Xionyoui kampa nesi tein kipia

Xionyoui kampa nesi tein kipia

 TAMACHTILIS 25

Maj iuan titakuaujtamatikan Jiova keman timotekipachojtoskej

Maj iuan titakuaujtamatikan Jiova keman timotekipachojtoskej

“Nejua semi nimotekipachojtok.” (1 SAM. 1:15)

NEKUIKATIL 30 Notasojikniuj, noTajtsin uan noDios

TEIN MOITAS *

1. ¿Keyej moneki tikchiuaskej tein Jesús kijtoj?

KEMAN Jesús ika tajtoj itamian tonalmej, kijtoj: “Ximoyekpiakan namejuan san para ma amo kejkepto namotakuautamatilis. [...] Uan amo xiyoltanemilijtinemikan den namonemilis”, tein kijtosneki maj amo techtekipacho tein ika timoixpanoltiskej (Luc. 21:34). Semi moneki maj tikchiuakan nejon tein Jesús tanejmachtij. ¿Keyej? Porin no tikpanouaj ouijkayomej kemej tein kipanouaj oksekin.

2. ¿Toni ouijkayomej kiixnamikij tokniuan?

2 Kemansa, techtekipachoua miak taman. Maj tikitakan seki neskayomej. Se tokniuj akin itokay John, * akin kipia se kokolis tein moixmati kemej esclerosis múltiple, semi tajyouij keman inamik kikauak maski kiuikayajya diecinueve xiujmej kemej namikuanij. Satepan, ome isiuapipiluan kikaujkej Jiova. Bob uan Linda akin namikuanij, kiixnamikkej okseki taman ouijkayomej. Yejuan kipolojkej inintekiuj uan satepan ininchan. Uan no, Linda kiajxilijkej se kokolis itech iyolo tein ika ueliskia momikilis uan no kiajxilijkej artritis.

3. Kemej kijtoua Filipenses 4:6, 7, ¿toni senkis tikmatij?

3 Senkis tikmatij ke toTajtsin Jiova, akin techchijchiuak uan techtasojta, kiajsikamati keniuj timomachiliaj keman titajyouiaj. Uan kineki techpaleuis maj tikixnamikikan ouijkayomej (xikonixtajtolti Filipenses 4:6, 7). Itech iTajtol Dios, tikajsij ininneskayo miakej itekitikauan akin  kiixnamikkej tataman ouijkayomej uan techiluia keniuj yejuatsin kinpaleuij. Maj tikitakan seki neskayomej.

ELÍAS, “SE TAGAT TEN KIPIAYA NEMILIS KEME TEJUAN”

4. ¿Toni ouijkayomej kiixnamikik Elías uan toni senkis kimatia ke Jiova kichiuaskia?

4 Elías kitekitilij Jiova itech tonalmej tein semi ouijkej uan kipanok tataman ouijkayomej. Acab, semej akin tekiuajtik ompa Israel akin amo kitakamatik Jiova, monamiktij iuan Jezabel, se siuat amo yolkuali akin kiueyichiuaya tiotsin Baal. Yejuan omen kichiujkej maj israelitas kiueyichiuanij Baal uan kinmiktijkej miakej itanauatijkauan Jiova. Sayoj ke Elías choloj. Uan no, itech seki tonalmej keman amo onkaya takual amo momikilij porin takuaujtamatik iuan Jiova (1 Rey. 17:2-4, 14-16). No kitemoj inepaleuil Jiova keman kinixnamikik itanauatijkauan Baal uan akin kiueyichiuayaj uan kinyolchikauak israelitas maj kiueyichiuanij Dios akin melauak (1 Rey. 18:21-24, 36-38). Elías kiitak miak taman keniuj Jiova kimatampauij uan kipaleuij maj kixiko nejon ouijkayomej.

Jiova kititanik se ángel maj kiyolchikauati Elías (xikonita párrafo 5 uan 6) *

5, 6. Kemej kijtoua 1 Reyes 19:1-4, ¿keniuj momachilij Elías uan toni kichiuak Jiova tein ika kinextilij ke kitasojtaya?

