Mistoqsijiet mill-Qarrejja
Mistoqsijiet mill-Qarrejja
Isaija 30:21 għalfejn jitkellem dwar il-kelma taʼ Jehovah bħala li toħroġ “minn warajk,” ladarba l-vers taʼ qabel ipoġġi lil Jehovah fuq quddiem billi jgħid, “Għajnejk jaraw l-Imgħallem tiegħek”?
Isaija 30:20, 21 jgħid: “Ma jinħebiex iżjed minnek l-Imgħallem tiegħek: għajnejk jaraw l-Imgħallem tiegħek. Minn warajk jisimgħu widnejk kliem li jwissik u jgħidlek: ‘Din hi t-triq; għaddi minnha, sew jekk tikser lejn il-lemin, sew lejn ix-xellug.’”
Jekk nieħdu dan il-kliem b’mod letterali, il-qarrej jara lil Jehovah, l-Imgħallem tiegħu, quddiemu imma jismaʼ Leħnu minn warajh. Iżda, il-kliem huwa figurattiv u għandu jinftiehem b’mod figurattiv.
Il-figura tat-taħdit li jġibilna f’moħħna l-vers 20 hija taʼ qaddej li jservi lil sidu, dejjem lest li jagħmel dak li jgħidlu sidu. Bħal dak il-qaddej li josserva b’attenzjoni id sidu sabiex jagħraf xi jkun irid, in-nies taʼ Jehovah illum jinsabu attenti ħafna għall-istruzzjonijiet progressivi bbażati fuq il-Bibbja li jagħti Jehovah permezz taʼ l-organizzazzjoni tiegħu fuq l-art. (Salm 123:1, 2) Iva, huma jaġixxu fuq id-direzzjoni li jagħti hu, billi dejjem joqogħdu għassa għal dak li Jehovah jgħarraf permezz taʼ “l-ilsir leali u diskret.”—Mattew 24:45-47, NW.
Xi ngħidu, imbagħad, għall-kelma li l-qaddejja tiegħu jisimgħu minn wara? Huwa raġunevoli li nikkonkludu li l-leħen minn wara huwa l-leħen t’Alla mill-passat, li jitkellem permezz tal-Kelma miktuba tiegħu kif tiġi mfissra ċar mill-“prokuratur leali.” (Luqa 12:42, NW) Il-qaddejja t’Alla taʼ llum jisimgħu leħnu billi jistudjaw bir-reqqa l-Bibbja u japplikaw il-prinċipji tagħha f’ħajjithom bl-għajnuna tal-pubblikazzjonijiet preparati mill-“ilsir leali u diskret,” “il-prokuratur leali.” Billi jħarsu lejn, jew joqogħdu għassa, għad-direzzjoni f’waqtha li l-Imgħallem il-Kbir jipprovdi u billi jistudjaw il-Kelma t’Alla, miktuba sekli ilu, il-qaddejja tiegħu jistgħu jarawh figurattivament quddiemhom u jisimgħu leħnu minn wara.—Rumani 15:4.