Genesis 39:1-23
39 Josefa chu Aigupta ramah hruai thlâk a ni a, amah hruaitu Ismael mite hnên aṭang chuan Pharaoa ina thuneitu leh vêngtu hotu, Aigupta mi Potiphara chuan a lei a.
2 Mahse, Josefa chu Jehova’n a awmpui avângin, a thiltih apiangah a hlawhtling zêl a, Aigupta mi a pu ina hotua ruat a lo ni a.
3 Jehova’n a awmpui tih leh a thiltihna kawng engkimah Jehova’n a hlawhtlintîr tih a pu chuan a lo hria a.
4 Josefa chuan a pu duhsak a hlawhin, a chhiahhlawh rin ber a lo ni a. Chuvângin, a pu chuan a in chhûnga hotuah leh a thil neih zawng zawngte enkawltuah a ruat a.
5 Chutianga a ruat hnu aṭang chuan, Jehova’n Potiphara chhûngkua chu Josefa avâng chuan mal a sâwm a; chu bâkah, Jehova chuan in lam leh lo lama a thil neih zawng zawngte chu mal a sâwm bawk a.
6 A hnuah phei chuan, a thil neih zawng zawng chu Josefa a enkawltîr ta vek a, a chaw ei lai chauh lo chu eng thil mah a ngaihtuah tawh lo. Tin, Josefa chu pian nalh tak leh hmêl ṭha tak a ni.
7 Chûng thil a thlen hnuah chuan, a pu nupui chuan Josefa chu ngaizâwngin: “Min mutpui rawh,” a ti a.
8 Josefa chuan lo hnarin: “He ina ka hnêna thil awmte hi ka pu chuan eng mah a hre lo va; chu mai chu ni lovin, a thil neih zawng zawngte hi min enkawltîr zâwk asin.
9 He inah hian kei aia thunei zâwk tu mah an awm lo va, a nupui i nih avângin nangmah chauh lo chu ka puin ka lakah eng mah ui a nei lo. Chuvângin, engtin nge he thil sual lian tak hi tiin, Pathian lakah thil sual ka tih theih tehlul ang?” a ti a.
10 Potiphara nupui chuan nî tin a thlêm ṭhîn a; mahse, Josefa chuan mutpui emaw, hun hmanpui emaw chu a duh ngai lo.
11 Ni khat chu, hna thawk tûra ina a va luh chuan, chhiahhlawh dang tu mah an lo awm lo va.
12 Potiphara nupui chuan a kawrfualah lo manin: “Min mutpui rawh!” a ti a. Mahse, Josefa chuan a kawrfual chu tlânsanin a chhuak ta daih a.
13 A kuta a kawrfual tlânsanin a chhuak tih a hmuh veleh,
14 Potiphara nupui chuan a ina a chhiahhlawhte chu ring taka auvin: “En teh u! Ka pasalin a rawn hruai, he Hebrai mi hian nuihza siam nâna min hman a tum a nih hi. Min mutpui tumin a lo kal a; mahse, ka theih tâwpa ringin ka au va.
15 Chutianga ring taka ka au veleh, a kawrfual hi tlânsanin a chhuak ta a ni,” a ti a.
16 Josefa pu Potiphara lo haw thlengin a kawrfual chu a kawl reng a.
17 Tichuan, a hmaa a sawi ang chiahin a hnênah: “Kan hnêna i rawn hruai Hebrai chhiahhlawh khân nuihza siam nâna min hman tumin ka hnênah a lo kal a.
18 Mahse, ring taka ka au veleh, a kawrfual hi tlânsanin a chhuak ta a ni,” a ti a.
19 A nupuiin: “Hêng thilte hi i chhiahhlawhin ka chungah a ti a ni,” tia a sawi Potiphara’n a han hriat chuan a thinrim ta hle a.
20 Tichuan, Josefa chu hruaiin, lalin a mi mante a tântîrna hmunah chuan a tântîr a, Josefa chu chutah chuan a awm ta reng a.
21 Mahse, Jehova’n Josefa chu a awmpui zêl a, a chungah hmangaihna rinawm lantîr rengin, tân in hotu duhsak a hlawhtîr a.
22 Tân in hotu chuan Josefa chu tân ina tâng zawng zawngte hotuah a ruat a, chuta an thiltih apiang chu Josefa thupêka tih vek a ni.
23 Josefa chu Jehova’n a awmpui avâng leh a thiltih apiang Jehova’n a hlawhtlintîr avângin, tân in hotu chuan Josefa thiltih chu eng mah a enpui ngai lo.
