¿Yotimotlajtlani kox itech toyolilis san timauiltiaj, titekitij, timonamiktiaj, tikinpiaj tokoneuan uan tikokoxkatij noso tiueuejtij uan ompa tlami nochi? (Job 14:1, 2). Biblia techmachtia itech sekimej tlaltikpaktlakamej ixtlamatkej tlen noijki ijkon omotlajtlanijkej. (Xiktlajtolti Eclesiastés 2:11.)

Pampa tikmatiskej tleka tiyoltokej, moneki tikmatiskej ken opejki yolilistli. Miakej ixtlamatkej kijtoaj, otechchijchi Ikaj akin sapanoa ixtlamatki, ijkon kijtoaj pampa kintlajtlachialtia ken kuali chijchijtok totlalnakayo uan tokuayejyekol. (Xiktlajtolti Salmo 139:14.) Tla ijkon, Akin otechchijchi, kimati tleka tiyoltokej. Tla tejuan noijki tikmatij tleka tiyoltokej, ijkon okachi tikpatioitaskej toyolilis.

Ijkuak toTajtsin Dios okinchijchi achto tlakatl uan achto siuatl, okinmakak se kualtsin tekitl. ToTajtsin Dios okinekiaya yejuan ma yoltokan nochipa, ma kitemitikan Tlaltikpak ika inkoneuan uan ma kikuepakan nochi Tlaltikpak se Xochitlali. (Xiktlajtolti Génesis 1:28, 31.)

Maski achto tlaltikpaktlakamej amo okitlakamatkej toTajtsin Dios, ye amo okipatlak itlanekilis, nion okijto techixpoloskiaj. Biblia kijtoa toTajtsin Dios okichi miak tlamantli pampa kinmakixtis itekipanojkauan uan pampa kichiuas itlanekilis nikan Tlaltikpak. ToTajtsin Dios noijki kineki tejuatsin xiyolto nochipa. (Xiktlajtolti Salmo 37:29.) Biblia kijtoa tlen moneki tikchiuaskej pampa tiyetoskej ijkuak toTajtsin Dios kichiuas itlanekilis.