1, 2. ¿Toni kinmachtij Jesús itatitaniluan, uan keyej?

ITECH xiuit 32, keman Jesús moajsia itech tal tein pouia Galilea, sekin itatitaniluan peuak motajtolteuiaj. Amaix tein kijkuiloj Lucas kimelaua tein panok: “Peuke motajtolteuiayaj de akoni yeski in kachi ueyi chiuke. Pero Jesús kintamachilisixmatik [...]. Ika ya nojon Jesús kikuik se pili uan kitalij inixpan. Uan [...] kinilij [...] ijkuin: -Uan nochi naken yeski ten kiseliske nijin pili para kipaleuiske sayo porin nechtasojta, yejuan nojonkes nikinpoua ke nechselijke ya Nejuatsin. Uan nochi naken yeske ten nechseliske [...] [no ijkon] kiselijtiyaske Notajtsin Dios ten nechualtitanik nikan taltikpak. Pero namechilia ke ne tagat ten amo moueyinektinemi inixpan in tagayot, yejua ne Dios kipouas se ueyi chiuke” (Luc. 9:46-48). Ika nejmachkayot, Jesús kinpaleuij itatitaniluan maj kiajsikamatikan ke monekia kinextiskej yolyemanilis.

² Judíos tein nemiaj itech yekinika siglo, ¿no kinextiayaj yolyemanilis kemej tein Jesús kiniluij imomachtijkauan maj kinextikan? Se amaix tein motelixmati, ika tajtoj tanemilil tein onkaya itech nejon tonalmej: “Judíos nochipa kiitayaj ke motelnekia kimatiskej akoni okachi ueyichiujkej, uan kintekipachouaya kimatiskej ox kipoujkaitayaj aksa kemej kinamikia” (Theological Dictionary of the New Testament [Diccionario tein kimelaua Nuevo Testamento]). Yejua ika, Jesús amo kinekia maj imomachtijkauan tanemilianij kemej nejon taltikpakneminij.

3. 1) ¿Toni kijtosneki timonejnemiltiskej kemej akin “amo moueyinektinemi”, uan keyej kemansa techouijmaka? 2) ¿Toni netajtanilmej tiknankilitij?

³ Tajtol griego tein mokepa kemej akin “amo moueyinektinemi”, kijtosneki akin yolyemanik, amo kimachilia ke okachi ueyichiujkej ke oksekin, uan akin amo moueyineki maski kipia tanauatil. Jesús kinmachtij  itatitaniluan ke motelneki maj kinextikan yolyemanilis kemej se konet uan maj amo kimachilikan ke nochi ueli kichiuaj, uan nejin tamachtilis kintelpaleuia axkan akin kichiuaj kemej Cristo ijkon kemej kinpaleuij itech yekinika siglo. Sayoj ke kemansa techouijmakas timonejnemiltiskej kemej akin “amo moueyinektinemi”, okachi itech seki taman. Kemej titajtakouanij, uelis techuikas maj timoueyichiuakan. Uan no, taltikpak tein kiixyekana Satanás, uelis techuikas maj timoueyinekikan, maj titaixnamikikan uan maj tiktemokan maj mochiua teisa tein tejuan tiknekij. ¿Toni techpaleuis maj timonejnemiltikan kemej akin “amo moueyinektinemi”? ¿Toni kijtosneki keman moijtoua ke akin “amo moueyinektinemi [...] yejua ne Dios kipouas se ueyi chiuke”? ¿Uan itech toni taman moneki tiknextiskej yolyemanilis? Maj tikitakan.

4, 5. ¿Keniuj uelis tikpiaskej yolyemanilis? Xikonijto se neskayot.

⁴ Se taman tein techpaleuis maj tiknextikan yolyemanilis, komo tikelnamikij ke Jiova tel okachi ueyi ke tejuan. Biblia kijtoua ke “amo ueli se kitamimati iajsikamatilis” (Is. 40:28). Pablo kinextij ijkuin iueyitilis: “Semi ueyi iteiknelilis de Dios, uan Yejuatsin nochi kajsikamati uan nochi momatiltijtinemi. Uan ueyi melau ke amo keman uelis tikajsikamatilijtiue itamachilis de Dios. Uan nion no keman uelis tikinmejmelauiliske oksekin de keniu Dios kichiutinemis tech niojuan” (Rom. 11:33). Tatitanil Pablo kijkuiloj nejin tajtolmej kemej ome mil xiuit achtoya uan taltikpakneminij tel miak taman momachtianij itech nejon xiujmej, sayoj ke itajtoluan kisentokaj melaujkej. Maski tikmatiskej miak tamanya, tikajsikamatij ke amo keman tiktamiixmatiskej Jiova, tein kichiua, uan tein kinemilia.

