga ma-Gypsy. O ile a ya le nna, ngwanešo le kgaetšedi ya-ka Belgium, moo re ilego ra phela ka khutšo nywageng e seswai yeo e ilego ya latela.

Lega go le bjalo, dilo di ile tša fetoga. Rena bana re be re nyaka go bona tatago rena, ka gona mma o ile a re iša Fora gomme a boelana le tate. Go phela le tate gape e ile ya ba tlhohlo. Kua Belgium re be re e-ya le mma gohle. Eupša ka lehlakoreng la gabo tate, banna ba be ba swanetše go gwerana le banna. Monagano wa bona wa bonkgwete e be e le wa gore banna ba na le ditshwanelo ka moka gomme basadi ke bona ba dirago mešomo ka moka. Ka mohlala, ka letšatši le lengwe ge ke be ke nyaka go thuša rakgadi go hlwekiša ka morago ga dijo tša mantšiboa, rangwane o ile a mpea molato wa gore ke mosodoma. Ka lapeng labo, go hlatswa dibjana e be e le mošomo wa basadi feela. Mafelelong, kgopolo ye e sa leka-lekanago e ile ya kgoma tsela ya-ka ya go nagana.

Ga se gwa tšea lebaka le le telele pele ga ge mma a ka ba mohlaselwa gape wa mokgwa o šoro wa tate. Ka makga a mantši ge re be re leka go tsena ditaba gare, nna le ngwanešo re be re swanelwa ke go tšhaba ka go tšwa ka lefasetere bakeng sa go efoga go bethwa ke tate ka matswele. Kgaetšedi ya-ka le yona e be e sa šale. Ka baka leo, ke be ke fetša nako e ntši kamoo nka kgonago ke se gona gae. Ge ke e-na le nywaga e 15, ke be ke sa tsebe moo ke emego gona bophelong.

Mafelelong, ke ile ka thoma go tsebja ka go ba ga-ka yo bogale. Ke be ke thabela go ba mphenyašilo. Ka dinako tše dingwe ke be ke rumola masogana a mangwe ka boomo, eupša ke ba sego kae feela bao ba bego ba e-lwa le nna—kudu ka ge gantši ke be ke dula ke itlhamile ka thipa goba ka ketwane. Go se go ye kae ke ile ka thoma go utswa dikoloi le go di rekiša. Mabakeng a mangwe ke be ke fo di tšhuma ka mollo gomme ke thabela go bogela bo-raditima-mollo ba tima kgabo ya mollo. Ka morago ke ile ka thoma go thuba mabenkele le mafelo a bobolokelo. Ke ile ka golegwa ka makga a mmalwa. Le gona lebakeng le lengwe le le lengwe ke be ke rapela Modimo gore a nthuše!

Ee, ke be ke dumela go Modimo. Ge re be re le Belgium, ke be ke tsena sekolo sa bodumedi. Ka gona ke be ke tseba gore seo ke bego ke se dira e be e le se sebe. Lega go le bjalo, go dumela ga-ka go Modimo ga se gwa ka gwa kgoma boitshwaro bja-ka ka tsela le ge e le efe. Ke be ke nagana gore sohle seo ke bego ke swanetše go se dira e be e le gore ke kgopele tebalelo go Modimo ke moka dibe tša-ka di be di tla lebalelwa.

Ka 1984, ke ile ka ahlolelwa dikgwedi tše 11 kgolegong bakeng sa go utswa. Ke ile ka romelwa kgolegong ya Baumettes, kua Marseilles. Moo, ke ile ka gaya dikarolo tše di fapa-fapanego tša mmele wa-ka. Mogayo o mongwe o be o balega ka gore “lehloyo le  go itefeletša.” Go e-na le gore ke fetoge ka mo go feletšego, ke ile ka dumelela kgolego gore e dire gore lehloyo la-ka la go hloya taolo le batho ka kakaretšo e be leo le tseneletšego. Ge ke be ke lokollwa, ka morago ga go hlankela dikgwedi tše tharo feela kgolegong, ke be ke tletše lehloyo go feta le ge e le neng pele. Ka morago, masetlapelo a ile a fetoša tsela ya-ka ya go phela.

Go Itefeletša go Fetoga Pakane Ya-ka

Lapa lešo le be le e-lwa le lapa le lengwe la ma-Gypsy. Nna le bo-rangwane re ile ra phetha ka go ikopanya le bona bakeng sa go rarolla bothata. Malapa ka bobedi a be a itlhamile. Ngangišanong yeo e ilego ya tšwelela ka morago, rangwane Pierre le motswala wa tate ba ile ba bolawa ka go thunywa. Ke ile ka ferekana moo ke ilego ka ema setarateng ke swere sethunya ka seatla, gomme ke goeletša ka bogale bjo bogolo. Yo mongwe wa bo-rangwane o ile a phamola sethunya diatleng tša-ka.