5 (Xikonixtajtolti 1 Reyes 19:1-4). Sayoj ke, keman Jezabel kijtoj ke yaya kimiktiti, Elías mouik. Yejua ika choloj Beer-seba. Semi yolkuetaujtoya uan hasta kinekia mikis. ¿Keyej ijkon momachilij?  Porin no katka tajtakojkej uan “kipiaya nemilis keme tejuan” (Sant. 5:17). Nochi nejon ouijkayomej kitekipachojkej uan kisioujtijkej. Kinemiliaya ke nenkaj katka nochi tein ika kipaleuijka taneltokalis tein melauak, ke ompa Israel kisentokayaj kichiuayaj tein amo kuali uan ke sayoj yejua kitekitiliaya Jiova (1 Rey. 18:3, 4, 13; 19:10, 14). Xa tikmoujkaitaj kemej momachiliaya nejin tanauatijkej, sayoj ke Jiova kiajsikamatia.

6 Dios amo kiajuak Elías porin kijtoj keniuj momachiliaya, ta kipaleuij maj oksepa moyolchikaua (1 Rey. 19:5-7). Satepan, ika netasojtalis kimelauak keman kinextilij ke semi chikauak. Uan no, kiluij ke moajsiajok 7,000 israelitas akin amo kiueyichiujkaj Baal (1 Rey. 19:11-18). Ika miak taman Jiova kinextilij Elías ke kitasojtaya.

KENIUJ TECHPALEUIS JIOVA

7. ¿Keyej techyolseuia titanemiliskej kemej Jiova kipaleuij Elías?

7 ¿Tikpanotokej se ouijkayot? Tikmatiskej ke Jiova kiajsikamatia tein Elías kimachiliaya techyolchikaua. Techyolseuia tikmatiskej ke yejuatsin no techajsikamati keman titayokoxtokej. Kimati tein amo ueli tikchiuaj uan hasta tein tiknemiliaj uan tein tikmachiliaj (Sal. 103:14; 139:3, 4). Komo tiktemouaj inepaleuil Jiova ijkon kemej Elías, yejuatsin techpaleuis maj tikixnamikikan ouijkayomej (Sal. 55:22).

8. ¿Keniuj techpaleuis Jiova maj tikixnamikikan ouijkayomej?

8 Komo semi timotekipachouaj, uelis tikpiaskej tanemililmej tein amo tapaleuiaj uan tiyolkuetauiskej. Komo techpanoua nejon, maj tikelnamikikan ke Jiova techpaleuis. ¿Keniuj? Yejuatsin techyoleua maj tikiluikan nochi tein techtekipachoua uan techmatiltia ke kinankilis tonetataujtiluan (Sal. 5:3; 1 Ped. 5:7). Yejua ika, maj miakpa tiktapouikan tein techtekipachoua. Maski amo technojnotsas kemej kichiuak iuan Elías, kemaj technojnotsas ika iTajtol uan inechikol. Neskayomej tein tikixtajtoltiskej itech Biblia techyolseuiskej uan techpaleuiskej maj tikchiakan tein kuali. Uan tokniuan itech nechikol no techyolchikauaskej (Rom. 15:4; Heb. 10:24, 25).

9. ¿Keniuj uelis techpaleuis se totasojikniuj akin iuan titakuaujtamatij?

9 Jiova kiluij Elías maj kikauani maj Eliseo kichiuani seki tekit tein yejua kichiuaya. Ijkon, kimakak se itasojikniuj akin ueliskia kipaleuis keman yolkuetaujtoskia. No ijkon, komo tikpiaj se totasojikniuj akin iuan titakuaujtamatij, techpaleuis keman titajyouijtoskej (2 Rey. 2:2; Prov. 17:17). ¿Uan komo amo tikpiaj aksa akin uelis tiktapouiskej tein techtekipachoua? Maj tiktajtanikan Jiova maj techpaleui maj tikajsikan se tokniuj akin yekyolmajsitok akin uelis techyolchikauas.

