MASKI tajtakol tein tikselijkej, taltikpak kampa tinemij uan Satanás, techteltilanaj maj tikchiuakan tein amo kuali, uelis tikixnamikiskej nejin chikaualis. ¿Keniuj? Komo timotokiaj iuan Dios uan tikchiuaj tein techyolmajxitia Biblia tein moitani ke semi tapaleuia. Maj tikitakan ome neskayomej.

TEIN TAYOLMAJXITIA BIBLIA: “Amo xinentinemikan ijkon keme in taltikpakuani namechnajnauatia” (Romanos 12:2).

Tein yekmelauj mochiuak: Guilherme, se ueyi tanamakakej tein kayot Brasil, kijtoua ke semi teouijmaka se melaujkanemis: “Se akin tekiti ika tanamakalis, semi ijsiujka uelis peuas takajkayauas, xa porin kichikaujkauiaj maj nochi mochiua tein moixtalia kampa tekiti oso kinemilia ke sayoj ijkon uelis kintanis okseki tanamakanij. Miakej kuali kiitaj maj se temaka oso maj se kiseli tomin uan ijkon mochiuas teisa. Keman se tekiti ika tanamakalis uan se kitekitiltia miak tomin semi teouijmaka se melaujkanemis”.

Maski ijkon, Guilherme amo mokauani maj kichikaujkauikan. Yejua kimelaua: “Maski kampa se tekiti amo teyi kijtouaj komo amo se melaujkanemi, uelis se kichiuas tein kuali. Sayoj moneki maj senkis se kiixtali se melaujkanemis. Biblia nechpaleuiani maj nikita tein kuali tein kiualkui keman se monejnemiltia melauak. Amo tekuejmoloua se itanemilil, se kipia yolseuilis uan kisentokaj tepoujkaitaj. Uan no, ueli se kinpaleuia oksekin akin iniuan se moajsi”.

TEIN TAYOLMAJXITIA BIBLIA: “Naken kinejnekij kachi ok moricojtiliske, [...] niman motajtakolmakaj porin ay kichiutinemij tensa den yejuan intanejnekilis san de ne mijmikiloyot san. [...] Ika ya nojon yejuan no [moijtakojtinemij uan kinuika] [...] kampa ixpoliuilis. [...] Itanejnekilis de tomin kichiua ma onka miak tataman ten amo kuali tachiualisme” (1 Timoteo 6:9, 10).

Tein yekmelauj mochiuak: André kipia se tekitiloyan kampa kitaliaj teposmej tein tapaleuia maj moita ox mochiua tein melauak, uan seko kampa kichiua nejon tekit ompa kampa kinyekanaj mauiltianij ika fútbol tein motelixmatij. Se tonal, satepan ke mochiuak se neauiltilis tein motelnekia, André yajki kampa kitemakaskia amat tein kiixnextiaya tekit tein kichiuak. Kampa kitaxtauiskiaj, ayamo ueliaj kimakayaj porin kipoujtoyaj tomin tein kisentilijkej ijkuak kinamakakej boletos. Kemej tiotakya katka, taixyekankej ijsiujka kintaxtauij André uan oksekin.

André kimelaua tein panok: “Keman niyajtoya nochan, nikitak ke taixyekankej nechmakak okachi tomin ke tein nechmakaskia. Nikajsikamatik ke yejua xa amo keman kimatiskia akoni kimakak nejon tomin, sayoj ke no nikmatia ke nejon takat monekiskia taxtauas ika yejua itomin, yejua ika niknemilij nimokepas. Nipanok maski moajsiaj tel miakej tein kinitatoj mauiltianij uan nikepak tomin. Taixyekankej semi kimoujkaitak tein nikchiuak porin amo keman kikepilijtoyaj tomin”.

André kisentoka kijtoua: “Nejon tein nikchiuak tapaleuij maj taixyekankej semi nechpoujkaita.  Panokya miak xiujmej uan nochin akin yekinika techtakeujkaj maj tikchiuakan tekit, sayoj nejua niksentoka iniuan nitekiti. Kemej nimonejnemiltia kemej tayolmajxitia Biblia, nechixmatij ke nimelaujkanemi.”

Semi techyolchikaua tikmatiskej ke ika inepaleuil Dios, uelis tikixnamikiskej tanemililmej tein teijtakoua. Sayoj ke sejsemej taltikpakneminij amo uelis senkis kitamiskej tein amo melauak. Semi ouij kiixpoloskej tein kichiua maj onka nejon tachiualis, yejua ika taltikpakneminij tajtakouanij amo uelis kitamiskej ininselti nejon kuejmol. ¿Kijtosneki ke nochipa onkas tein amo melauak? Itech okse tamachtilis kinextia tanankilil tein kitemaka Biblia tein semi techyolchikaua.