⁵ Tikajsikamatiskej ke amo uelis tikixmatiskej nochi itachijchiualis Dios, techpaleuia maj timoitakan kemej akin “amo moueyinektinemi”. Yejua nejon tein kipanok Leo. * Keman katka telpoch kitelnejnekia momachtis ciencia. Yejua kitelnekia kiajsikamatis nochi tein onkak itech iluikak. Yejua ika yajki itech se tamachtiloyan kampa momachtiskia nejon. Sayoj ke kiajsikamatik ke tein tamachtiaj tamatinij amo senkis kinpaleuia taltikpakneminij maj kiajsikamatikan tein onkak iluikak. Yejua ika peuak momachtia tanauatilmej tein kiixtaliaj tekiuanij. Mochiuak abogado uan tamelaujkej. Satepan, yejua uan inamik momachtijkej Biblia iniuan itaixpantijkauan Jiova, kiselijkej tamachtilis tein melauak uan moauijkej. Maski kiselij ueyi nemachtil, ¿toni kipaleuij maj “amo moueyinektinemi”? Yejua tanankilia: “Nikajsikamatik  ke maski tiktelixmatiskej Jiova uan tein kichijchiuak, onkak miak tamanok tein ayamo tikixmatij”.

6, 7. 1) ¿Toni ueyi neskayot techmaka iyolyemanilis Jiova? 2) ¿Keniuj iyolyemanilis Jiova techueyitalia?

⁶ Okse taman tein no techpaleuis maj tiknextikan yolyemanilis, komo tikelnamikij ke Jiova kinextia yolyemanilis. Maj tikelnamikikan ke “tiksentekitilijtokke [‘titekitij iuan’, TNM] Dios” (1 Cor. 3:9). ¡Xikonnemili nejin! Jiova akin okachi ueyi, kineki maj iuan titekitikan. Techmaka tatiochiualis maj tikteixmatiltikan kuali tanauatilmej tein kipia iTajtol, Biblia. Maski yejuatsin kichiua maj moskalti tatet tein tiktokaj uan tikatekiaj, techmaka tatiochiualis maj iuan titekitikan (1 Cor. 3:6, 7). ¡Se kuali neskayot tein techmaka! Tein melauj, iyolyemanilis Jiova techolinia maj timonejnemiltikan kemej akin “amo moueyinektinemi”.

⁷ Iyolyemanilis Jiova kitelyolchikauak David. Yejua ika mokuikatij: “Tejua tinechmakas moescudo tein nechmakixtis, uan moyolyemanilis yejua tein nechchiua maj niueyi” (2 Sam. 22:36). David kimatia ke ueyiot tein kipiak itech Israel katka porin Dios kinextij yolyemanilis keman kiitaya tein kipanouaya uan kipaleuiaya (Sal. 113:5-7). Uan axkan no ijkon techpaleuia Jiova. Nochi tein ueli tikchiuaj, tokualneskayouan oso tekit tein tikpiaj itech nechikol, nochi Jiova techmaka (1 Cor. 4:7). ¿Keyej se taltikpaknenkej akin kinextia yolyemanilis “yejua ne Dios kipouas se ueyi chiuke”? Se taman, porin mochiua se okachi kuali itekitikauj Jiova (Luc. 9:48). Maj tikitakan keniuj panoua nejon.

8. ¿Keyej akin pouij itech inechikol Dios moneki kinextiskej yolyemanilis?

⁸ Komo tiknextiaj yolyemanilis tiyolpakiskej itech nechikol, uan titapaleuiskej itech nochi tein moijtoua ompa. Ijkon kinextia tein kipanok se ichpoch akin monotsa Petra, akin itatuan katkajya itaixpantijkauan Jiova. Yejua kitemouaya maj mochiua teisa kemej yejua kinekia. Nejon kiuikak maj kikaua inechikol Dios. Xiujmej satepan, oksepa peuak youi nechikolmej, uan axkan yolpaki pouis itech inechikol Jiova uan tapaleuia itech nochi tein moijtoua ompa. ¿Toni kipaleuij maj kipata itanemilil? Yejua kimelaua: “Monekia nikajsikamatis uan nikixualtis yolyemanilis uan amo nimoueyichiuas, uan ijkon kuali nimomachiliskia itech inechikol Dios”.

9. ¿Keniuj kiita tokniuj akin yolyemanik tamachtilis tein techpaleuia maj tikixmatikan Dios, uan keniuj kipaleuia nejon itech inechikol?

