Xuiya kampa tlen onka ijtik

Xuiya kampa tlen kipiya

 TLAMACHTIJLI 61

Yejuamej xonotlakuanketskej

Yejuamej xonotlakuanketskej

Sakin ijkuak tekiuaj Nabucodonosor yokitemijka itech itlaj ken se tlakatl uejkapan, okichijchiuj se tlamachijchiuajli ika oro. Okitlali ipan tlalmantli itoka Dura niman nochimej okinsentlali akin ueyixtoyaj ipan itekiuajyo noijki Sadrac, Mesac niman Abednego oyajkej. Tekiuaj otlanauati: “Ijkuak nenkikakiskej ika kintsotsonaj trompetas, arpas niman gaitas, ¡nimantsin xmotlakuanketsakan ixpan tlamachijchiuajli! Akin xkichiuas, kontlajkaliskej ijtik horno tlen tlikuitika”. ¿Notlakuanketsaskiaj hebreos ixpan yejon tlamachijchiuajli, noso san Jehová kiueyichiuaskiaj?

Kuakon tekiuaj otlanauati makitsotsonakan tlakuikajli. Nochimej onotlakuanketskej niman okiueyichiujkej tlamachijchiuajli, san ika, Sadrac, Mesac niman Abednego, xokichiujkej. Sekimej tlakamej okimitakej niman okijlikej tekiuaj: “Yejon yeyimej hebreos xkinekij kiueyichiuaskej tlamachijchiuajli tlen otikchijchiuj”. Nabucodonosor otlanauati makinuikilikan niman okimijli: “Oksejpa nimechkauilis xyejyekokan xueyichiuakan tlamachijchiuajli. Tla xnenkichiuaj nimechontlajkalis ijtik horno. Xnemi nion se tatajtsin akin uelis mechmakixtis notechkopa”. Yejuamej okinankilijkej: “Xnonekis tikyejyekoskej. ToTajtsin uelis techmakixtis. Niman maski tla xtechmakixtia, kuajli xmatsto tekiuaj, ika xtikueyichiuaskej tlamachijchiuajli”.

Nabucodonosor melak okualan. Okinnauati itlakeualuan: “¡Xotlaltikan horno chikometipan  xijkon ken kachtopa!”. Kuakon okinnauati isoldados: “Xkinsalokan yejuin tlakamej niman xkomintlajkalikan ijtik”. Horno melak totonki katka, ika yejon ijkuak soldados okinisiuijkej horno nimantsin omijkej. Yejon yeyimej hebreos ouetsitoj ijtik tlitl. Sakin, Nabucodonosor oontlachix ijtik horno, niman okitak nauimej tlakamej ompa nejnentinemiyaj, xsan yeyimej katkaj. Yejua melak onomojti niman okintlajtolti itlakeualuan: “¿Xotikomintlajkalkej yeyimej tlakamej ijtik tlitl? Nikimita nauimej, ¡niman se tlachia kentla iluikaktekitketl!”.

Nabucodonosor ononisiui itech horno niman otsajtsik: “¡Xuajkisakan, itekipanojkauan toTajtsin Akin ueyixtika!”. Nochimej otlamojkaitakej ijkuak okitakej ika Sadrac, Mesac niman Abednego ouajkiskej ijtik tlitl. Intlalnakayo, intson, intlaken xotlatlak niman yejuamej nion xpokijnekuistiyaj.

Nabucodonosor okijto: “InTajtsin Sadrac, Mesac niman Abednego melak ueyixtika. Okuajtitlan iiluikaktekitkauj makinmakixtiki. Xnemi okse ken inTajtsin”.

Ijkon ken yeyimej hebreos, ¿tikneki tiyolmelaujkanemis itech Jehová maski san tlenon mapano?

“Xmauistili [Jehová] moTeko Dios, niman san yejua xtekipano” (Mateo 4:10).