Xuiya kampa tlen onka ijtik

Xuiya kampa tlen kipiya

 TLAMACHTIJLI 38

Jehová okichiuj ika Sansón makojtik

Jehová okichiuj ika Sansón makojtik

Miyekej israelitas oksejpa opeuj kinueyichiuaj tajtsitsintin, kuakon, Jehová okinkauili filisteos manotlatkitikan intlaluan israelitas. San ika, nemiyaj sekimej israelitas akin kitlasojtlayaj Jehová, ken Manóah niman isiuauj. Yejuamej xkipiayaj ikoneuan. Se tonajli Jehová okititlan iiluikaktekitkauj kampa isiuauj Manóah. Iluikaktekitketl okijli: “Tikpiyas se mokoneuj. Yejua kimakixtis Israel itech filisteos. Yejua yes se nazareo”. ¿Tikmati akinomej katkaj nazareos? Yejuamej kitekichiuiliayaj Jehová niman intekiyo melak tlasojtiya. Nazareos xkinkauiliayaj makitekikan intson.

Sakin, onemiko inkoneuj niman okitokayotijkej Sansón. Ijkuak Sansón onoskalti, Jehová okichiuj ika melak makojtik. Yejua ueliya kimiktiaya se león san ika imauan. Se tonajli, Sansón san iselti okinmikti 30 filisteos. Filisteos kitlauelitayaj niman kitejtemouiliayaj kenon kimiktiskej. Se yeuajli, ijkuak Sansón kochtoya ipan ueyikalpan Gaza, itlauelikniuan oyajkej kampa ipuertas ueyikalpan niman ompa kichiatoyaj pampa uajmostla ika kualkan kimiktiskiaj. Ika tlajkoyeuajli, Sansón onokuiteuj niman okinkopin puertas itech tepantin. Yejua okinomamalti puertas niman okimitkik ikuatipan se tepetl tlen nokauaya nisiuj Hebrón.

Sakin, filisteos okitatoj Dalila, akin iuan kistinemiya Sansón, niman okijlikej: “Melak miyek tomin timitsmakaskej, tla ueli tikmati tleka Sansón melak kojtik. Tiknekij tikasiskej niman tiktsakuaskej”. Dalila kinekiya yejon tomin kuakon okiseli tlen okijlikej. Kachtopa, Sansón xkinekiya kijlis tleka kojtik katka. San ika, pampa Dalila xokikajkauj ika kitlajtoltiaya Sansón kanon ualeuaya ikojtilis, yejua okijli: “Xkeman nechtekiliaj notson pampa ninazareo. Tla nechtekiliaj notson nikpolos nokojtilis”. ¿Xmelak ika onopopolo Sansón ijkuak okijli Dalila yejuin?

 Dalila nimantsin okimijli filisteos: “¡Inikmatstika tleka kojtik!”. Yejua okichiuj ika Sansón makochi ipan imetskojyouan, kuakon okiteijli makitekilikan itson. Dalila otsajtsik: “Sansón, ¡nikan nemij filisteos!”. Ijkuak Sansón tlachia, okimachili ika xok kojtik katka. Filisteos okajsikej, okichiujkej maka ok matlachia niman okitsajkej.

Se tonajli, melak miyekej filisteos onosentlalijkej ipan iteopan intajtsin Dagón niman tsajtsiyaj: “¡Totajtsin otechmaktili Sansón! ¡Xkuajuikakan! Matechtlamauisolti”. Okichiujkej manotelketsa itlajkotian ome pilares niman okipijpinaujtikej. Sansón otsajtsik: “Jehová, nimitstlajtlanilia, sa aman xnechmaka nokojtilis”. Sansón yotsonueueyakiyaka. Ika nochi ikojtilis, yejua okinmapeuj ipilares teopan. Kuakon teopan ouets niman okinmikti nochimej akin ompa nemiyaj, Sansón noijki omik.

“On ueyi poder yejuan topan onkaj xtotech kistikaj, yej ualejtikaj itech Dios” (2 Corintios 4:7).