Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok  |  Septiembre de 2015

¿Uelis tikyolpaktiskej toTajtsin Dios?

¿Uelis tikyolpaktiskej toTajtsin Dios?

Biblia kuali tlajtoa itech sekimej tlaltikpaktlakamej. ¿Timokuayejyekoa amo keman tiyetos ken yejuan? Uelis timokuayejyekoa: “Nitlajtlakole uan amo niyolmelajki nion niyolkuali uan amo nochipa nikchiua tlen moneki nikchiuas”.

Job okatka se tlakatl tlen amo okipiaya tlajtlakoli uan yolmelajki (Job 1:1)

Biblia kijtoa Job okatka se tlakatl tlen amo okipiaya tlajtlakoli uan okatka yolmelajki (Job 1:1). Noijki kijtoa Lot okatka se “tlakatl yolchipawak” (2 Pedro 2:8). Uan itech David okijto okichiuaya tlen kuali iixpan Jehová (1 Reyes 14:8). Axkan, timomachtiskej itech innemilis ninmej tlakamej. Uan timomachtiskej 1) yejuan noijki okatkaj tlajtlakolejkej, 2) inneskayo techpaleuia uan 3) maski tinochtin titlajtlakolejkej uelis tikyolpaktiskej toTajtsin Dios.

YEJUAN NOIJKI OKATKAJ TLAJTLAKOLEJKEJ

ToTajtsin Dios “okimakixti n Lot, n yekmilaka tlakatl, non satlawel okikuejsoaya, porke okimitaya kenijki otlajtlakolchijtinemiah n tlakah” (2 Pedro 2:7)

Job okipanok miak tlamantli tlen amo kuali uan omokuayejyeko toTajtsin Dios amo okitekipachoaya tla kitlakamatiskia noso amo, pero amo kuali ijkon omokuayejyeko (Job 9:20-22). Noijki, Job omomachiliaya ye okatka se tlakatl tlen sapanoa yolkuali. Ik non, akinmej okikakiayaj omokuayejyekoayaj ye omomachiliaya okachi yolkuali uan amo toTajtsin Dios (Job 32:1, 2; 35:1, 2).

 Lot ok omokuayejyeko pampa kitlakamatis se tlanauatil tlen okimakak toTajtsin Dios. Akinmej ochantiayaj itech altepemej Sodoma uan Gomorra okatkaj sapanoa amo yolkualmej, uan Lot amo okipaktiaya ijkon ma kichiuakan. Ik non, “nochi tonati omoyolkokoaya ijkuak okitaya iwa okikakia nochi tlan pitsotik okichiwayah” (2 Pedro 2:8). ToTajtsin Dios okilui kinmixpoloskiaj nochtin akinmej ompa ochantiayaj uan omonekiaya kisaskiaj pampa momakixtiskiaj ye uan ikalchanejkauan. Omonekiaya san niman tetlakamatis; pero ye amo okinekiaya kisas itech ikalijtik. Ik non, sekimej ángeles tlen toTajtsin Dios okinualtitlanki, okinmatilankej ye uan ikalchanejkauan uan okinkixtijkej itech non altepetl (Génesis 19:15, 16).

David okitemo toTajtsin Dios ika nochi iyolo uan okichiuaya san tlen kuali (1 Reyes 14:8)

David okikauili itlalnakayo ma kichiua tlen okinekiaya, ik non, otlajtlakolchi ijkuak omotekak iuan isiua okse tlakatl. Uan amo san non: noijki otlanauati ma kimiktikan non tlakatl pampa amo ma kimati tlen okichi (2 Samuel, tlakotonal 11). Biblia kijtoa tlen okichi David okatka se tlamantli tlen amo kuali iixpan Jehová (2 Samuel 11:27).

Job, Lot uan David okichijkej tlen amo kuali. Pero ken tikitaskej, yejuan melauak okinekiayaj kitlakamatiskej toTajtsin Dios. Omoyolkuepkej ika nochi inyolo uan okipatlakej innemilis, non okipakti toTajtsin Dios. Ik non, maski okichijkej tlen amo kuali, Biblia kintokayotia tlakamej tlen otlaneltokakej.

