1. ¿Toni kinyolmajxitij tatitanil Pablo tokniuan taixpejpenalmej?

ITECH yekinika siglo akin kichiuayaj kemej Cristo, tatitanil Pablo kiniluij: “Amo xinentinemikan ijkon keme in taltikpakuani” (Rom. 12:2). ¿Keyej ijkon kinyolmajxitij nejin tokniuan akin motemaktijkajya iuan Dios uan katkaj taixpejpenalmej? (Rom. 1:7.)

2, 3. 1) ¿Toni kichiua Satanás tein ika kitemoua maj tikixnamikikan Jiova? 2) ¿Keniuj uelis timokixtiliskej tanemililmej tein semi chikaujkej?

² Pablo motekipachouaya porin nesi seki tokniuan tanemiliayajya kemej akin Satanás kinixyekana (Efes. 4:17-19). Nejon uelis techpanos tinochin. Satanás akin taixyekantok nikan taltikpak, kikui miak taman tein ika kitemoua kipatas totanemilil. Kemej neskayot, komo kiita ke tiknejnekij tikpiaskej miak taman uan tiyeskij tiueyichiuanimej, ika kitemos maj tikauakan Jiova. Hasta uelis kikuis tein tikpanouanij, tein kichiuaj itech toaltepeuj oso tein techmachtianij uan ika kichiuas maj titanemilikan kemej yejua kineki.

³ ¿Uelis timokixtiliskej tanemililmej tein semi chikaujkej? (2 Cor. 10:4.) Maj tikitakan tein kijtoj Pablo: “Tikuetsiltijtokej tanemililmej uan nochi tein moueyichiua tein moajokui uan kiixnamiki itaixmatilis Dios; uan tiktaliaj  kemej takeual nochi tanemilil uan ijkon tikchiuaskej maj kitakamati Cristo” (2 Cor. 10:5, TNM). Kemej tikitaj, ika inepaleuil Jiova uelis timokixtiliskej nejon tanemililmej. Ijkon kemej se pajti uelis techpaleuis ika se kokolis, iTajtol Dios uelis techpaleuis maj amo titanemilikan kemej akin Satanás kinixyekana.

4. ¿Toni monekik tikpataskej keman tikselijkej tein Biblia tamachtia?

⁴ Maj tikelnamikikan tein monekik tikpataskej keman tikselijkej tein Biblia tamachtia uan tikixtalijkej tiktekitiliskej Jiova. Miakej tikaujkej tein amo kuali (1 Cor. 6:9-11). Semi timotasojkamatij maj Dios techpaleuiani maj tikauakan nejon amo kuali tachiualismej.

5. ¿Toni ome taman technauatia Romanos 12:2?

⁵ Sayoj ke, moneki tiksentokaskej timoyekpiaskej. Maski achto ke timoauiskiaj tikaujkej seki taman tein tel amo kuali, monekiok timochikauaskej tikixtopeuaskej tein uelis kichiuas maj oksepa titajtakokan. ¿Keniuj tikchiuaj? Pablo kijtoj: “Amo xinentinemikan ijkon keme in taltikpakuani [...]. Ta, ximotekauilikan iuan Dios para ma Yejuatsin namechtamachilispatatiu” (Rom. 12:2). Tikitaj ke moneki tikchiuaskej ome taman. Yekinika, moneki maj amo timonejnemiltikanok kemej taltikpakneminij. Ojpatika, moneki maj tikpatakan kemej titanemiliaj.

6. ¿Toni techmachtia tein Jesús kijtoj itech Mateo 12:43-45?

⁶ Pablo amo sayoj ika tajtojtoya ke monekia maj moita ke timopataj, ta maj yekmelauj timopatakan (xikonita recuadro “ ¿Yekmelauj timopatanijya oso sayoj titaixkajkayauaj?”). Moneki maj tikpatakan tein tikchiuaj, tein tiknemiliaj uan tein tikmachiliaj. Yejua ika tinochin  moneki timotajtaniskej: “¿Yekmelauj nimopatatok uan ijkon nikchiuas kemej Cristo oso sayoj nitaixkajkayaujtok?”. Itech Mateo 12:43-45, Jesús ika tajtoj se neskayot tein technextilia toni moneki tikchiuaskej (xikonixtajtolti). Nejin neskayot techmachtia ke moneki tikpataskej amo kuali tanemililmej ika tanemililmej tein kiyolpaktiaj Dios.

7. ¿Keniuj uelis yekmelauj timopataskej?

