“He tuluiaga ke he kenesā haaku, fa hopoate au,” he fakamaama e Pamela. “Ka liogi au ki a Iehova ko e Atua, logona hifo e au e totokaaga mo e maeke foki au ke manamanatu fakamitaki. Lahi agaia e mamahi haaku, ka e lagomatai he liogi au ke tumau e onoonoaga mitaki. Ka hūhū e tau tagata ke he logonaaga haaku, pehē au, ‘Ai malolō au ka e fiafia a au!’”

Nakai fakatali a tautolu ke hoko e taha gagao hagahagakelea pihia ato liogi a tautolu. Feleveia oti a tautolu mo e tau paleko lalahi mo e ikiiki ti fa logona hifo e tautolu e lata ke moua e lagomatai ke fehagai. Maeke nakai e liogi ke lagomatai?

Pehē e Tohi Tapu: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.” (Salamo 55:22) Ko e manatu mafanatia mooli a ia! Ti lagomatai fēfē he liogi a koe? Ka liogi a koe ke he Atua he puhala hako to foaki atu e ia ki a koe e mena kua lata ke fehagai mo e tau paleko haau.​—Kikite e puha “ Tau Fua ka Moua e Koe he Liogi.”