10. 1) ¿Keniuj techpaleuia maj tikchiakan tein kuali tein kipanok Elías? 2) ¿Keniuj techpaleuia tein kijtoua Isaías 40:28, 29?

10 Jiova kipaleuij Elías maj taxiko keman kipanotoya ouijkayomej uan maj kitekitiliani miak xiujmej. Tein kipanok nejin tanauatijkej techpaleuia maj tikchiakan tein kuali. Xa semi timotekipachojtokej uan nejon semi techsioujtis uan techtayokoltis. Sayoj ke, komo titakuaujtamatij iuan Jiova, yejuatsin techmakas chikaualis tein techpaleuis maj tiksentokakan tiktekitilikan (xikonixtajtolti Isaías 40:28, 29).

 ANA, DAVID UAN SE SALMISTA TAKUAUJTAMATKEJ IUAN JIOVA

11-13. ¿Toni kinpanok eyi itekitikauan Dios akin nenkej ne uejkauj?

11 Biblia ininka tajtoua oksekin akin no semi tajyouijkej. Kemej neskayot, Ana semi mopinaujmatia porin amo uelia kinpiaya konemej uan no semi tajyouiaya porin okse inamik itakauj Elqaná semi ika kikejkelouaya (1 Sam. 1:2, 6). Semi motekipachouaya, yejua ika chokaya uan hasta amo kinekia takuasok (1 Sam. 1:7, 10).

12 Tekiuaj David no semi tajyouij. Maj tikitakan seki taman tein kipanok. Semi motayokoltij porin miakpa mopoloj (Sal. 40:12). Absalón, semej ikoneuan akin kitasojtaya kiixnamikik yejua ika satepan kimiktijkej (2 Sam. 15:13, 14; 18:33). Uan no, semej itasojikniuan kinekepilij (2 Sam. 16:23–17:2; Sal. 55:12-14). Miak salmos tein kijkuiloj kinextiaj tayokol tein kimachiliaya, sayoj ke no kinextiaj ke semi takuaujtamatia iuan Jiova (Sal. 38:5-10; 94:17-19).

¿Toni kipaleuij salmista maj oksepa yolpaki kitekitilis Jiova? (Xikonita párrafos 13 hasta 15) *

13 Satepan, se salmista akin tapaleuiaya “kampa kiueyichiuayaj Dios”, akin xa katka semej ichankauan levita Asaf, peuak kinnexikoluia akin amo yolkualmej. Yejua ika semi motekipachouaya uan amo yolpakia. Hasta kinemilij ke akin kitekitiliaj Dios amo kiseliaj tein kuali (Sal. 73:2-5, 7, 12-14, 16, 17, 21).

14, 15. ¿Toni techmachtia ininneskayo eyin akin ininka tajtoua Biblia?

14 Nejin eyi itekitikauan kitemojkej inepaleuil Jiova. Kitapouijkej nochi tein kipanotoyaj. Kiluijkej keyej semi motekipachojtoyaj. Uan kisentokayaj monechikouayaj kampa kiueyichiuayaj yejuatsin (1 Sam. 1:9, 10; Sal. 55:22; 73:17; 122:1).

 15 ToDios akin tetasojta sejse kinankilij. Ana amo motekipachojok (1 Sam. 1:18). David kijkuiloj: “Miak ouijkayomej kipia akin yolmelauak, sayoj ke Jiova kimakixtia itech nochi nejon” (Sal. 34:19). Uan salmista kimachilij ke Jiova kikitskilij ‘iyekmayʼ uan kiyekanak ika itayolmajxitilis. Yejua mokuikatij: “Sayoj ke nejua, semi kuali maj nimotoki iuan Dios. Niktemoua nepaleuil iuan toTajtsin Jiova akin okachi Ueyi Taixyekankej” (Sal. 73:23, 24, 28). ¿Toni techmachtiaj nejon neskayomej? Kemansa, ouijkayomej kichiuaskej maj semi timotekipachokan. Sayoj ke amo timosenkauaskej komo titanemiliaj keniuj Jiova kinpaleuiani oksekin, tiktataujtiaj uan tiktakamatij itech nochi (Sal. 143:1, 4-8).

