Itech iventana kampa chantiya ipan Jezreel, tekiuaj Acab kitaya itlal se tlakatl akin itoka katka Nabot, kampa kitokaya uvas. Acab kinekiya yejon tlajli niman okiyejyeko kikouilis. San ika, Nabot xokinek kinemakiltis pampa iTlanauatil Jehová kijtouaya ika xueliskia nonemakas tlajli tlen kitemakayaj tajtin. ¿Tiknemilia ika Acab okitlakaitak Nabot ipampa tlen okichiuj? Ka. Acab xok okinek uajkisas kampa kochiya nion xok okinek tlakuas pampa melak okualan.

Isiuauj Acab, Jezabel, melak xkuajli katka. Okijli iueuentsin: “Tejua titekiuaj ipan Israel. Uelis tikpiyas tlen tiknekis. Nejua nikchiuas xpiya yejon tlajli”. Yejua okintlajkuilouili tlayekankej ipan ueyikalpan, makijtokan ika Nabot okiuijuikalti toTajtsin niman ika makitemojmotlakan hasta mamiki. Tlayekankej okichiujkej ken Jezabel okimijli, sakin okijli Acab: “Nabot yomik. Iuelis tikmotlatkitis itlal kampa kitokaya uvas”.

Jezabel xsan Nabot okimikti, noijki okinmikti miyekej akin okitlasojtlakej Jehová. Jezabel okinueyichiuj tajtsitsintin niman okichiuj okseki tlen melak xkuajli. Jehová okitak nochi yejuin. ¿Tlenon kichiuiliskia?

Ijkuak Acab omik, ikoneuj Jehoram opeuj tekiuajti. Jehová okititlan se tlakatl itoka katka Jehú makitlajtlakolmakati Jezabel iuan ichanejkauan.

Jehú oyaj Jezreel ipan icarreta kampa chantiya Jezabel. Jehoram okinamikito Jehú niman okijli: “¿Onka yolseuilistli?”. Jehú okijto: “Xuelis onias yolseuilistli tla monan, Jezabel, kichiujtok tlen xkuajli”.  Jehoram okiyejyeko cholos ipan icarreta, san ika, Jehú okimotlak ika se flecha niman omik.

Kuakon Jehú oyaj kampa chantiya Jezabel. Ijkuak okitekakili ika Jehú yaya, Jezabel onotlapalyoti, okiyektlali itson niman okichiak tlakpak itech iventana. Ijkuak Jehú oajsik, Jezabel okiuijuikalti. Jehú okintsajtsili itlakeualuan Jezabel akin nemiyaj inakastlan: “Xkuajtlajkalikan”. Yejuamej okomapeujkej niman ouetstajsik ipan tlajli niman omik.

Sakin, Jehú okinmikti 70 ikoneuan Acab niman xok okitekauili manoueyichiua Baal ipan itekiuajyo. ¿Ueli tikita? Jehová kimati nochi niman ijkuak noneki, kintlajtlakolmaka akin kichiuaj tlen xkuajli.