Samuele wa Bobedi 21:1-22
21 Go ile gwa ba le tlala+ mehleng ya Dafida ka mengwaga e meraro ya go latelana. Dafida a ya go botšiša Jehofa gore ke ka baka la eng go le ka tsela ye. Ke moka Jehofa a re: “Saulo le ba ntlo ya gagwe ba na le molato wa madi ka gobane o bolaile Bagibeoni.”+
2 Kgoši ya bitša Bagibeoni ya boledišana+ le bona. (Bagibeoni e be e se Baisiraele, eupša e be e le Baamore+ bao ba bego ba šetše. Ka gona Baisiraele ba be ba dirile keno ya gore ba ka se ba bolaye.+ Eupša Saulo a nyaka go ba bolaya ka gobane o be a ikemišeditše go thuša batho ba Isiraele le ba Juda.)
3 Dafida a re go Bagibeoni: “Ke le direle eng, le gona ke dire eng gore ke tloše sebe se e le gore le kgopele Jehofa gore a šegofatše batho ba gagwe?”*
4 Bagibeoni ba re: “Silifera le gauta+ di ka se phumole seo Saulo le ba lapa la gagwe ba re dirilego sona. Le gona ga re na tshwanelo ya go bolaya motho le ge e le ofe mo Isiraele.” Ke moka Dafida a re: “Ke tla le direla selo se sengwe le se sengwe seo le se nyakago.”
5 Ba re go kgoši: “Monna yo a ilego a leka go re fediša, a ba a re logela maano gore re se sa hlwa re dula tikologong le ge e le efe ya Isiraele,+
6 anke go tlišwe barwa ba gagwe ba šupa mo go rena. Re tlo ba bolaya gomme ra fega ditopo tša bona+ pele ga Jehofa kua Gibea+ e lego motse wa Saulo, yena yoo Jehofa a mo kgethilego+ gore e be kgoši.” Ke moka kgoši ya re: “Ke tla le fa bona.”
7 Eupša kgoši ya šokela Mefiboshethe+ morwa wa Jonathane morwa wa Saulo ka baka la keno yeo Dafida le Jonathane+ morwa wa Saulo ba e dirilego pele ga Jehofa.
8 Ke moka kgoši ya tšea Arimoni le Mefiboshethe, e lego barwa ba babedi ba Ritsipa+ morwedi wa Aya bao a ba belegetšego Saulo, le barwa ba bahlano ba Mikala*+ morwedi wa Saulo bao a ba belegetšego Adiriele+ morwa wa Barasilai yo a tšwago Mehola.*
9 Ke moka kgoši ya ba fa Bagibeoni gomme Bagibeoni ba fega ditopo tša bona thabeng pele ga Jehofa.+ Ka moka ga bona ba le šupa ba ile ba hwa, ba bolailwe matšatšing a mathomo a nakong ya ge go bunwa, ke gore mathomong a ge go bunwa mabele.*
10 Ke moka Ritsipa+ morwedi wa Aya a tšea mokotla a o ala godimo ga leswika go tloga nakong ya puno go fihla ge pula e nela ditopo. Ga se a ka a dumelela dinonyana di di namela mosegare goba dibata di di batamela bošego.
11 Dafida a tsebišwa seo Ritsipa morwedi wa Aya, mosadi wa serethe wa Saulo, a se dirilego.
12 Dafida a yo tšea marapo a Saulo le a morwa wa gagwe Jonathane go baetapele ba Jabeshe-gileada,+ bao ba a utswitšego mebarakeng ya Bethe-shane moo Bafilisita ba bego ba ba fegile gona letšatšing leo Bafilisita ba bolailego Saulo ka lona kua Giliboa.+
13 A tla le marapo a Saulo le a Jonathane morwa wa gagwe, ke moka banna bao a bego a na le bona ba kgoboketša marapo a banna bao ba bego ba fegilwe koteng.+
14 Ba boloka marapo a Saulo le a Jonathane morwa wa gagwe nageng ya Benjamini kua Tsela+ lebitleng la tatagwe Kishe.+ Ka morago ga gore ba dire dilo ka moka tšeo kgoši e ba laetšego gore ba di dire, Modimo o ile a ba kwa ge ba rapela ba kgopela gore a šegofatše naga.+
15 Bafilisita ba lwa le Baisiraele gape.+ Dafida le bahlanka ba gagwe le bona ba ya ba lwa le bona, eupša Dafida a lapa.
16 Ishibi-benobo yoo e lego setlogolo sa Barefaimi,+ yoo lerumo la gagwe le bego le imela dishekele*+ tše 300 tša silifera ebile a itlhamile ka sabola e mpsha, o be a ikemišeditše go bolaya Dafida.
17 Gateetee Abishai+ morwa wa Tseruya a tla a thuša Dafida+ gomme a otla Mofilisita yoo a mmolaya. Ke moka banna bao ba bego ba na le Dafida ba mmotša* ba re: “O se sa hlwa o eya le rena ntweng+ gore o se time lebone la Isiraele!”+
18 Ka morago ga moo gwa tsoga ntwa e nngwe le Bafilisita+ kua Gobo. Ke moka Sibekai+ wa Mohusha a bolaya Safi yoo e bego e le setlogolo sa Barefaimi.+
19 Gwa tsoga ntwa e nngwe gape le Bafilisita+ kua Gobo gomme Elihanani morwa wa Jaare-oregimi wa Mobetlelehema a bolaya Goliata wa Mogathe yoo kota ya lerumo la gagwe e bego e le e koto go swana le kota ya balogi.+
20 Gwa tsoga ntwa e nngwe gape kua Gathe moo go bego go na le monna yoo e bego e le yo mogolo ka tsela e sa tlwaelegago, a na le menwana e tshela diatleng ka bobedi le menwana e tshela maotong ka bobedi, ka moka ga yona e le e 24, le yena e be e le setlogolo sa Barefaimi.+
21 Monna yoo a dulela go kwera Baisiraele.+ Ka gona Jonathane morwa wa Shimei+ morwarrago Dafida a mmolaya.
22 Banna ba ba bane, e be e le ditlogolo tša Barefaimi ba kua Gathe, ba ile ba bolawa ke Dafida le bahlanka ba gagwe.+