MAJ TITAKUAUJTAMATIKAN IUAN JIOVA UAN KUALI TECHYAS

Yekinika, se tokniuj siuat amo kinekia yetos iniuan tokniuan, sayoj ke nochi mopatak keman kitemoj kinpaleuis oksekin (xikonita párrafo 16 uan 17)

16, 17. 1) ¿Keyej amo moneki tikauaskej Jiova nion tokniuan? 2) ¿Keniuj uelis timoyolchikauaskej?

16 Nejin eyi neskayomej techmachtiaj okse taman tein motelneki: maj amo tikauakan Jiova nion tokniuan (Prov. 18:1). Nancy semi tajyouij keman inamik kikauak. Kijtoua: “Miak tonalmej amo akin niknekia nikitas nion nitajtos iuan aksa. Sayoj ke okachi nitayokoyaya keman  amo niknekia niyetos iniuan tokniuan”. Nochi mopatak keman peuak kitemoua keniuj kinpaleuis akin kipiayaj ouijkayomej. Kijtoua: “Nikinkakia keman nechtapouiayaj keniuj momachiliayaj. Nikitak ke niktemos nikinajsikamatis, nechpaleuij maj amo semi nitanemilianiok itech nokuejmoluan”.

17 Uelis timoyolchikauaskej keman tiyouij nechikolmej. Keman tiyouij, tikauaj maj Jiova okachi techpaleui uan maj techyolseui (Sal. 86:17). Ompa techyolchikaua ika iyektikatsin espíritu, iTajtol uan itekitikauan. Uan no, timosenyolchikauaj iniuan tokniuan (Rom. 1:11, 12). Se tokniuj siuat akin itokay Sofía, kijtoj: “Jiova uan tokniuan nechpaleuijkej maj amo nimosenkaua. Nechtelpaleuij niyas nechikolmej. Nikitani ke keman okachi nitanojnotsa uan nitapaleuia itech nechikol, okachi amo ouij nikixnamiki ouijkayomej uan netekipacholmej”.

18. ¿Toni uelis techmakas Jiova keman tiyolkuetaujtoskej?

18 Keman tiyolkuetaujtoskej maj tikelnamikikan ke Jiova amo sayoj motenkaua kitamis tajyouilis, ta no kineki techpaleuis axkan. Kichiua maj tiknekikan tikixnamikiskej ouijkayomej uan ‘techchikaualismakatiu’ uan nejon techpaleuia maj amo timosenkauakan (Filip. 2:13).

19. ¿Toni techyekiluia Romanos 8:37-39?

19 (Xikonixtajtolti Romanos 8:37-39). Tatitanil Pablo techmatiltia ke nion teyi uelis kichiuas maj Dios amo techtasojta. Yejua ika, ¿keniuj uelis tikinpaleuiskej tokniuan akin kiixnamiktokej ouijkayomej? Itech okse tamachtilis tikitaskej keniuj uelis tikinikneliskej uan tikinpaleuiskej, ijkon kemej kichiua Jiova.

NEKUIKATIL 44 Netataujtil tein kichiua akin tayokoxtok

^ párr. 5 Miak tonalmej se tel tajyouis uelis kichiuas maj se kokolispeua uan maj se motayokolti. ¿Keniuj uelis techpaleuis Jiova? Itech nejin tamachtilis, tikitatij keniuj kipaleuij Elías. No tikitatij ininneskayo eyin akin ininka tajtoua Biblia tein techmachtis tein moneki tikchiuaskej uan ijkon tikseliskej inepaleuil Dios.

^ párr. 2 Itech nejin tamachtilis mopatakej tokaymej.

^ párr. 53 TEIN NESI ITECH TAIXKOPIN: Iángel Jiova yolik kijxitia Elías uan kimaka at uan pan.

^ párr. 55 TEIN NESI ITECH TAIXKOPIN: Se akin ichankauj Asaf kijkuiloua salmos uan yolpaki keman mokuikatia iniuan okseki levitas.