Go lahlegelwa ke rangwane Pierre yoo ke bego ke mo tšea bjalo ka tate, go ile gwa ntlogela ke imetšwe ke manyami. Ke ile ka mo llela ka mokgwa wa ma-Gypsy. Ke ile ka tšea matšatši a mantši ke sa beole goba go ja nama ya mohuta le ge e le ofe. Ke ile ka gana go bogela thelebišene goba go theetša mmino. Ke ile ka ikana gore ke tla lefeletša lehu la rangwane eupša ba leloko ba ile ba nthibela go hwetša sethunya.

Ka August 1984, ke ile ka tsenywa tirelong ya bošole. Ge ke e-na le nywaga e 20 ke ile ka ngwadiša mokgatlong wa go boloka khutšo wa Ditšhaba tše Kopanego kua Lebanon. Ke ile ka amogela go ipea kotsing ya go bolaya goba go bolawa. Ka nako yeo, ke be ke kgoga patše e ntši kudu. Go oketša tabeng ya go ntira gore ke ikwe ke phetše gabotse, sehlare-tagi se be se ntira gore ke ikwe gore go be go se na selo seo se ka nkgobatšago.

Go be go le bonolo go hwetša dibetša kua Lebanon, ka gona ke ile ka phetha ka go romela dibetša kua Fora bakeng sa go tšwetša pele leano la-ka la go lefetša lehu la rangwane. Ke ile ka reka dithunya tše pedi, gotee le pomo go baagi ba tikologong. Ke ile ka hlahlamolla dithunya, ke moka ka di fihla ka gare ga diradio tše pedi, gomme ka di romela gae.

Lebakeng la dibeke tše pedi feela pele ga go fetša tirelo ya-ka ya tša bohlabani, nna le bašomi-gotee ba bararo re ile ra sepela ka ntle le tumelelo. Ge re boela lefelong la bodulo re ile ra golegwa. Ge ke le kgolegong, ke ile ka galefa o šoro gomme ka hlasela mohlapetši. Ke be ke sa kwešiše go nyatšwa ke mo-payo—motho yo e sego mo-Gypsy. Letšatšing le le latelago ke ile ka ba le ntwa e nngwe gape e šoro, mo nakong ye ke e-lwa le molaodi. Ke ile ka romelwa Kgolegong ya Montluc, kua Lyons, bakeng sa nako yeo e bego e ntšhaletše tirelong ya bohlabani.

Ke Hwetša Tokologo—Kgolegong

Letšatšing la-ka la pele Kgolegong ya Montluc, ke ile ka dumedišwa ka borutho ke lesogana leo le thabilego. Ke ile ka kwa gore e be e le yo mongwe wa Dihlatse tša Jehofa le gore yena gotee le ba bangwe ba bodumedi bja gagwe ba be ba golegetšwe feela gore ba be ba sa nyake go tsenela ntwa. Seo se ile sa mmakatša. Ke be ke nyaka go tseba mo go oketšegilego.

Ke ile ka hwetša gore Dihlatse tša Jehofa di be di e-na le lerato la kgonthe la go rata Modimo, gomme ke ile ka kgahlwa ke ditekanyetšo tša tšona tše di phagamego tša boitshwaro. Lega go le bjalo, ke be ke e-na le dipotšišo tše dintši. Ka mo go kgethegilego, ke be ke nyaka go tseba ge e ba bahu ba ka kgona go bolela le bao ba phelago ditorong—e lego selo seo ma-Gypsy a mantši a se dumelago. Hlatse yeo e bitšwago Jean-Paul e ile ya ithapela go ithuta Beibele le nna, e diriša puku ya O ka Phela ka mo go sa Felego Paradeiseng mo Lefaseng. *

Ke ile ka bala puku ka phišego ka bošego bjo tee, gomme pelo ya-ka ile ya kgongwa ke seo ke se badilego. Ke ile ka hwetša tokologo ya kgonthe mo kgolegong! Ge mafelelong ke lokollwa kgolegong, ke ile ka ya gae ka setimela gomme mokotla wa-ka o tletše dipuku tša Beibele.

Bakeng sa go ikopanya le Dihlatse tikologong ya gešo, ke ile ka ya Holong ya Mmušo kua Martigues. Ke ile ka tšwela pele ka go ithuta Beibele, mo nakong ye ke thušwa ke modiredi wa nako e tletšego wa mofsa yo a bitšwago Eric. Ke ile ka kgaotša go kgoga lebakeng la matšatši a sego kae, gomme ka se sa hlwa ke kopana le bao e bego e le badirišani ba-ka bosenying. Ke be ke ikemišeditše go dira ka go dumelelana le Diema 27:11 yeo e rego: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” Ke ile ka hwetša Jehofa e le Tate yo lerato yo ke bego ke nyaka go mo thabiša.

