Tu li Oombangi dhaJehova, ohatu longo nuudhiginini, opo tu tunge omaukwanegumbo getu nosho wo gayalwe. Otwa simaneka Kalunga ngoka oye a toto po elongekidho lyuukwanegumbo. (Genesis 2:21-24; Aaefeso 3:14, 15) Ohe tu longo omakotampango ngoka taga adhika mOmbiimbeli, ngoka ga kwathela aantu muuyuni awuhe ya kale ye na oondjokana dha kola nokukala dhi na ombili.

Nkene Oombangi dhaJehova ohadhi kwathele omaukwanegumbo ga kale ga kola

 Ohatu ningi ngaashi tatu vulu tu landule omayele gomOmbiimbeli, oshoka ohage tu kwathele tu kale aasamane, aakulukadhi naavali ye li nawa. (Omayeletumbulo 31:10-31; Aaefeso 5:22–6:4; 1 Timoteus 5:8) Uunongo mboka tawu adhika mOmbiimbeli, ohawu kwathele omaukwanegumbo ga pondole, nokuli naangoka ga topoka palongelokalunga. (1 Petrus 3:1, 2) Tala shoka sha popiwa kuyamwe mboka kaaye shi Oombangi, mboka ookuume kawo kopandjokana ya ninga Oombangi dhaJehova:

•   Tate Clauir, gwokoBrazilia, okwa ti: “Omimvo hamano dhopetameko mondjokana yetu, okunyenyeta nokwiiyuvitha nayi okwa kala taku dhana onkandangala. Ihe sho omukulukadhi gwandje, Ivete, a ningi Ombangi yaJehova, okwa tameke okukala omunahole nomwiidhidhimiki. Omalunduluko ngoka a ningi, oga kwathela ondjokana yetu yaa teke.”

•   Agness, gwokoZambia, okwa ti: “Sho omusamane gwandje, Chansa, a tameke okukonakona Ombiimbeli nOombangi dhaJehova, osha li sha geyitha ndje, oshoka onda li tandi dhiladhila kutya ohadhi topola omaukwanegumbo gaantu. Ihe lwanima onde ke shi mona kutya Ombiimbeli oyo ya kwathela lela ondjokana yetu yi kale yi li hwepo.”

 Uuna tatu uvitha, ohatu ulukile aantu ooyakwetu nkene taya vulu okutula miilonga uunongo womOmbiimbeli mboka tawu vulu oku ya kwathela:

•  ● ya hogolole ookuume kawo kopandjokana pandunge

•  ● yi idhidhimikilathane omumvo gwawo gwotango mondjokana

•  ● yu ungaunge nawa nooyinamweno, noohemweno nosho wo noosuwala

•  ● ya kwate nawa iimaliwa

•  ● ya yande okunyenyeta

•  ● yi ilonge nkene ye na okudhimina po

•  ● ya putudhe oyana

Mbela okuya melongelokalunga lilwe ohaku etitha omaupyakadhi mondjokana?

 Eeno, omathimbo gamwe ohaku vulu. Pashiholelwa, olopota yomo 1998 ndjoka ya ningwa kehangano lyokuninga omapekapeko lyedhina Sofres, oya ti kutya ondjokana 1 yomoondjokana 20, moka mwa kwatelwa owala Ombangi yaJehova yimwe, mu na uupyakadhi wa kwata miiti, konima sho kuume kopandjokana a lundulula elongelokalunga moka a li.

 Jesus okwa li a hunganeke kutya mboka taya landula omalongo ge, otaya ka tsakaneka omashongo okuza kaakwanezimo omathimbo gamwe. (Mateus 10:32-36) Omulumentu omunandjokonona, Will Durant, okwa nyola kutya kohi yEpangelo lyaRoma, “Aakriste oya li haya lundilwa kutya ohaya teya po omaukwanegumbo,” a oshinima shoka ohashi tamanekelwa wo Oombangi dhaJehova dhimwe kunena. Mbela shika otashi ti kutya Oombangi odho hadhi etitha okwaauvathana?

 Sho Ompangu yUuthemba wOmuntu yaEuropa ya konakona omalundilo ngoka taga ti kutya Oombangi dhaJehova ohadhi teya po omaukwanegumbo, oya mono kutya iilyo yuukwanegumbo mbyoka kaayi shi Oombangi, olundji oyo unene hayi etitha okwaauvathana, molwaashoka “inaayi hala okweetha ookuume kawo ya kale ya manguluka okuninga iinima yeitaalo ndyoka ya hala nenge ye li simaneke.” Ompangu oya gwedha ko ya ti: “Oshinima shika oshi li apuhe moondjokana dhaamboka ya topoka palongelokalunga, mwa kwatelwa noondjokana moka mu na kuume gumwe kopandjokana e li Ombangi yaJehova.” b Nonando Oombangi odhi ungaungiwe nadho nayi omolwelongelokalunga lyadho, ohadhi kambadhala okulandula omayele gOmbiimbeli ngoka taga ti: “Inamu shunithila nando ogumwe uuwinayi. . . . Ngele otashi vulika, ne, kombinga yeni, ningeni ashihe shoka tamu vulu, mú kale mú na ombili naantu ayehe.” — Aaroma 12:17, 18.

Omolwashike Oombangi dhaJehova dhi itaala kutya odhi na owala okuya mondjokana naamboka yomelongelokalunga lyadho?

 Oombangi ohadhi landula elombwelo lyomOmbiimbeli, ndyoka tali ti kutya otu na okuhokana nenge okuhokanwa ‘owala mOmuwa,’ sha hala okutya, okuya mondjokana nagumwe ngoka e li meitaalo lyadho. (1 Aakorinto 7:39) Shoka oshitegelelwa shopaMbiimbeli noshi na wo uuwanawa. Pashiholelwa, oshifo Journal of Marriage and Family shomo 2010, oshi na oshitopolwa tashi ti kutya “aaihokani mboka ye li meitaalo limwe, haya ningi iinima ya faathana noye li melongelokalunga limwe,” ohaya kala ngaa ye na ekwatathano ewanawa mondjokana yawo. c

 Nonando ongawo, Oombangi dhaJehova ihadhi ladhipike aantu yomeitaalo lyadho ye ethe po ookuume kawo kopandjokana mboka kaaye shi Oombangi. Ombiimbeli otayi: “Ngele opu na omumwatate e na omukulukadhi kee shi omwiitaali, nomukulukadhi okwa zimina okukala pamwe naye, ine mu thiga po; nongele omukiintu oku na omusamane kee shi omwiitaali, nomusamane okwa zimina okukala pamwe naye, ina thiga po omusamane gwe.” (1 Aakorinto 7:12, 13) Oombangi dhaJehova ohadhi vulika koshipango shoka.