¿KEN TECHPALEUIAJ INNESKAYO?

Kuali tikmatij tinochtin titlajtlakolejkej (Romanos 3:23). Ik non, moneki ma timoyolkuepakan uan ma tikyektlalikan nochi iuan toTajtsin Dios.

 ¿Ken okiyektlalijkej nochi Job, Lot uan David iixpan toTajtsin Dios? Job, akin okipiaya kuali iyolo, omoyolkuepki itech nochi tlen okijto uan okipatlak ikuayejyekol ijkuak toTajtsin Dios okitlapoui (Job 42:6). Lot, ijkon ken toTajtsin Dios, amo okipaktiaya auilnemilistli tlen okichiuayaj itech altepemej Sodoma uan Gomorra. Ye okitak oui kikajteuas ikalijtik. Pero satepan otetlakamatki. Okiski uan nion amo okitak tlen okikajte. Uan maski David amo okitlakamatki itlanauatil toTajtsin Dios, okiteititi okipiaya kuali iyolo: ye omoyolkuepki uan okitlatlaujti toTajtsin Dios ma kitlapojpolui (Salmo 51).

ToTajtsin Dios kimati nochtin tlaltikpaktlakamej titlajtlakolejkej. Ik non, maski nonmej tlaltikpaktlakamej otlajtlakolchijkej, ye kuali okinmitaya. ToTajtsin Dios amo techtlajtlanilia ma tikchiuakan itlaj tlen amo uelis tikchiuaskej “pampa ye kuali kimati ken tichijchijtokej, uan kilnamiki tejuan titlali” (Salmo 103:14). Ik non, ¿tlen kineki toTajtsin Dios ma tikchiuakan?

ToTajtsin Dios “kuali kimati ken tichijchijtokej, uan kilnamiki tejuan titlali” (Salmo 103:14)

¿KEN UELIS TIKYOLPAKTISKEJ TOTAJTSIN DIOS?

Moneki tikchiuaskej tlen David okilui ikone: “Uan te, Salomón nokone, xikixmati iDios motajtsin uan xiktekichiuili ika moyolo ajsitok” (1 Crónicas 28:9). ¿Tlen kijtosneki tiktekichiuiliskej toTajtsin Dios ika toyolo ajsitok? Kijtosneki tiktlasojtlaskej uan tiknekiskej tikinmixmatiskej itlanauatiluan uan tiktlakamatiskej. Amo kijtosneki nochi kuali tikchiuaskej. Akin kitekichiuilia toTajtsin Dios ika iyolo ajsitok, kitekauilia ye ma kiyekana uan ma kiyekmelaua. Ken Job ijkon okatka, toTajtsin Dios okitak ken se tlakatl tlen amo okipiaya tlajtlakoli uan yolmelajki, noijki Lot ken se “tlakatl yolchipawak” uan David okitaya ken se tlakatl tlen okichiuaya tlen kuali. Maski okichijkej tlen amo kuali, okiyolpaktijkej toTajtsin Dios.

Tiktekichiuiliskej toTajtsin Dios ika toyolo ajsitok kijtosneki tiktlasojtlaskej uan tiknekiskej tikinmixmatiskej itlanauatiluan uan tiktlakamatiskej

Tla ualeua timokuayejyekoaj itlaj tlen amo kuali, tikijtoaj itlaj tlen tepinati, noso tikchiuaj itlaj tlen amo kuali, amo ma timosotlauakan. Nochipa ma tikilnamiktokan inneskayo ninmej eyi tlakamej tlen okitekichiuilijkej toTajtsin Dios. Ye kuali kimati tinochtin titlajtlakolejkej. Pero kineki ma tiktekichiuilikan ika toyolo ajsitok, nin kijtosneki, ma tiktlasojtlakan uan ma timochijchikauakan pampa tiktlakamatiskej. Tla ijkon tikchiuaj, melauak tikyolpaktiskej toTajtsin Dios.