Bafsa ba a Botšiša . . .

Nka Dira Bjang Gore go Dula Ga-ka Nageng e Šele go Atlege?

“Ge ke fihla boema-fofaneng, sohle seo ke bego ke nyaka go se dira e be e le go ya gae! . . . Ke be ke lahlegetšwe ke kganyogo ya-ka ka moka ya go lekela hlogong le lethabo la-ka ka moka la seo ke se fihleletšego. Ka go lebanya, ke be ke hlologetše gae kudu go feta ka mo nkilego ka ba ka gona pele.”—Uta.

KE MAIKWELO a tšhošago go ba noši nageng e šele. Eupša bjalo ka ge sehlogo se se fetilego lelokelelong le se bontšhitše, bafsa ba bantši ba kgetha go tšea nako ba dula nageng e šele. Ba bangwe ba a ya bakeng sa go hwetša thuto goba go hwetša tlwaetšo e kgethegilego. Ba bangwe ba nyaka go ithuta leleme. Ba bangwe ba nyaka feela go hwetša tšhelete. Lega go le bjalo, ba bangwe ba hudugetše go yo hlankela dinageng di šele mo go nago le tlhokego ya baboledi ba Mmušo.

Re akanya gore o dula nageng e šele ka baka la mabaka a bohlale—mabaka ao a elago hloko dinyakwa le dipakane tša gago tša moya *—ke eng seo o ka se dirago go kgonthišetša gore go dula ga gago go tla atlega?

Ikemišetše go Itumelelanya

Sa pele o swanetše go ikemišetša go itumelelanya. Seo ga se bolele go lahla melao ya motheo ya Bokriste goba mokgwa wa gago o tlwaelegilego wa moya. Eupša go ka bolela go rata dijo tše difsa, go ithuta melao e mefsa ya setho, goba go leka ditsela tše difsa tša go dira dilo. Ditlwaelo tše tše mpsha e ka ba tše fapanego kudu go tsela yeo o bego o dira dilo ka yona morago kua gae. Eupša taelo ya Jesu ya gore re ‘se ke ra ahlola’ e ka šomišwa gabotse mo. (Mateo 7:1) Ruri, ga go na morafe goba setšo seo se nago le tokelo ya go ipolela e le se phagamego go feta tše dingwe. (Ditiro 17:26) Go fo swana le ge batho ba bagolo ba swanetše go phema go dira dipapišo tše dikgolo magareng ga bafsa ba nakong e fetilego le ba mehleng yeno, ka gona bafsa bao ba lego nageng e šele ba swanetše go phema go dira dipapišo tše dikgolo magareng ga naga e šele le ya gabo bona. (Mmoledi 7:10) Lebiša tlhokomelo dilong tše nepagetšego tšeo naga ye e mpsha le setšo di ka di neago. Gape, ge o ka ithuta leleme la naga ka lebelo kudu, kapejana o tla ikwa o le gae ga mahlaku.

Moapostola Paulo ka katlego o ile a itumelelanya le ditšo tše fapanego modirong wa gagwe bjalo ka moromiwa ka gobane o be a ikemišeditše go ba “tšohle go bohle.” (1 Ba-Korinthe 9:22, PK) Pono e swanago e ka go thuša go itumelelanya. Adrianne ke mosetsana yo a tšwago nageng e šele yo a dulago Jeremane, yo a dirago modiro wa ka gae bakeng sa lapa e le bakeng sa go hwetša madulo le dijo. O hlalosa ka gore: “Ke swanetše go ba  yo a fetogago kudu le maemo ka gobane nka se letele ba bangwe gore ba itumelelanye le nna.”

‘Ke Hlologetše Gae!’

Nakong ya dibeke tše sego kae tša mathomo, ga se mo go sa tlwaelegago go ikwa o nyamile le go hlologela gae. Beibele e bontšha gore Jakobo o be a ‘hlologetše kudu ngwako wa tatagwe,’ gaešita le ge Jakobo a bile nageng e šele nywaga e fetago e 20! (Genesi 31:30) Ka gona o se ke wa makala ge ka dinako tše dingwe o gateletšega. Ke therešo gore ge e ba o dula o nagana ka tšeo o di tlogetšego morago, o tla oketša feela maikwelo a gago a manyami. (Numeri 11:4, 5) Tsela e di phalago tšohle ya go fenya manyami ke go šomela go tlwaelana le tsela ya gago e mpsha ya bophelo le tikologo. Gaešita le ge e le mo go botse go ikgokaganya le lapa la geno ka mangwalo goba ka mogala, go leletša gae kudu go ka go thibela gore o itumelelanye le legae la gago le lefsa.

