Kua̱ panowa se desgracia, komati gente motajtanij «¿Té íga panoj iní̱n?». Puxsan tiyo̱lpa̱kij kua̱ tikmatij iga la Biblia kitajto̱lkuepa iní̱n tajtanilis.

1. ¿Te̱ kichij Tsitsimiʼ iga maono yej aye̱kti pan Ta̱jli?

Tsitsimiʼ akineʼ makichi̱wa yej Dios kinekiá. Yéj kinekiá iga seuʼmej makitokakan, kichij iga Adán wan Eva ayoʼ makichi̱wakan yej Dios kinekiá. Iní̱n kichij kua̱ kikajkayaj Eva (Génesis 3:1-5). Kicre̱roltij iga Jehová ayá̱ nemi kimakayaj nochi yej kinekiáj. Ken kua̱ kijlijnekiáj iga ma̱j pa̱kiáj siga ayá̱ kitajto̱lkakij Dios. Tsitsimiʼ yajki yej achto takajkayaj kua̱ kijlij Eva iga ayá̱ mikiáj. Inó̱n iga la Biblia kijtowa iga yéj «takajkaya̱wa wan yawi te̱taj de yej takajkaya̱waj» (Juan 8:44, TNM).

2. ¿Te̱ kichijkej Adán wan Eva?

Jehová kimaʼ Adán wan Eva nochi yej kinekiáj. Kijlij iga wel kikuayaj nochi ita̱kilyomej kuawimej yej onoya pan el jardín de Edén, pets se̱san yej ayá̱ (Génesis 2:15-17). Aunke ijkó̱n, yejeme̱n kikuajkej ita̱kilyo inó̱n kuawiʼ. Eva «kikuiʼ ita̱kilyo wan pe̱wa iga kikuaj». Wan de ompa, Adán «pe̱wa iga kikuaj» (Génesis 3:6). Adán wan Eva akitajto̱lkakikej Dios. Yejeme̱n ya̱yaj perfectos, inó̱n iga nochipa kichi̱wayaj yej ye̱kti. Pero, kua̱ ayoʼ kichijkej ken Dios kinekiá, peca̱rojkej wan ayoʼ kinekikej iga Dios makigoberna̱rokan. Iga kichijkej iní̱n puxsan moyo̱lmiktijkej (Génesis 3:16-19).

3. ¿Te̱ panowa wan tejeme̱n iga Adán wan Eva akitajto̱lkakikej Dios?

Kua̱ Adán wan Eva peca̱rojkej, mochijkej imperfectos, wan iga inó̱n, nochi ipilowa̱n yej kipiayaj nace̱rowayaj imperfectos. La Biblia kijtowa de Adán: «Iga itechko se̱ ta̱gaʼ yej akichij ken Dios kineʼ, ómpaya pe̱waʼ iga mochi̱wa yej aye̱kti ipan iní̱n ta̱jli, inó̱n iga mikilo, iwá̱n iná̱n nochi mikij» (Romanos 5:12).

Inó̱n iga, ¿té íga tikpano̱ltiáj yej aye̱kti? Sekin biáj, iga tikuij se decisión yej aye̱kti. Wan no̱, iga yej seuʼmej kichi̱waj. Wan sekin biáj, iga tonokej pan se lugar ka̱n ayá̱ monekiá matonokan (xiktajto̱lti Eclesiastés 9:11).

 MATIMOMACHTI̱KAN MA̱J DE INÍ̱N TEMA

4. A̱ʼ yéj itechko iga timoyo̱lmiktiáj

Komati gente kejla̱mikij iga iní̱n ta̱jli onoʼ pan ima̱ Dios. Pero, ¿yawi ijkó̱n? Xikitakan el VIDEO.

Xiktajto̱ltikan Santiago 1:13 wan 1 Juan 5:19, wan xitajto̱kan de iní̱n:

• ¿Kipiá Dios la culpa iga panowa yej aye̱kti wan iga timoyo̱lmiktiáj?

5. ¿Te̱ panoj kua̱ Tsitsimiʼ goberna̱roj?

1. A) Adán wan Eva ya̱yaj perfectos wan onoyaj pan Monsajta̱jli, pero kikakikej Tsitsimiʼ wan akichijkej yej Jehová kijlijkaj.

2.  B) Iga panoj inó̱n, pan nochi ta̱jli kalaʼ el pecado, yo̱lmiktilis wan mikilis.

3. C) Jehová kipolo̱s el pecado, yo̱lmiktilis wan mikilis. Nochi la gente mochi̱waskej seuʼ biáj perfectos wan onoskej pan Monsajta̱jli.

6. Jehová yo̱lkualo kua̱ kita iga timoyo̱lmiktiáj

¿Kén momachi̱liá Dios kua̱ kita iga timoyo̱lmiktiáj? Xikita yej kijkuilojkej el rey David wan el apóstol Pedro. Xiktajto̱ltikan Salmo 31:7 wan 1 Pedro 5:7, wan xitajto̱kan de iní̱n:

• ¿Kén timomachi̱liá kua̱ tikmati iga Jehová moyo̱lmiktiá iga tejeme̱n wan kita yej tikpano̱ltijtokej?

 TE̱ TIMOMACHTIJ

Iga yej kichijkej Tsitsimiʼ, Adan wan Eva, a̱man panowa miak tejté̱ yej aye̱kti wan pux timoyo̱lmiktiáj. Jehová yo̱lkualo kua̱ kita inó̱n wan áchisan poliwi iga yawi kipolo̱ti nochi yej te̱yo̱lmiktiá.

Matikejla̱mikikan te̱ timomachtijkej

• ¿Kén Tsitsimiʼ kikajkayaj Eva?

• ¿Te̱ panowa wan tejeme̱n iga Adán wan Eva kitokakej Tsitsimiʼ?

• ¿Té íga tikijtowaj iga Jehová yo̱lkualo kua̱ kita iga timoyo̱lmiktiáj?