Xuiya kampa tlen onka ijtik

Xuiya kampa tlen kipiya

 TLAMACHTIJLI 60

Se Tekiuajyotl tlen xkeman popoliuis

Se Tekiuajyotl tlen xkeman popoliuis

Se yeuajli, tekiuaj Nabucodonosor okitemik tlen xkeman kitemikiya. Melak kajmanaya yejuin niman xok ueliya kochiya. Yejua okiminnots akin tenaualuiyaj niman okimijli: “Xnechtomilikan tlen oniktemik”. Yejuamej okinankilijkej: “Xtechijli tlenon otiktemik totekiuaj”. San ika, Nabucodonosor okimijli: “¡Ka! Nemejuamej xnechijlikan tlen oniktemik, tla xninechijliaj nimechmiktis”. Kuakon oksejpa okijlikej: “Xtechijli tlenon otiktemik, niman sakin timitstomiliskej”. Yejua okijto: “Nochimej nenkinekij ninechkajkayauaskej. ¡Xnechijlikan tlenon oniktemik!”. Yejuamej okijlikej: “Xnemi nion se tlakatl akin uelis kichiuas tlen tiktlajtlani. Xueli nochiua”.

Nabucodonosor melak kualantoya, kuakon otlanauati makinmiktikan nochimej akin tlamachilisejkej itech yejon país. Noijki kinmiktiskiaj Daniel, Sadrac, Mesac niman Abednego. Daniel okitlajtlanili tekiuaj matlamachia. Daniel niman akin imiuan nouikaya okichiuilijkej teoyotl Jehová niman okitlajtlanilijkej makinpaleui. ¿Tlenon okichiuj Jehová?

Jehová okititi Daniel ipan se tlatlachalistli tlen okitemik Nabucodonosor niman okijli tlen kijtosnekiya. Uajmostla, Daniel oyaj kampa itlakeual tekiuaj niman okijli: “Maka xkinmiktikan akin tlamachilisejkej. Nejua uelis niktomilis tekiuaj tlen okitemik”. Tlakeuajli okuikak Daniel kampa Nabucodonosor. Daniel okijli tekiuaj: “NoTajtsin yomitsititi tlenon panos tlayekapan. Yejuin tlen otiktemik: otikitak kentla se tlakatl uejkapan, itsontekon tlachichiujtli ika oro, iyelpan niman imauan ika plata, ijti niman imetspatlachuan ika cobre, imetskojyouan ika hierro niman ikxiuan ika hierro iuan sokitl. Kuakon, se tetl tlen ualeuaya itech se tepetl okaxili ipan ikxiuan. Kuakon nochi oxaxaman niman onochiuj tlalpoktli, niman ajakatl okuikak tlalpoktli. Tetl onochiuj se ueyi tepetl tlen okitemilti nochi tlaltikpaktli”.

 Kuakon Daniel okijli: “Yejuin tlen kijtosneki tlen otiktemik: motekiuajyo yejua yejon tsontekomatl tlachijchiujtli ika oro. Tlen tlachijchiujtli ika plata, yes se tekiuajyotl tlen uajlas ika tlayekapan. Sakin tekiuajyotl tlen uajlas kojtik yes kentla cobre niman tlanauatis ipan nochi tlaltikpaktli. Tekiuajyotl tlen kitokas, kojtik yes ijkon ken hierro. Sa ika tlami, onias se tekiuajyotl tlen xeliujtos, seki tlen kipiyas kojtik yes ken hierro niman okseki yemanki yes ken sokitl. Yejon tetl tlen nochiua kentla se tepetl, iTekiuajyo toTajtsin tlen kinxoxotonis nochi tekiuajyomej niman xkeman tlamis”.

Nabucodonosor onotlakuankets niman onoixpilo ixpan Daniel niman okijli: “MoTajtsin omitsasikamachilti yejuin temiktli. Xnemi okse ken moTajtsin”. Nabucodonosor xokimikti Daniel, okichiuj ika makinyekana nochimej tlakamej tlamachilisejkej niman okitlali ken akin tlanauatia ipan Babilonia. ¿Otikitak kenon Jehová okinankili iteoyouj Daniel?

“Okinsentlalijkej [...] kampa ikan tlajtojli hebreo itoka Armagedón” (Apocalipsis 16:16).