Bafsa ba bantši ba Bakriste ba hwetša gore go boela morago tseleng e tlwaelegilego ya moya ke sehlare se di phalago ka moka sa go lewa ke bodutu. (Ba-Filipi 3:16) Amber o gopola dibeke tša gagwe tša mathomo a le nageng e šele ka gore: “Ke ile ka hwetša go le thata kudu mantšiboa, ge go be go se na seo nka se dirago, ka gona ke ile ka leka go ithuta kudu le go bala puku.” Rachel yo monyenyane, mosetsana wa mo-Brithania yo a šomago bakeng sa go hwetša madulo le dijo kua Jeremane o bolela go tšwa phihlelong ya gagwe ka noši ge a eletša ka gore: “Ikakaretše di sa tloga fase. Thoma go ba gona dibokeng di sa tloga fase.” Mathomong o ka nyaka thušo e itšego bakeng sa go ya dibokeng. Eupša ka gare ga phuthego ya Bokriste, o ka hwetša bagwera ba babotse bao ba ka bago ‘bana beno le dikgaetšedi le bo-mmago.’—Mareka 10:29, 30.

Go tšea karolo modirong wa Bokriste wa boebangedi gape ke karolo ya bohlokwa ya tsela e botse e tlwaelegilego ya moya. Go bolela go ka se go hole feela moyeng eupša go tla go thuša gape go itumelelanya le setšo se sefsa le leleme.

Sa mafelelo, tšwela pele tlwaelong ya gago ya thapelo le thuto ya motho ka noši. Di bohlokwa gore o dule o phetše gabotse moyeng. (Ba-Roma 12:12; 1 Timotheo 4:15) Ka baka le, Adrianne yo go boletšwego ka yena pejana o ile a kgonthišetša gore o tlile le Beibele ya leleme la gagwe.

Go Phela le Lapa Leo o Dulago le Lona

Bafsa ba bangwe ba Bakriste ba rulagantše go dula le lapa leo le dumelago ge ba dutše ba dula nageng e šele. Gaešita le ge lapa leo o dulago le lona le ka se letelwe gore le tšee mošomo wa go ba motswadi, le ka ba borwarre bjo bobotse le mothopo wa kgothatšo ya moya.—Diema 27:17.

Gaešita le ge go le bjalo, poledišano e bulegilego le lapa leo go dulwago le lona ke ya bohlokwa bakeng sa go boloka tswalano e botse. (Diema 15:22; 20:5; 25:11) Amber o re: “O swanetše go ba le thulaganyo ya seo o tla se dirago. O swanetše go tseba ditebelelo tša bao o dulago le bona. Ebile ba swanetše go lemoga gore ditebelelo tša gago ke dife.” Hwetša gore melao ya lapa ya ka ntlong ke efe le gore o letetšwe go ba le karolo go fihla bokgoleng bofe medirong ya ka lapeng. Ditaba tše bjalo di swanetše go ahla-ahlwa gabotse.

Ka mohlala, boemo bja gago e ka ba bjo hlohlago ge e ba o šomela lapa leo le se nago ditumelo tše swanago le tša gago. Ka ge lapa le ka se kwešiše boemo bja gago melaong ya motheo ya Beibele, o ka ikhwetša o le maemong a kwanantšhago. (Diema 13:20) Go nyakega ga go phetha mediro ya ka lapeng go ka lwantšhana le boikarabelo bja moya, bjalo ka go ba gona dibokeng tša Bokriste. Ka gona ge e ba maemo ao a sa phemegego a go gapeletša go dula le lapa leo le sa dumelego go swana le wena, go ka nyakega gore o tšee megato e sego kae.

 Rachel o kgothaletša gore: “Kgonthišetša gore ba tsebe gore o Mokriste. Go kaone gore o ba botše ka potego di sa tloga fase.” Go hlalosa ditekanyetšo tša gago tša bodumedi le boitshwaro go ka šoma e le tšhireletšo. Gape o swanetše go bea molaleng go mothwadi wa gago kamoo diboka tša Bokriste le go bolela di lego bohlokwa ka gona go wena. Mafelelong, ke gabohlale go kgonthišetša gore ditaba tša bohlokwa tše bjalo ka diiri tša go šoma, nako ya go se be gona modirong le ditefo di ngwalwe fase pele ga ge o thoma go šoma. Tše di ka thibela kgateletšego yeo e ka tšwelelago ka morago.

