Dipeakanyo tša go bula

Kgetha leleme

Eya go menyu wa bobedi

Eya go dikagare

Dihlatse tša Jehofa

Sepedi

Leeto Leo le sa Lebalegego

Leeto Leo le sa Lebalegego

Ngwaga le ngwaga, batho ba diketekete ba etela le go bona meago ya ofisi ya lekala ya United States le ntlongkgolo ya lefase ka bophara ya Dihlatse tša Jehofa kua New York State. Mafelo a a bitšwa Bethele, e lego leina la Seheberu leo le bolelago “Ntlo ya Modimo.” Baeng ba tšwa kgole le kgauswi gore ba tle ba bone ge go tšweletšwa dipuku le dipukwana tšeo di theilwego Beibeleng, ba bone kamoo modiro wa rena o rulagantšwego ka gona gotee le go etela bagwera ba bona bao ba šomago moo. Morago bjale go be go na le moeng yo mongwe yoo a tlogago a ikemišeditše go tšea leeto leo.

Moeng yoo ke Marcellus, Hlatse ya Jehofa yeo e dulago Anchorage, Alaska, kua U.S.A., yo a kgonago feela go bolela mantšu a sego kae ka baka la go hwa lehlakore mengwaga e itšego e fetilego. O dula a le setulong sa digole e bile o nyaka go thušwa ka mešongwana ya letšatši le letšatši. Go sa šetšwe ditlhohlo tšeo a lebeletšanego le tšona, o be a tloga a kganyoga go etela Bethele. Morago bjale, o ile a bona toro ya gagwe e phethagala.

Corey, e lego mogwera wa Marcellus yo a ilego a mo thuša go rulaganya leeto le, o re: “Marcellus o be a sa hwe matwa. O be a fela a nteletša mogala a nyaka ke mmotše gore dithulaganyo di sepela bjang. Ka ge Marcellus a sa kgone go bolela eupša a kgona gore Ee le Aowa, ke ile ka swanela ke go mmotšiša dipotšišo tše mmalwa ge a be a nteletša mogala.” Poledišano ya bona e be e le ka mokgwa wo:

“Na o nyaka ke etla moo?”

“Aowa.”

“Na o nyaka gore ke founele ngaka?”

“Aowa.”

“Na se se mabapi le leeto la go ya Bethele?”

“Ee.”

“Ke moka ke tla swanelwa ke go hlalosa gore ditaba di sepela bjang mabapi le leeto leo. Ke be ke thabile kudu go bona a fihlelela pakane yeo.”

Marcellus o ile a fenya mapheko a mmalwa gore leeto la gagwe le atlege. Ka ge a be a sa hwetše tšhelete e ntši, o ile a e boloka ka mengwaga e mebedi gore a lefelele leeto le yago New York leo le tšeago dikhilomithara tše 5 400. Ka ge a be a golofetše, o ile a swanela go sepela le motho yo mongwe yo a bego a tla mo thuša. Mafelelong, o ile a nyaka tumelelo ya ngaka ya go tšea leeto leo, ka gona o e hweditše matšatši a sego kae pele ga ge sefofane seo a sepelago ka sona se ka rulaganywa gore se tloge.

Ge Marcellus a goroga kua New York, o ile a bontšhwa meago ya Brooklyn, Patterson le Wallkill. O bone metšhene e megolo ya go gatiša dipuku le Dibeibele gomme a ithuta go gontši kamoo modiro wa rena o rulagantšwego ka gona. O ile a ba a bona le pontšho e bitšwago “The Bible and the Divine Name” le ya “A People for Jehovah’s Name.” Ge a dutše a bogetše meago yeo o ile a dira bagwera ba bafsa ba bantši. Ruri e be e le leeto leo le sa lebalegego!

Batho ba bantši ba bolela gore leeto la go ya Bethele ga le hlalosege, o swanetše go iponela ka mahlo a gago. Eupša ge Marcellus a be a botšišwa ge e ba go be go nyakega gore a tšee leeto leo, tsela feela yeo a bego a ka araba ka yona, e be e le: “Ee. Ee. Ee!”

Leeto la go ya Bethele e ka ba leo le kgothatšago e le ruri go wena le ba lapa la gago, ka ge go be go le bjalo le ka Marcellus. Baeng ba a amogelwa diofising tša rena tša makala lefaseng ka bophara. Go re’ng o sa re etele?

 

Ithute ka mo go oketšegilego

Bethele ke Eng?

Bethele ke lefelo la moswananoši leo go lona go dirwago modiro wa bohlokwa kudu. Ithute ka bao ba šomago moo.

Go Dirwa Eng Ofising ya Lekala ya Dihlatse tša Jehofa?

Batho ka moka ba amogelegile go tlo boga diofisi tša rena tša makala. Re go kgothaletša go dira seo!