Ta eo jej Katak jen Jisõs

Kin Mour in Baamle

Mour in mare rõt eo ej bõktok lemõnõnõ ñõn baamle ko?

Mour in mare ej juõn bujen ekwojarjar. Ke rar kajitõk iben Jisõs elañe emelim ñõn an juõn jibil, ear uak im ba: “Kom ar jab konono ilo buk, Eo e ar kõmõn ir ke ejino, E ar kõmõn ir man im kõra, im ba, kin men in man e naj likit jemen im jinen, im e naj ber iben lio belen: Im irro re naj juõn wõt kõniek ke? Kin men eo irro re jab ruo, a juõn wõt kõniek. Inem men eo Anij e ar kobaik, armij en jab kijbili. . . . Jabrewõt eo e naj jolok lio belen, elañe e jab kin lũñ, im e naj belek bar juõn, ej lũñ.” (Matu 19:​4-6, 9) Ñe dri belele ro rej lor nan in kakabilek in an Jisõs im rej tiljek ñõn dron, aolep ro ilo baamle eo renaj ainemõn im mõnõnõ.

Etke baamle ko rej mõnõnõ elañe rej yokwe Anij?

Jisõs ear ba: “Kwon yokwe Iroij am Anij kin aolepen buruõm im kin aolepen am, im kin am lemnok otemjej. Eñin kien eo elap im mokta.” Ta kien eo elaptata kein karuo? Jisõs ej uak: “Kwon yokwe dri turõm [ekoba ro uan baamle eo am] im einwõt kwe.” (Matu 22:​37-​39) Inem, ki eo ñõn an juõn baamle lemõnõnõ ej ilo an or juõn kõtan emõn iben Anij, kinke ar yokwe e ej kamakõt kij ñõn ar yokwe dron.

 Ewi wãwen dri belele ro remaroñ kõmõn bwe ro beleir ren lo mõnõnõ?

Lõmaro rej kamõnõnõik limaro beleir ñe rej lor joñok eo an Jisõs. Ear karmijeteik e mõke ilo an yokwe lio belen ilo kõkkar, congregation eo. (Dri Epesõs 5:​25) Jisõs ear ba: “Nejin armij e ar jab itok bwe armij ren jerbal ñõn e, a bwe en jerbal ñõn ir.” (Matu 20:​28) Ejelok juõn ien Jisõs ear lej ak kokkure ro rar ber iomin kejbãrok eo an, ak ear kaemololoik ir. (Matu 11:​28) Kin men in, lõmaro rej aikwij kajerbal maroñ eo air ilo juõn wãwen ejoij im aolep ro ilo baamle eo remaroñ bõk tokjen.

Limaro remaroñ bareinwõt katak jen joñok eo an Jisõs. Baibel eo ej ba: “Bõran Kraist Anij.” Ej bareinwõt ba bwe “bõran kõra man.” (1 Dri Korint 11:⁠3) Jisõs ear jab bõk lemnok in bwe elap an utiej ñõn an kõtãik e ñõn Anij. Ear lukkun koutiej Jemen. Jisõs ear ba: “Ien otemjej Ij kõmõn men ko rej kabuñburuen.” (Jon 8:​29) Juõn kõra eo ej kõtãik e ñõn leo belen kinke ej yokwe im koutiej Anij, ej bõktok elap mõnõnõ ñõn baamle eo an.

Ta eo ro jemen im jinen remaroñ katak jen wãwen an Jisõs lemnok kin ajiri ro?

Jisõs ear kõmõn ien ñõn an ber iben ajiri ro im ear kwalok an itoklimo kin lemnok im iñjake ko air. Baibel eo ej ba: “Jesus ear kirlok ajiri ro ñõn ibben im ba, ‘Komin kõtlok an ajiri ro itok ñõn ibba!’ ” (Luk 18:​15, 16, UBS) Juõn ien, armij ro rar ellotane jet ladrik ro ke rar kwalok kin tõmak eo air ilo Jisõs. Bõtab, Jisõs ear nebare ajiri rein, im ear jiroñlok armij rein: “Ta komij jañin konono Jeje ko ke, ijo ej ba, ‘Emwij am katakin ajiri im niñniñ rõn bwe ren nebar yuk kin nebar ewebben’?”​​—Matu 21:​15, 16, UBS.

Ta eo ajiri ro remaroñ katak jen Jisõs?

Jisõs ear kwalok juõn joñok elukkun emõn kin wãwen ajiri ro remaroñ kwalok air itoklimo kin katak ko an Anij. Ke ear 12 an yiõ, rar lo Jisõs “iloan Temple, ej jijet ibben ri kaki ro an ri Jew ro. Ej roñjake ir im kajitõkin ir.”Ta eo ear walok jen men in? “Aoleb ro rar roñjake rar bwilõñ kin uak ko an rekabel.” (Luk 2:​42, 46, 47, UBS) Meñe eindrein, an meletlet ear jab kõmõn bwe en utiej buruen. Ijellokin men in, meletlet eo an ear kõmõn bwe en koutiej jinen im jemen. Baibel eo ej ba bwe ear wõnmanlok wõt im bokake ir.​​—Luk 2:​51.

Ñõn bõk melele ko relaplok, lale katak 14 ilo buk eo Ta eo Baibel Ej Lukkun Katakin? *

[Kamelele eo Itulal]