Go Rarolla Mathata

Go sa šetšwe maiteko a gago a magolo, bothata bo sa dutše bo ka tšwelela. Ka mohlala, go thwe’ng ge e ba bao o dulago le bona ba nyaka gore o tloge legaeng la bona? Seo e ka ba se ferekanyago e le ruri. Ge e ba go tšwelela mohuta o itšego wa go se kwešišane, o ka leka go boledišana le bao o dulago le bona ka tsela ya boikokobetšo le e leka-lekanego. (Diema 15:1) Ikemišetše go amogela diphošo le ge e le dife tšeo o ka bago o di dirile. Mohlomongwe ba tla fetola megopolo ya bona. Ge e ba go se bjalo, o tla swanelwa ke go hwetša madulo a mangwe.

Mathata a mangwe a ka nyaka gore o kgopele o mongwe bakeng sa thušo. Ka mohlala, o ka ba le mathata a tša ditšhelete goba wa babja. O boifa gore batswadi ba gago ba ka tla bakeng sa go go iša gae, o ka dika-dika go ba tsebiša seo se diregago. Ka ntle le moo, ba kgole le wena ka dikhilomithara tše dintši le gona ba ka no ba ba sa tsebe kamoo ba ka lebeletšanago ka gona le boemo bjo bjalo nageng e šele. Lega go le bjalo, bagolo ba phuthego ya lefelong leo ba ka no ba ba e-na le phihlelo ya kamoo go ka lebeletšanwago le mathata a bjalo ka gona e bile ba ka kgona go nea keletšo e itšego e šomago. Ba ka ba ba kgona le go go thuša go tšea phetho ya ge e ba ye e le taba yeo e swanetšwego go išwa go batswadi ba gago.

Go Boela Gae

Go sa šetšwe mathata le ditlhohlo, go tšea nako nageng e šele e ka ba phihlelo e putsago, kudu-kudu ge e ba o e-ya moo ka baka la mabaka a moya. Ke therešo gore nako e tla fihla moo o tla swanelwago ke go boela gae. Andreas o re: “Ka dikgopolo tše tše dintši tše nepagetšego—tšeo di fošagetšego di lebalwa kapejana—go be go le thata go nna go tloga.” Gaešita le ge go le bjalo, o se ke wa letela gore bagwera ba gago goba lapa la gago kapejana ba fetole tsela ya bona ya go dira dilo ka gobane o boile le ditsela tše mpsha tša bophelo tšeo o ithutilego tšona nageng e šele. Go oketša moo, o se ke wa ba befediša ka go ba gopotša leboelela kamoo dilo di dirwago ka gona lefelong le itšego. Ka tlhago, o tla nyaka go botša mang le mang diphihlelo tša gago, eupša o se ke wa ferekana ge e ba e se bohle bao ba thabago le wena.

Go molaleng gore phetho ya go dula lebakanyana nageng e šele ke yeo e sa swanelwago go tšewa gabohwefo. Ge e ba ka morago ga go boledišana ka taba le batswadi ba gago, o phetha ka gore go na le mabaka a kwagalago a go huduga, itokišeletše go lebeletšana le ditlhohlo tšeo o tla lebeletšanago le tšona. Go fo swana le phetho e nngwe le e nngwe e kgolo yeo o lebeletšanago le yona bophelong, ke gabohlale go bala ditshenyagalelo pele.—Luka 14:28-30.

[Mongwalo wa ka tlase]

[Lepokisi/Seswantšho go letlakala 11]

Dikeletšo tša Tšhireletšego

● Boloka paseporoto ya gago, tšhelete le thekethe ya go boela morago lefelong le bolokegilego.

● Dira dikgatišo tša paseporoto ya gago gotee le tumelelo ya gago ya go tsena le/goba visa, thekethe ya gago ya go boela morago le dipampiri tše dingwe tše bohlokwa. Boloka sehlotswana se tee sa dikopi tšeo go wena, gomme o romele sehlotswana se tee go batswadi ba gago goba go bagwera gae.

● Ka mehla dula o na le dinomoro tša mogala tša batswadi ba gago goba bagwera kua gae le tša lapa leo o dulago le lona.

● Boloka boitshwaro bjo bo hlwekilego le ditho tša bong bjo fapanego le bja gago, e ka ba ka lapeng leo o dulago go lona, sekolong, mošomong goba mafelong a mangwe.

● Ithute bonyenyane mantšu a itšego a motheo le dipolelwana ka leleme la naga yeo o dulago go yona.

● Dira tlhahlobo ya ngaka pele ga ge o tloga. Kgonthišetša gore o na le sesola se se lekanego sa dihlare le ge e le dife tšeo di nyakegago.

[Seswantšho go letlakala 10]

Ge e ba go se kwešišane le lapa leo o dulago le lona go tšwelela, boledišana le bona ka tsela ya boikokobetšo