Biblia yokijtojka ika aman oniaskiaj guerras, tlaloliniskia, oniaskiaj kokolistin tlen nomauaj niman okseki “miyek tlajtlamach temojtij” (Lucas 21:10, 11). Ipan septiembre de 2021 hasta agosto de 2022 a kuajli otikitakej ika yejuin teotlajtoltin inochiujtokej. Ijkuakon, miyekej melak otlajyouijkej ipampa guerra tlen opeuj ne Ucrania. Noijki ijkuakon achijtsin inoteltiaya COVID-19. Niman noijki, miyekej melak otlajyouijkej pampa melak otlaixpoliuj. Otlalolin ne Haití niman chikauak oajakakiyauj Centroamérica, Filipinas niman sureste de África. ¿Kenon otlapaleuijkej iteixpantijkauan Jehová?

 Ipan septiembre de 2021 hasta agosto de 2022, tejuamej miyekej otikinpaleuijkej ijkuak otlaixpoliuj kanaj 200 veces. Ika nochi, otikpopolojkej kanaj 12 millones de dólares. b Matikitakan kenon tikintekitiltiaj donaciones niman ijkon tikinpaleuiskej oksekimej kampa tlaixpoliui.

 Ipan 14 de agosto de 2021 ipan sur de Haití, otlalolin 7.2 ika chikauak. Melak teajman ika omijkej omemej tokniuan siuamej niman se tokniuj tlakatl. Ijkuak otlalolin miyekej melak otlajyouijkej. Se tlakatl akin iteixpantijkauj Jehová akin itoka Stephane, kijtoua: “Melak miyekej omijkej. Ipan ome metstli, nochi semanas yakaj kitokayaj”. Okse iteixpantijkauj Jehová akin itoka Éliézer, kijtoua: “Miyekej tokniuan xok kipiayaj inkal, intlaken, inzapatos niman okseki tlemach. Niman noijki pampa san nochipa tlalolintoya, miyekej ouejkauj nomojtijtoyaj”.

 Akin tiiteixpantijkauan Jehová nimantsin opeuj titlapaleuiyaj. Isucursal Haití opeuj kintemaka kajkaltsitsintin, lonas, colchones, tlen ika kintliyotiskej incelulares niman ipantsin 53 toneladas de tlakuajli. Noijki, onoyektlalijkej noso onochijchiujkej más de 100 kaltin. Ipan nochi yejuin onopopolo ipantsin se millón de dólares.

 Tokniuan melak kitlasojkamatij yejuin. Lorette kijtoua: “Oxoxoton tokal niman kampa titlanemakayaj. Nion xtikpiayaj tlen tijkuaskej. San ika, tokniuan xkeman otechkaujkej niman nochipa otechmakakej tlen techpolouaya”. Micheline kijtoua: “Nejua iuan ome nokoneuan san tichantiyaj ipan se sakakajli. Kuakon, ijkuak otlalolin melak oijtlakauj. Xtlaj ouel onikchiuj, san oniknots Jehová, niman yejua otechnankili itechkopa tokniuan. Yejuamej otexchijchiuilijkej se kualtsin tokal. Jehová melak yotechpaleui, niman nejua mojmostla nikneki niktlasojkamachilis”.

 Tekiuajkej okitakej ken otitepaleuijkej. Akin tlayekana ipan ayuntamiento de L’Asile kijtoua: “Nikneki nimechijlis ika melak kuajli tlen onenkichiujkej. Nemejuamej nimantsin onenuajlakej onentlapaleuikoj. Niman, xsan yejon, noijki nochipa nenkintlakaitaj tekiuajkej. Melak kualtsin ika nemejuamej melauak nenkinekij nentepaleuiskej, niman xsan nenkichiuaj pampa nenkinekij mamechtlaxtlauilikan. Melak kuajli nesi ika nemotlasojtlaj”.

 Ipan 24 de enero de 2022, opeuj melak ajakakiyaui Mozambique niman sakin Malaui, yejuin ajakakiyaujtli okitokayotijkej Ana. Melak chikauak okiyauj niman chikauak oajakak. Oyaj luz, okinxini puentes niman melak otlaapachiuj.