⁷ ¿Yekmelauj uelis tikpataskej kemej titamatij? ITajtol Dios kijtoua: “Moneki ximoyankuikatalijtiyakan [...] tech namotanemililisuan. Uan ximotakentijtiyakan ika ne yankuikatalnamikilis ten [...] kinejneuilia Dios iyolchipaualis. Uan ika ne yankuik talnamikilis xiknextijtiyakan ne chipaukanemilis ika nochi ne yolchipaualis” (Efes. 4:23, 24). Kemej tikitaj, uelis timopataskej maski techouijmakas. Amo sayoj moneki tiktsakuiliskej amo kuali tanejnekilis tein tikpiaj uan amo tikchiuaskej tein amo kuali. Ta moneki tikyankuikataliskej totanemilil. Nejon kijtosneki tikpataskej tein tiknejnekij, tein tikchiuaj uan tein techolinia maj tikchiuakan teisa. Moneki maj nochipa timochikaujtokan.

8, 9. ¿Keniuj kinextia tein kipanok se tokniuj ke moneki tikpataskej kemej titamatij?

⁸ Maj tikitakan ineskayo se tokniuj akin tateuiaya uan tauanaya. Keman kipatak tein kichiuaya uelik moauij uan nejon tapaleuij maj kuali ika tajtokan Jiova kampa nemia. Sayoj ke se tonal, satepan ke moauij, kiixnamikik se taman. Se takat akin uintitoya ajsik ichan uan kinekia iuan moteuis. Tokniuj amo kinekik iuan moteuis, sayoj ke keman takat peuak kiuijuikaltia Jiova, amo taxikoj uan kiteuij. ¿Keyej kichiuak? Porin maski nemachtil ika Biblia kipaleuijtoyaya, ayamo kiyankuikataliaya itanemilil. Ika okseki tajtolmej, ayamo yekmelauj mopataya.

⁹ Maski ijkon, kisentokak mochikauak mopatas (Prov. 24:16). Ika ininnepaleuil tayekananij kisentokak mopatak uan satepan uelik mochiuak tayekankej. Sayoj ke, se tonal keman moajsia kalampa itech Kali kampa tiMosentiliaj, oksepa kiixnamikik se taman: se takat akin uintitoya yaya kiteuiti se tayekankej. ¿Toni kichiuak tokniuj? Ika yolseuilis uan yolyemanilis tajtoj iuan akin uintitoya, kiyolseuij uan kiuikak ichan. ¿Keyej kichiuak nejon? Porin kipatakaya itanemilil. Kipatakaya kemej tamatia, axkan yolseujkanemia uan mochiujkaya yolyemanik. Nejon tapaleuij maj kuali ika tajtokan Jiova.

10. ¿Toni kijtosneki se mopatas?

¹⁰ Amo ijsiujka ueli se kipata kemej se tamati. Xa moneki miak xiujmej senkis timochikaujtoskej (2 Ped. 1:5). Maski miak xiujmejya tiktekitilijtokej Jiova amo kijtosneki ke senkis timopatakejya. Moneki senkis timochikauaskej tikpataskej kemej titamatij. ¿Toni techpaleuis? Maj tikitakan seki taman tein moneki tikchiuaskej.

11. ¿Keniuj techpaleuia netataujtil maj tikyankuikatalikan totanemilil?

¹¹ Yekinika, moneki maj timotataujtikan uan maj titajtanikan tein salmista tajtanik. Yejua kijtoj: “Xinechmaka se yolo chipauak, noDios, uan xiktali  notech se espíritu tein yankuik, se tein amo keman mitskauas” (Sal. 51:10). Moneki tikajsikamatiskej ke moneki tikyankuikataliskej totanemilil uan maj tiktajtanikan Jiova maj techpaleui. ¿Keyej titakuaujtamatij ke techpaleuis? Maj tikitakan tein motenkauak iniuan israelitas taixnamikinij akin nemiaj itech itonaluan Ezequiel: “Nikinmakas sayoj se yolo, uan se yankuik espíritu niktalis inintech, [...] uan nikinmakas se yolo yemanik kemej nakat”, se tein mokauaskia maj Dios kiixyekana (Ezeq. 11:19). Nejin tajtolmej techyolchikauaj. Jiova kinekia kinpaleuis nejon israelitas maj mopatakan uan no kineki techpaleuis tejuan.

12, 13. 1) Kemej kijtoua Salmo 119:59, ¿itech toni moneki titanemiliskej? 2) ¿Toni moneki timotajtaniskej?

¹² Ojpatika, moneki maj titanemilikan. Mojmostaj moneki maj tikixtajtoltikan Biblia uan maj itech titanemilikan, nejon techpaleuis maj tikitakan toni moneki tikpataskej (xikonixtajtolti Salmo 119:59; Heb. 4:12; Sant. 1:25). Maj tikitakan itech toni taman titanemiliajya kemej taltikpakneminij. Moneki tikitaskej toni tein amo kuali tikchiuaj uan timochikauaskej amo tikchiuaskejok.

