Katakin Ajiri ro Nejõm

Jisõs Ear Katak ñõn Bokake

KWOJ ke kile bwe jet ien ebin ñõn bokake?​— * Ejjab menin bwilõñ ñe kwoj lo bwe ebin men in. Aolep rej kile bwe jet ien ebin ñõn bokake. Kwojela ke bwe Jisõs bareinwõt ear aikwij katak ñõn bokake?​—

Kwojela ke wõn ro aolep ajiri ro rej aikwij bokake ir?​— Aet, ej jemer im jiner. Baibel eo ej ba: “Komin bokake jememi im jinemi ilo Iroij.” (Dri Epesõs 6:1) Wõn jemen Jisõs?​— Jeova Anij, im e bareinwõt ej Jemer. (Matu 6:​9, 10) Bõtab elañe kwoj ba bwe etan jemen im jinen Jisõs kar Josep im Meri, ebar jime. Kwojela ke ewi wãwen rar erom jemen im jinen?​—

Enjel Gebriel ear jiroñ Meri kin wãwen enaj bõroro meñe ejañin kar belele iben juõn eman. Jeova ear kõmõn bwe en bõroro ikijen an kar kõmõn juõn menin kabwilõñlõñ elap. Gebriel ear kemelele ñõn Meri: “Kajur an Anij enaj ber ibbam. Kin unin in ajiri in ekkwojarjar naj naetan Nejin Anij.”​—Luk 1:​30-​35, UBS.

Anij ear bõk mour eo an Nejin jen lõñ im likiti iloan lojen Meri. Inem ear edreklok iloan lojen einwõt an niñniñ ko jet edreklok iloan lojen jineir. Druatimjuõn aliñ tokelik, Jisõs ear lotak. Ilo kõtan ien in, Josep ear mareik Meri, im enañin aolep armij rar lemnok bwe Josep ej lukkun jemen Jisõs. Bõtab ilo mol, Josep ejjab lukkun jemen Jisõs, ear kakajiririik e. Kin men in, jemaroñ ba bwe ear or ruo jemen Jisõs!

Ke Jisõs ear 12 an yiõ, ear kõmõne juõn men me ear kwalok kin joñõn an lukkun yokwe Jemen ilõñ, Jeova. Ilo ien in, ear juõn mõnit iben baamle eo an Jisõs ñõn etetal ilo juõn ial eaitok ñõn Jerusalem bwe ren ber ilo Kwojkwoj in Kijone eo. Tokelik ke rar jeblak ilo ial eo air lok ñõn ijo jikiir ilo Nazeret, Josep im Meri rar jab kile bwe Jisõs ear jab ber ibeir. Kwoj ke baj lemnok, etke rar maroñ meloklok e?​—

Eokwe, ilo ien in ear bar or ajiri ro jet nejin Josep im Meri. (Matu 13:55, 56) Bareinwõt, ear or ro nukiir me rar bwelen etal ibeirlok, einwõt Jemes im Jon, im jemeir im jineir, Zebedi im Selome, liin emaroñ kar jein im jãtin Meri. Inem Meri emaroñ kar lemnok bwe Jisõs ear ber iben ro nukiir.​—Matu 27:56; Mark 15:40; Jon 19:25.

Ke Josep im Meri rar lo bwe ejoko Jisõs, rar kaiur im jeblak ñõn Jerusalem. Rar lukkun inebata im kabukot ladrik eo nejiir. Ilo ran eo ken kajilu, rar loe ilo tempel eo. Meri ear ba ñõn e: “Etke kwar kõmmõn eindrein ñõn kim? Kimro jemam ar kanuij inebata im bukbukõt yuk.” Ak Jisõs ear uak: “Ta unin ami kar bukbukõt iõ? Ta komro jaje bwe ij aikwij bed ilo imõn Jema ke?”​—Luk 2:​45-​50, UBS.

 Kwoj ke lemnok bwe ejjab jime wãwen an Jisõs uake jinen?​— Eokwe, jemen im jinen rar jela bwe emõn iben etal im kabuñ ilo mweo imõn Anij. (Sam 122:1) Inem ejime ke ñõn an Jisõs lemnok bwe tempel eo an Anij ej jikin eo moktata ren kar bukote ie?​— Tokelik, Meri ear lemnok wõt kin men eo Jisõs ear ba.

Kar ewi wãwen mwilin Jisõs ñõn Josep im Meri?​— Baibel eo ej ba: “Jesus ear jeblak ibbeir ñõn Nazareth, im ear bokake wõt ir.” (Luk 2:​51, 52, UBS) Ta eo jemaroñ katak jen joñok eo an Jisõs?​— Aet, kij bareinwõt jej aikwij bar bokake ro jemer im jiner.

Ak, ejjab aolep ien ear biruru ñõn an Jisõs bokake, meñe ñõn Jemen ilõñ.

Ilo boñin eo mokta jen an kar mij, Jisõs ear kajitõk iben Jeova elañe emaroñ ukot lemnok eo An kin men eo Ear kõnan bwe en kõmõne. (Luk 22:42) Ak Jisõs ear bokake wõt Anij meñe ear jab biruru. Baibel eo ej ba bwe “E ar katak im bokake kin men ko E ar iñtan kaki.” (Dri Hibru 5:8) Kwoj lemnok ke bwe kij bareinwõt jemaroñ katak jen men in?​—

[Kamelele ko itulõl]

KAJITÕK KO:

▪ Ewi wãwen an kar Meri erom jinen Jisõs, im ewi wãwen ear or ruo jemen Jisõs?

▪ Etke jemen im jinen Jisõs rar jab kile bwe ear jab etal ibeirlok?

▪ Ia eo Jisõs ear kõtõmene bwe jemen im jinen ren kar bukote ie?

▪ Ta eo kwomaroñ katak jen joñok eo an Jisõs?

[Pija ilo peij 31]

Etke kwoj lemnok bwe Josep im Meri ren kar moktata bukot Jisõs ilo tempel eo?