 Yejuin ajakakiyaujtli melak okimixpolo ipantsin 30,000 iteixpantijkauan Jehová akin chantij Malaui niman Mozambique. Charles, se tokniuj akin otlapaleui kampa otlaixpoliuj, kijtoua: “Xok nikmatiya tlenon nikchiuas. Ijkuak onikitak kenon tokniuan tlajyouijtoyaj niman ika nochi yokipolojkaj tlen kipiayaj, melak onechajman. Niman nochi tlakuajli tlen yejuamej yokejyeujkaj niman tlen okitokakaj oixpoliuj. Miyekej noijki oxoxotonkej inkaluan”. Niman melak techajmana ika isiuauj se tokniuj niman omemej iichpokatsitsinuan oamimijkej ijkuak lancha tlen ipan yayaj onokuep.

 Melak xkuajli tlen opanok. Ne Nchalo, Malaui, ala 1 ika tlayoua tokniuan Sengeredo okikakkej kenon atl melak chikauak uajkomontiaya inchan. Yejuin opanok pampa ome atentin melak oueyiyakej. Tokniuj Sengeredo okimijli ichanejkauan ika nonekiya nimantsin kisaskej, niman melak kuajli ika ijkon okichiujkej pampa sakin, yejon atl okixoxotoni inkal niman okuikak nochi tlen ompa kipiayaj. Yejuin tokniuan oyajkej ipan Kajli kampa tosentlaliaj tlen nokauaya media hora de inchan, san ika, aman ouejkaujkej ome hora para ajsiskej. Melak opajpatsijkej niman osiaujkej san ika, kuajli oajsikej.

 Sucursales de Malaui niman Mozambique nimantsin okitakej akinomej ontlapaleuiskiaj kampa otlaixpoliuj. Okintlajtlanilijkej tlayekankej ipan circuito niman tlayekankej, makitakan tlenon kinpolouaya tokniuan, makinyolchikauakan niman noijki makinchikauilikan intlaneltokil. Onotlalijkej miyek Grupos akin Kitaj ken Notepaleuiya. Ipampa tlen okichiujkej, tokniuan akin tlajyouijtoyaj okipixkej tlakuajli niman okseki tlen kinpolouaya. Onopopolo ipantsin 33,000 dólares para tikinpaleuiskej akin tlajyouijtoyaj niman ipantsin 300,000 dólares para tikinyektlaliskej niman tikinchijchiuaskej kaltin.

 Grupos akin Kitaj ken Notepaleuiya kuajli okitekitiltijkej donaciones. Niman melak kuajli ika ijkon okichiujkej pampa ijkuakon melak yotlapatiouaka. Ipan chikome metstin ijkuak tokniuan opeuj tlapaleuiyaj, melak opatiouak harina de maíz, otlejkok kanaj ika okpa ijkon ken kinemakaya niman yejon itlaj tlen melak notekitiltia ne Malaui. Niman noijki melak opatiouak gasolina. Para maka ueyi tomin kipopoloskej, tokniuan san kintlakouiliayaj akin ompa tlanemakayaj. Niman pampa miyek tlakuajli kikouayaj más kintemoltiliayaj, niman xok nonekiya kitlaxtlauaskej para komintitlaniliskej.

 Nochi tlen onochiuj melak okinyolchikauj tokniuan. Felisberto, se tokniuj de Mozambique, kijtoua: “Xkeman nikitaya se organización akin ijkon matepaleui ken ikalpan toTajtsin: yejuamej mitsmakaskej tlen ika timokaltis, akin tekitiskej, tlakuajli niman mitspaleuiskej ika okseki tlen mitspoloua, noijki melak kualtsin ken mitsyekanaskej. Yejuamej melauak tetlasojtlaj ijkon ken okijto Jesús ipan Juan 13:34, 35”. Ester, se tokniuj siuakaualtsintli de Malaui, akin oxoxoton nochi ikal, kijtoua: “¡Xnikmatiya tlenon nikchiuas pampa xnikpiaya tomin para nikchijchiuas okse nokal! San ika, ijkuak ouajlajkej tokniuan niman onexchijchiuilijkej se nokal, onikmachili kentla ininemiskia ipan xochitlalpan”.

 Tikmatstokej ika ipan yejuin tlaltikpaktli miyekan tlaixpoliuis, niman yejuin tlamis hasta ijkuak yejkos xochitlalpan (Mateo 24:7, 8). San ika, pampa nenkitemakaj nemodonaciones, tikmatstokej ika tokniuan nochipa kipiyaskej tlen kinpoloua. Ipan donate.jw.org uelis nenkitaskej kenon uelis nenkitemakaskej nemodonaciones. ¡Melak tiktlasojkamatij pampa nenkitemakaj tlen nenkipiyaj!