Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Septiembre de 2015

 INEMILIS

Jehová yonechmakak miak tlamantli tlen amo onikchiaya

Jehová yonechmakak miak tlamantli tlen amo onikchiaya

Ijkuak onikpiaya 17 xiuitl onikatka ken oksekimej telpokamej, onechtekipachoaya tlen yejuan kintekipachoa uan oniknekiaya tlen yejuan kinekij. Onechpaktiaya niyetos iuan noyolikniuan, nimajkuis uan nimauiltis futbol. Pero se tonal nonemilis sepa omopatlak. Itlaj onechpanok ijkuak oniaya itech se motocicleta uan nochi notlalnakayo ayakmo omoliniaya, san onikoliniaya nokech uan notsonteko. Yikipiaj kanaj 30 xiuitl ijkon onechpanok uan axkan ok niuetok itech se cama.

Onimoskalti itech se altepetl tlen kajki itech ueyi altepetl España tlen itoka Alicante, ik kanin kajki ueyi atl Mediterráneo. Itech nokalijtik okatka miak ouijkayotl, ik non nochipa onikisaya. Ik kanin onichantiaya okinyektlaliayaj inllantas carros, ompa otekitiaya se tlakatl tlen omotokayotiaya José María, akin omochi noyolikni. Ye onechtlakaitaya uan kuali onechkakiaya, itlaj tlen amo okichiuaya nokalchanejkauan. Maski okipiaya 20 xiuitl okachi ke ne, ijkuak onikpiaya ouijkayotl ye okatka ken se nokni, se melauak noyolikni.

José María omomachtijtoka Biblia iuan iTlaixpantijkauan Jehová. Omotaya sapanoa okipaktiaya tlen omomachtijtoka pampa mojmostla onechtlapouiaya tlen omomachtijtoka. Pero maski onikkakiaya tlen onechiluiaya ika tlakaitalistli, amo onechpaktiaya. Ken onikatka nitelpochtli, onechpaktiaya okseki tlamantli. Pero nochi non ayakmo ijkon yetoskia.

TLEN ONECHPANOK OKIPATLAK NONEMILIS

Amo okachi nechpaktia nikijtos tlen onechpanok; san uelis nikijtos amo kuali onimokuayejyeko. San itech se tonal, nonemilis omopatlak. Ijkuak onikatka nitelpochtli onikpiaya miak chikaualistli pero satepan san onikatka itech se kali kanin tlapajtiaj itech se cama kanin ayakmo onimoliniaya. Amo onikneltokaya tlen onechpanok. Mojmostla onimotlajtlaniaya tleka ok niyoltok.

José María onechtlajpaloto uan san niman okinmili sekimej iTlaixpantijkauan Jehová tlen amo uejka ochantiayaj ma nechtlajpalotij. Ken mojmostla onechtlajpaloayaj iTlaixpantijkauan Jehová, non oajsik itech noyolo. Ijkuak onechkixtijkej san niman opejki nimomachtia Biblia. Onimomachti tleka tlaltikpaktlakamej tlajyouiaj uan mikij uan tleka toTajtsin Dios kitekauilia ma pano tlen amo kuali. Noijki onimomachti itech tlen kijtoa toTajtsin Dios panos satepan, ken itech Tlaltikpak yetoskej tlaltikpaktlakamej tlen ayakmo kipiaskej tlajtlakoli uan “nion se tlaltikpaktlakatl kijtos: ‘Nimokokoa’” (Isaías 33:24). Axkan, onimokuayejyekoaya tlen panos satepan kuali yetos.

Ijkuak onikiski itech kali kanin tlapajtiaj, kuali onimomachtijtoka Biblia. Uan opejki nio itech seki nechikolmej iuan iTlaixpantijkauan Jehová uan onitetlapouiaya ika se silla de ruedas. Itech tonal 5, metstli noviembre, xiuitl 1988, ijkuak onikpiaya 20 xiuitl, onimoapolakti itech se bañera. Jehová  onechpaleui pampa kuali nikitaskia nonemilis. ¿Ken niktlasojkamatiliskia?

NIKTEKICHIUILIA MASKI AMO NIMOLINIA

Onikmatiaya maski amo ueli nimolinia omonekiaya nimochijchikauas pampa niktekichiuilis Jehová uan non tlen oniknekiaya nikchiuas (1 Timoteo 4:15). Ijkuak opejki nimomachtia, oui onikmachili, pampa nokalchanejkauan amo okinekiayaj ma nimomachti Biblia. Pero iTlaixpantijkauan Jehová, nokniuan tlen tlaneltokaj, onechpaleuijkej. Omochijchikauaya pampa niyetos itech nechikolmej uan pampa nitetlapouis.

Pero satepan omonekiaya mojmostla ma nechpaleuikan. Onitlatemo miak uan onikajsik se kali kanin kinpaleuiaj akinmej mokokoaj itech ueyi altepetl Valencia, 160 kilómetros ik norte itech altepetl Alicante. Ompa omochi ken nokalijtik.