Tlhohlo ya go Fetoga

Go be go se bonolo go nna go diriša melao ya motheo ya Bokriste. Ka mohlala, ke ile ka boela morago  tabeng ya bothata bja-ka bja go diriša dihlare-tagi moo go ilego gwa tšea lebaka la dibeke tše mmalwa. Eupša tlhohlo e thata go di feta ka moka go nna e be e le go fediša kganyogo ya go nyaka go itefeletša. Seo se bego se sa tsebje ke Eric ke gore ke be ke dula ke swere sethunya le gore ke be ke loga leano ka mafolofolo la go itefeletša malebana le bao ba bolailego rangwane wa-ka. Ke be ke fetša mašego ka moka ke ba tsoma.

Ge ke be ke botša Eric ka se, o ile a ntlhalosetša ka mo go kwagalago gore ke be nka se kgone go aga tswalano e botse le Modimo mola ke dula ke itlhamile e bile ke tsoma go itefeletša. Ke ile ka swanelwa ke go dira kgetho. Ke ile ka naganišiša ka mo go tseneletšego ka keletšo ya Paulo yeo e lego go Ba-Roma 12:19: “Baratwa ba-ka! Le se kê la itefeletša; šuthêlang boxale bya Modimo.” Keletšo ye gotee le thapelo e tšwago pelong di ile tša nthuša go laola maikwelo a-ka. (Psalme 55:22) Mafelelong ke ile ka lahla dibetša tša-ka. Ka December 26, 1986, ka morago ga go ithuta Beibele lebaka la ngwaga, ke ile ka bontšha boineelo bja-ka go Jehofa Modimo ka go kolobetšwa meetseng.

Lapa Lešo le a Arabela

Diphetogo tšeo ke bego ke di dirile boitshwarong bja-ka di ile tša kgothaletša batswadi ba-ka go ithuta Beibele. Ba ile ba nyalana gape, gomme mma o ile a kolobetšwa ka July 1989. ge nako e dutše e e-ya, ditho tše dingwe tše mmalwa tša lapa lešo di ile tša arabela molaetšeng wa Beibele gomme tša fetoga Dihlatse tša Jehofa.

Ka August 1988, ke ile ka dira phetho ya go ba modiredi wa nako e tletšego. Ka morago ke ile ka ratana le kgaetšedi yo mofsa phuthegong ya gešo yo a bitšwago Katia. Re ile ra nyalana ka June 10, 1989. Go be go se bonolo ngwageng wa rena wa pele re nyalane, ka gobane ke be ke sa dutše ke e-na le dipeakanyo tšeo ke bego ke swanetše go di dira tseleng yeo ke bego ke lebelela basadi ka gona. Go be go le thata go nna go diriša mantšu a 1 Petro 3:7, ao a kgothaletšago banna gore ba godiše basadi ba bona. Ke ile ka swanela ke go rapela leboelela bakeng sa go kgopela matla a gore ke fenye boikgogomošo bja-ka le go fetola tsela ya-ka ya go nagana. Dilo di ile tša kaonefala ganyenyane-ganyenyane.

Lehu la rangwane le sa dutše le nkweša bohloko kudu, gomme ka dinako tše dingwe ga ke kgone go thibela megokgo ge ke nagana ka yena. Ke katana le maikwelo a matla ao a tsošwago ke go nagana ka polao ya gagwe. Ke tšere nywaga e mentši, gaešita le ka morago ga go kolobetšwa ga-ka, ke boifa go welana le ditho tša lapa leo pele re bego re e-lwa le lona. Ke be ke tla dira’ng ge di be di ka ntlhasela? Ke be ke tla arabela bjang? Na semelo sa-ka sa kgale se be se tla ntaola?

Ka letšatši le lengwe ke ile ka nea polelo ya phatlalatša phuthegong ya kgaufsi. Moo ke ile ka bona Pepa, e lego motswalo wa banna bao ba bolailego rangwane. Ke tla dumela gore go mmona go ile gwa šikinya seka se sengwe le se sengwe sa semelo sa-ka sa Bokriste. Eupša ke ile ka hlokomologa maikwelo a-ka. Ka morago, letšatšing la ge Pepa a kolobetšwa, ke ile ka mo gokarela gomme ka mo lebogiša phethong yeo a e dirilego ya go hlankela Jehofa. Go sa šetšwe dilo ka moka tšeo di ilego tša direga, ke ile ka mo amogela e le kgaetšedi ya-ka ya moya.

Letšatši le lengwe le le lengwe ke leboga Jehofa bakeng sa go nthuša go lokologa ditlemong tša lehloyo. Nkabe ke le kae lehono ge e be e se ka kgaugelo ya Jehofa? Ka thušo ya gagwe ke thabela bophelo bjo bo thabišago bja lapa. E bile ke na le kholofelo ka bokamoso—ya lefase le lefsa leo le se nago lehloyo le bošoro. Ee, ke kgodišegile ka gohle gore kholofetšo ye ya Modimo e tla phethagatšwa: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.”—Mika 4:4.

[Mongwalo wa ka tlase]

[Seswantšho go letlakala 19]

Ke e-na le madira a go boloka khutšo kua Lebanon ka 1985

[Seswantšho go letlakala 20]

Ke e-na le Katia le barwa ba-ka e lego Timeo le Pierre