⁹ Tokniuj akin kinextia yolyemanilis kiteltasojkamati nochi tein Jiova techmaka. Se taman yejua tamachtilis tein techpaleuia maj tikixmatikan. Nochipa momachtia Biblia uan kiixtajtoltia amaixmej Tanejmachtijkej uan ¡Despertad! Kiixtajtoltia yankuik amaixmej achto ke kitalis kampa kinyektalia, ijkon kemej kichiuaj miakej itekitikauan Jiova akin amo kikauaj. Kinextia yolyemanilis uan tasojkamatilis porin kiixtajtoltia uan momachtia amaixmej tein mokixtiaj itech Biblia, uan ijkon kichikaua ikuali uikalis iuan Dios, uan yejuatsin ueli okachi kimaka tekimej itech inechikol (Heb. 5:13, 14).

10. ¿Keniuj uelis timonejnemiltiskej itech nechikol kemej akin “amo moueyinektinemi”?

¹⁰ Maj tikitakan okse taman kemej “Dios kipouas se ueyi chiuke” akin “amo moueyinektinemi”. Ika inepaleuil yektikatsin espíritu, kinixtalianij tayekananij itech nochi nechikolmej. Yejuan kiitaj maj onka nechikolmej, tanojnotsalis uan tapaleuiaj maj tikpiakan se kuali uikalis iuan Dios. Keman tiyolyemankej uan tikseliaj nochi tein kiixtaliaj, titapaleuiaj  maj onka yolpakilis, yolseuilis uan maj tisenyetokan itech nechikol (xikonixtajtolti Hebreos 13:7, 17). Uan komo Jiova mitsonmakatok tatiochiualis tiontekitis kemej tayekankej oso tapaleuijkej, moneki tikontasojkamatilis.

11, 12. ¿Toni techpaleuis maj okachi tiuelikan tikseliskej tekit itech inechikol Jiova uan keyej?

¹¹ Akin monejnemiltia kemej akin “amo moueyinektinemi” yejua “ne Dios kipouas se ueyi chiuke”, tein kijtosneki ke okachi ueli kiselia tekit itech inechikol, porin iyolyemanilis kipaleuia maj mochiua se kuali itekitikauj Dios. Jesús monekik kinelnamiktis imomachtijkauan maj kinextikan yolyemanilis porin sekin tanemiliayaj kemej akin moueyichiuayaj itech nejon tonalmej. Lucas 9:46 kijtoua ke “motajtolteuiayaj de akoni yeski in kachi ueyi chiuke”. ¿No uelis tejuan tipeuaskej tikmachiliskej ke okachi tiueyichiuanimej ke okseki tokniuan oso taltikpakneminij? Itech nejin tonalmej miakej moueyichiuaj uan sayoj tanemiliaj itech inintanejnekilis. Tejuan maj amo ijkon tikchiuakan, ta maj tiknextikan yolyemanilis. Komo ijkon tikchiuaj, uan tiktayekanaltiaj itanejnekilis Jiova, tikinyolchikauaskej tokniuan keman touan yetoskej.

¹² Komo tikajsikamatij ke Jesús techyolmajxitia maj timonejnemiltikan kemej akin “amo moueyinektinemi”, techolinis maj tiknextikan yolyemanilis itech nochi tonemilis. Maj tikitakan eyi taman.

13, 14. ¿Keniuj namikuanij uelis monejnemiltiskej kemej akin “amo moueyinektinemi”, uan keniuj kinpaleuis itech ininkuali uikalis kemej namikuanij?

¹³ Itech nenamiktilis. Itech nejin tonalmej, miakej taltikpakneminij okachi kintekipachoua maj mopoujkaita tein yejuan kinnamiki uan amo kintekipachoua komo kinijtakouaj oksekin. Sayoj ke, akin yolyemanik kiselia tanemilil tein Pablo kijtoj: ‘Maj tiksentokakan ne ojtsin [...] ten kualkui yolseuilis. Uan [...] maj timosepanpaleuijtiyakan se uan okse’ (Rom. 14:19). Akin monejnemiltia kemej akin “amo moueyinektinemi”, mochikaua kuali mouikas iniuan oksekin, uan okachi iuan inamik akin kitasojta.