Maski san niuetok itech se cama, nochipa nikintlapouia oksekimej itech tlen nikneltoka

Maski amo ueli nimolinia, nikneki nochipa niktekichiuilis Jehová. Ika tomin tlen onechmakakej ijkuak onimokoko uan ika okseki tomin tlen ika onechpaleuijkej, onikmokoui se computadora tlen okitlalijkej kanin niuetok. Noijki onikmokoui se teléfono. Nochi kualkan, akin ompa tekiti kixotlaltia nocomputadora uan noteléfono. Niktekitiltia nocomputadora ika se tepostli tlen tekiti ijkuak nikolinia noixko uan nitlajkuiloa ika se teclado uan niktekitiltia noteléfono ika se tepostli tlen nikkitskia ika nokamak.

Ika se tepostli niktekitiltia noteléfono

¿Ken nechpaleuia ninmej yankuikej teposmej? Nechpaleuia pampa nikalakis itech sitio de Internet jw.org uan itech AMATLAJKUILOLMEJ ITECH INTERNET Watchtower. Ompa nikalaki pampa nechpaleuia miak. Mojmostla ompa nimomachtia amatlajkuilolmej itech Biblia miak kauitl, ijkon okachi nimomachtia itech toTajtsin Dios uan itech iyelis. Ijkuak nimomachilia noselti noso ijkuak nimoyolkokoa, nochipa ompa nikajsi se tlamachtil tlen kichiua kuali ma nimomachili.

Noijki, ika nocomputadora nikinmita nechikolmej tlen tikchiuaj tiiTlaixpantijkauan Jehová. Uan amo san nikita tlen ompa panoa, noijki nitlanankilia itech nechikolmej, nikchiua tlatlaujtilistli, nikintemaka tlamachtilmej uan nikintlajtoltia tlamachtilmej itech revista Akin Tetlapouijtok; nochi nin nikchiua kanin nika. Maski ayakmo ueli nio nechikolmej, melauak nikmachilia nipoui itech tlanechikol.

Noteléfono uan nocomputadora nechpaleuiaj ma nitetlapoui. Maski amo niueli nikintlajpaloti tlaltikpaktlakamej inkalijtik, ijkon ken kichiuaj miakej nokniuan, kema nitetlapouia. Ika yankuikej teposmej tlen nikinpia nikintlapouiaj oksekimej tlaltikpaktlakamej itech tlen nikneltoka. Nechpaktia miak nikintlapouis tlaltikpaktlakamej ika teléfono, ik non, tlayekankej  itech tlanechikol nechkauiliaj ma nikyekana tetlapouilistli ika teléfono tlen kichiuaj miakej tokniuan akinmej noijki amo ueli kisa itech inkalijtik.

Nitlamachtijtok ika Biblia

Pero amo nochi nikchiua ika yankuikej teposmej. Nochi tonalmej nechtlajpaloaj noyolikniuan. Inmiuan uitsej sekimej inyolikniuan noso inkalchanejkauan tlen kinekij momachtiskej Biblia. Ualeua nechkauilia ma nikinyekana tlamachtilmej ika Biblia. Itech okseki tonalmej, nechtlajpaloa seki kalchanejkej pampa inmiuan nimomachtis Biblia. Nechpaktia nouan ma yetokan konemej uan ma nechtlapouikan tleka kitlasojtlaj Jehová.

Nechpaktia nimomachtis Biblia iuan kalchanejkej

Niyolpaki miak pampa nechtlajpaloa miakej uan nochipa nouan katej. Miakej noyolikniuan tlen oksekan chantij nechualtlajpaloaj. Nin kintlajtlachialtia akinmej ompa tekiti. Nochipa niktlasojkamatilia Jehová pampa nikinpia miakej nokniuan.

OK NIMOCHIJCHIKAJTOK

Ijkuak ikaj nechtlajtlania ken nika, niknankilia: “¡Kuali nika, ok nimochijchikajtok!” Pero amo san ne nikpia ouijkayotl. Maski san kanin tiyetoskej noso san tlen ouijkayotl tikpiaskej, nochtin akinmej tikchiuaj ken Cristo moneki tikchikauaskej totlaneltokilis (1 Timoteo 6:12). ¿Tlen nechpaleuia ma nitlaxiko? Nochipa nimotlatlaujtia pampa niktlasojkamatilis Jehová pampa kichiua ma nikpatioita nonemilis. Noijki niktekichiuilia Jehová uan nimokuayejyekoa itech tlen kichiuas satepan.

José María

Nochipa nimokuayejyekoa itech Xochitlali tlen yetos nikan Tlaltikpak uan ken kualtsin yetos ijkuak oksepa nimotlalos uan nitsikuinis. Ualeua nikiluia noyolikni, José María, akin kipia se kokolistli tlen itoka poliomielitis: “¿Akin kitlanis tla timotlaloskej itech Xochitlali?”. Ye nechnankilia: “Amo miak ipati akin kitlanis, tlen okachi ipati ompa ma timotlalokan”.

Oui nikajsikamatis tlen onechpanok. Kuali nikmati, ijkuak onikatka nitelpochtli onikchi itlaj tlen okipatlak nonemilis. Niktlasojkamatilia miak Jehová pampa nochipa nouan kajki. Yonechmakak miak tlamantli tlen sapanoa kuali, miakej nokniuan, nikpatioita nonemilis, niyolpaki ijkuak nikinpaleuia oksekimej uan se kualtsin chialistli tlen mochiuas satepan. Tla nikijtoskia san ika seki tlajtolmej ken nimomachilia, nikijtoskia Jehová yonechmakak miak tlamantli tlen amo onikchiaya.