¹³ Kemej neskayot, uelis timotajtaniskej: “¿Nitenexikoluia?” (1 Ped. 2:1). “¿Nimoueyineki porin nikayot itech se ueyi altepet, nikpiak se ueyi nemachtil oso nitominpixkej?” (Prov. 16:5). “¿Nikinita ke amo teyi chiuanimej akin amo kipiaj tein nejua nikpia oso porin okseko kayomej?” (Sant. 2:2-4). “¿Nikuelita tein onkak nikan taltikpak kampa taixyekantok Satanás?” (1 Juan 2:15-17). “¿Nikuelita nimoixpetanis ika tein kinextia auilnemilis uan tateuilis?” (Sal. 97:10; 101:3; Amós 5:15). Tein titanankiliskej xa uelis techmatiltis toni taman moneki tikpataskej. Komo timokixtiliaj nejon amo kuali tanemililmej tikyolpaktiskej toTajtsin Jiova (Sal. 19:14).

14. ¿Keyej semi moneki maj tikinixpejpenakan kuali tasojiknimej?

¹⁴ Expatika, moneki maj tikinixpejpenakan kuali tasojiknimej. Tikitaskej oso amo, akin iniuan timouikaj uelis techpaleuiskej oso techijtakoskej (Prov. 13:20). Itech kaltamachtiloyan oso totekipan, techyoualouaj akin amo techpaleuiaj maj titanemilikan kemej Jiova. Sayoj ke, itech nechikolmej tikinajsij kuali tasojiknimej akin techpaleuiaj maj tiknextikan netasojtalis uan maj tikchiuakan tein kuali (Heb. 10:24, 25).

15, 16. ¿Keniuj Satanás kitemoua kipatas kemej titanemiliaj?

¹⁵ Maj tikelnamikikan ke Satanás kitemoua kipatas kemej titanemiliaj. Kikui tataman tamachtilis oso tanemililmej uan ika kitemoua maj amo timoixyekanakanok ika iTajtol Dios.

¹⁶ Satanás kisentoka kichiua netajtanil tein kichiuilij Eva itech xochital Edén: “¿Yekmelauj Dios kijtoj ke...?” (Gén. 3:1). Nikan kampa yejua taixyekantok, miakpa techchiuiliaj netajtanilmej tein ika ueliskia tiomeyolouaskej, kemej: “¿Yekmelauj Dios amo kiuelita maj monamiktikan ome takamej oso ome siuamej? ¿Yekmelauj Dios amo kineki xiiluitikan itech navidad oso keman aksa xiuajsi? ¿Yekmelauj nanmoDios amo kineki maj namechtalilikan esti? ¿Yekmelauj Dios akin tetasojta amo kineki iniuan ximouikakan  akin nankintasojtaj uan kinkalankixtijkej itech nanmonechikol?”.

17. 1) ¿Toni moneki tikchiuaskej keman techtajtaniaj teisa tein ika kitemouaj techomeyolotiskej? 2) Kemej kijtoua Colosenses 2:6, 7, ¿keniuj techpaleuis komo ijkon tikchiuaj?

¹⁷ Moneki titakuaujtamatiskej ke tein tikneltokaj yejua tein melauak. Komo amo tiktemouaj kuali tikajsikamatiskej tein tikneltokaj uelis kichiuas maj tiomeyolouakan. Nejon uelis kipatas totanemilil uan kikaxanis totakuaujtamatilis. Yejua ika, ¿toni moneki tikchiuaskej? ITajtol Dios techiluia maj tikyankuikatalikan totanemilil uan ijkon tejuan tikyekmatiskej ‘ten kuali; uan [...] de keniu tikyolpaktijtiyaske Dios; uan [...] de keniu tikyekajsikachiuaske ne tekit ten Dios kimonekiltiaʼ (Rom. 12:2). Nochipa timomachtiskej techpaleuis maj titakuaujtamatikan ke tein Biblia tamachtia yejua tein melauak. Uan no, senkis tikneltokaskej ke itanauatiluan Jiova melaujkej. Ijkon, tiyeskij kemej se kouit tein kuali toktok uan totakuaujtamatilis yeski chikauak (xikonixtajtolti Colosenses 2:6, 7).

18. ¿Toni techpaleuis maj amo titanemilikan kemej akin Satanás kinixyekana?

¹⁸ Tejuan moneki tikchikauaskej totakuaujtamatilis, amo akin uelis toka kichiuas. Yejua ika maj tiksentokakan tikyankuikatalikan totanemilil. Maj nochipa tiktataujtikan Jiova uan maj tiktajtanikan iespíritu. Maj tikyekitakan keniuj titanemiliaj uan toni techolinia maj tikchiuakan teisa. Maj tikintemokan kuali tasojiknimej; maj timouikakan iniuan akin techpaleuiskej maj tikpatakan totanemilil. Komo tikchiuaj nejon, techpaleuis maj amo titanemilikan kemej akin Satanás kinixyekana uan tikixnamikiskej “tanemililmej uan nochi tein moueyichiua tein moajokui uan kiixnamiki itaixmatilis Dios” (2 Cor. 10:5, TNM).