¹⁴ Kemej neskayot, tetakauj xa kiuelita moixpetanis ika se taman tein inamik amo kiuelita. Takat xa kinekis mokauas ichan uan kiixtajtoltis se amaix, sayoj ke siuat xa kineki takuatiuj kampa kinamakaj tapalol oso kinkalpanotiuj itasojikniuan. Siuat amo kiouijmakas kipoujkaitas itakauj komo kiita ke yolyemanik uan amo sayoj tanemilia itech itanejnekilis, ta no kiita tein yejua kiuelita. Uan takat okachi kitasojtas uan kipoujkaitas inamik komo kiita ke amo kiteltemoua maj mochiua tein yejua kineki, ta no kinemilia tein yejua kiuelita. Keman omen monejnemiltiaj kemej akin “amo moueyinektinemi”, ininkuali uikalis kemej namikuanij okachi mochikaua (xikonixtajtolti Filipenses 2:1-4).

15, 16. ¿Toni tayolmajxitij David itech Salmo 131, uan keniuj no ijkon uelis tikchiuaskej itech nechikol?

¹⁵ Itech nechikol. Itech nejin taltikpak, miakej sayoj kinemiliaj kiseliskej tein kinekij, uan kinekij nimanya. Yejuan niman yolijsiuij uan amo kiuelitaj mochiaskej. Komo tejuan timonejnemiltiaj kemej akin “amo moueyinektinemi”, techpaleuis maj tikchiakan Jiova oso maj iuan titakuaujtamatikan (xikonixtajtolti Salmo 131:1-3). Komo tiknextiaj yolyemanilis uan amo tiyolijsiuij, tikseliskej miak taman tein kuali: tikpiaskej nepaleuil, yolseuilis uan itatiochiualis Dios. ¡Yejua ika David kinyolchikauak israelitas maj kichianij maj Jiova kichiuani tein monekiskia!

 ¹⁶ Tikonchias ika yolyemanilis maj Jiova kichiua tein monekis, no uelis mitsonyolseuis kemej David (Sal. 42:5). Tejuatsin xa tikonneki okachi tiontapaleuis itech nechikol uan yejua ika ‘tikonneki tionmochiuas tayekankej’ (1 Tim. 3:1-7). Kemej tikonmati, achto moneki tikonchiuas nochi tein tionuelis uan ijkon yektikatsin espíritu mitsonpaleuis xikonpia kualneskayomej tein monekis. Sayoj ke, ¿komo tikonita ke oksekin okachi niman kiseliaj nejon tatiochiualis uan tejuatsin amo? Komo tionmonejnemiltia kemej akin “amo moueyinektinemi”, amo tionyolijsiuis ta tionmochias uan tikonsentokas tikontekitilis Jiova ika yolpakilis, uan tikonchiuas tein yeski tekit tein mitsonmakaskej.

17, 18. 1) ¿Toni tein kuali tikseliaj keman titajtanij maj techtapojpoluikan uan keman niman titetapojpoluiaj? 2) ¿Toni techyolmajxitia Proverbios 6:1-5?

¹⁷ Itech touikalis iniuan oksekin. Miakej taltikpakneminij kinouijmaka tajtaniskej maj kintapojpoluikan. Sayoj ke itekitikauan Dios kinextiaj yolyemanilis keman kijtouaj ke mopolouaj uan tajtanij maj kintapojpoluikan. Uan no niman tetapojpoluiaj keman aksa kinyolxokolia. Keman taltikpakneminij moueyichiuaj, kipiaj miak kuejmolmej, sayoj ke akin niman tetapojpoluia tapaleuia maj onka yolseuilis itech nechikol.

¹⁸ No tiknextiaj yolyemanilis keman titajtanij ika nochi toyolo maj techtapojpoluikan, porin teisa tein techpanoua kichiua maj amo ueli tikchiuakan tein timotenkaujkaj. Komo tiknextiaj yolyemanilis, tikneltokaskej ke timopolojkej, maski xa amo sayoj tejuan tikpiakej tajtakol (xikonixtajtolti Proverbios 6:1-5).

19. ¿Keyej tikteltasojkamatij maj Biblia techyolchikaua maj timonejnemiltikan kemej akin “amo moueyinektinemi”?

¹⁹ ¡Tikteltasojkamatij maj Biblia techyolchikaua maj timonejnemiltikan kemej akin “amo moueyinektinemi”! Maski kemansa techouijmakas, komo tiknemiliaj ke Jiova tel okachi ueyi ke tejuan uan tikelnamikij ke yejuatsin kinextia yolyemanilis, uelis tikixualtiskej nejin kualneskayot. Komo tikchiuaj nejin, timochiuaskej okachi kuali tiitekitikauan Jiova. Yejua ika, maj nochipa timonejnemiltikan kemej akin “amo moueyinektinemi”.