Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Septiembre de 2015

 TLAMACHTIL TLEN IKA PEUA | ¿TLEN TECHPANOA IJKUAK TIMIKIJ?

¿Tlami nochi ijkuak timikij?

¿Tlami nochi ijkuak timikij?

¿Uelis oksepa yoltoskej akinmej yomikej?

TLEN KIJTOA BIBLIA: “Ajsiki n ora ijkuak nochteh non yomikkeh iwa tooktokeh kikakiskeh itlajtol. Iwa kisaskeh de inmiketekochwah” (Juan 5:28, 29).

ToTeko Jesús okijto ijkuak ye tlanauatis kinyolitis nochtin akinmej yomikej. Fernando akin itech otimotlapouijkej itech achto tlamachtil, kijtoa: “Onimotlajtlachialti ijkuak oniktlajtolti Juan 5:28 uan 29, okichi ma nikpia chialistli tlen melauak mochiuas uan kuali ma nimokuayejyeko itech tlen panos satepan.”

Job melauak okineltokaya ajsiki tonal ijkuak toTajtsin Dios kiyolitis. Ye okichi nin tlajtlanilistli: “Tla se tlakatl miki, ¿uelis oksepa moyolitis?”. Ye kuali okimatiaya kema, ik non, okijto: “Nimochias nochi tonalmej ijkuak nikchiuas tekitl tlen moneki nikchiuas [kauitl ijkuak yetos itech Mikakoyoktli], hasta ijkuak nechpatlaskej. Tinechnotsas, uan ne nimitsnankilis” (Job 14:14, 15).

Iyolitilis Lázaro techmaka se kualtsin chialistli itech tlen panos satepan

Marta, iikni Lázaro, noijki kuali okimatiaya kinyolitiskej akinmej yomikej. Ijkuak omikik Lázaro, Jesús okilui: “Mokni moyolitis”. Uan Marta okinankili: “Milák, ne nikmati moyolitis ijkuak non yomikeh moyolitiskeh itech n iksemi tonati”. Ijkuakon, Jesús okilui: “Ne niktemaka nemílistli iwa yolílistli. Akin nechneltokas maya mamiki, yolitos nochipa” (Juan 11:23-25). Satepan Jesús okiyoliti Lázaro. Ika nin tlapoualistli timokuayejyekoaj tlen panos satepan. ¡Tiyolpakiskej miak ijkuak kinyolitiskej miakej tlaltikpaktlakamej itech nochi Tlaltikpak!

¿Yetoskej tlaltikpaktlakamej tlen moyolitiskej iluikak?

TLEN KIJTOA BIBLIA: ITlajtol toTajtsin Dios kijtoa Jesús amo okiyolitijkej ken okinyolitijkej oksekimej chikueyi tlaltikpaktlakamej. ¿Tleka? Pampa chikueyi tlaltikpaktlakamej okinyolitijkej nikan Tlaltikpak. Pero Biblia kijtoa itech iyolitilis Jesús: “Axa Cristo Jesús kajki ilwikak iyekma n Totajtsi Dios” (1 Pedro 3:21, 22). ¿San toTeko Jesús omoyoliti pampa yetos iluikak? Achto mikiskia, okinmilui imachtijkauan: “Satepa ijkuak yonia iwa yonomechmajmanili non lojar, oksepa niwalmokopas iwa nomechwikas nowa, nonyetoskeh kan Ne niyetos” (Juan 14:3).

ToTeko Jesús oyajki iluikak uan ompa otlayektlali pampa kinseliskia sekimej imachtijkauan. Biblia kijtoa yaskej iluikak 144,000 tlaltikpaktlakamej (Apocalipsis 14:1, 3). Pero ¿tlen kichiuaskej ompa akinmej yaskej iluikak?

 Ompa kipiaskej miak tekitl. Biblia kijtoa: “¡Saikpanoa yolpakilisojkeh iwa yolchipawakeh nekateh akimeh achto moyolitiskeh!, porke non ojpatia mikílistli ayakmitla weletis kintoktis. Iwa yetoskeh itiopixkawah Dios iwa n Cristo, iwa tlanawatijtoskeh iwan Cristo májtlaktli siento xiwitl” (Apocalipsis 20:6). Nochtin yejuan yetoskej tekiuajkej uan teopixkej uan ualtlanauatiskej nikan Tlaltikpak iuan toTeko Jesús.

¿Yetoskej tlaltikpaktlakamej tlen moyolitiskej nikan Tlaltikpak?

TLEN KIJTOA BIBLIA: Itech Biblia kijtoa ninmej tlajtolmej tlen okinmijto tlatitlanil Pablo: “Ne nikchia inawak Dios tlan yejwah noiwa kichiah, nochteh non yomikkeh moyolitiskeh, akimeh otlájtlakolchijkeh iwa akimeh amó” (Hechos 24:15).

ITlajtol toTajtsin Dios kijtoa kinyolitiskej sapanoa miakej tlaltikpaktlakamej

¿Akinmej amo otlajtlakolchijkej ijkon ken okijto Pablo? Ma timokuayejyekokan itech Daniel se tlakatl yolmelauak. Ye okatka se teotlajtojki uan ijkuak yimikiskia, toTajtsin Dios okilui: “Timoseuis, pero timoketsas pampa tikpias tlen moaxka ijkuak tlamiskej tonalmej” (Daniel 12:13). ¿Kanin moyolitis Daniel? Biblia kijtoa: “Yolmelauakej yetoskej itech Tlaltikpak, uan itech chantiskej nochipa” (Salmo 37:29). Noijki, Jesús okijto: “Mapakikah non moikneliah, porke Dios kinmaxkatilis n tlaltíkpaktli” (Mateo 5:5). Ijkon ken Daniel, miakej itekipanojkauan toTajtsin Dios tlen yolmelajkej moyolitiskej nikan Tlaltikpak uan uelis kipiaskej yolilistli tlen amo keman tlamis.

¿Uan “akimeh otlájtlakolchijkehijkon ken okijto Pablo? Yejuan sapanoa miakej tlaltikpaktlakamej tlen amo okixmatkej itlanauatiluan Biblia achto mikiskia. Ijkuak moyolitiskej, kixmatiskej Jehová * uan Jesús, uan ijkon uelis kintlasojtlaskej (Juan 17:3). Akinmej kitekichiuiliskej toTajtsin Dios, yoltoskej nochipa ijkon ken ye.

Akinmej kitekichiuiliskej toTajtsin Dios uelis kipiaskej yolilistli tlen amo keman tlamis ika miak pakilistli

¿Ken yetos toyolilis nikan Tlaltikpak?

TLEN KIJTOA BIBLIA: ToTajtsin Dios “kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli” (Apocalipsis 21:4). “Uan kinchijchiuaskej kalmej, uan intech chantiskej; uan kitokaskej viñas uan kikuaskej itlakilo” (Isaías 65:21).

¡Ximokuayejyeko ken sapanoa kualtsin yetos non yolilistli iuan mokalchanejkauan tlen tikintlasojtla! Pero ok moneki tiknankiliskej okse tlajtlanilistli: ¿Ken uelis tikmatiskej melauak ijkon mochiuas?

^ párr. 15 Biblia kijtoa toTajtsin Dios itoka Jehová.