Genesis 13:1-18
13 Abrama chu a nupui leh a neih zawng zawngte bâkah, Lota hruaiin Aigupta aṭangin Negeb-ah a chho va.
2 Abrama chuan ran rual te, tangkarua te, rangkachakte a ngah hle a.
3 Negeb aṭanga Bethel a panna lam kawngah chuan hmun hrang hrangah awmhmun a khuar a, Bethel leh Ai khaw inkâra puan in a kaihna hmun a thlen hma chu a kal zêl a.
4 Chu hmunah chuan a hmain maichâm a lo siam tawh a. Chutah chuan Abrama’n Jehova hming a lam a ni.
5 Abrama kalpui Lota pawhin berâm te, bâwng te, puan inte a nei a.
6 An thil neihte a tam êm avângin ramin a daih lo va, hmun khatah an awm dûn reng thei ta lo.
7 Chumi avâng chuan, Abrama ran rual vêngtute leh Lota ran rual vêngtute inkârah inhnialna a lo chhuak a. (Chutih lai chuan Kanaan mite leh Periz mite chu, chu ramah chuan an awm a ni.)
8 Tichuan, Abrama’n Lota hnênah: “Khawngaihin, kan pahnih inkârah emaw, ka ran rual vêngtute leh i ran rual vêngtute inkârah emaw inhnialna awm suh se, unau kan ni si a.
9 He rama i duhna hmun berah i kal thei alâwm. Khawngaihin ka lak aṭang hian kal hrang ta che. Vei lama i kal leh ding lamah ka kal ang a, ding lama i kal leh vei lamah ka kal ang,” a ti a.
10 Lota chuan a han en vêl a, Jordan phaizâwl* pum pui chu (Jehova’n Sodom leh Gomorra a tihchhiat hma zawng kha chuan) Zoar thlengin Jehova huan ang leh Aigupta ram ang maia tui ṭhatna hmun a ni tih a hmu a.
11 Lota chuan Jordan phaizâwl pum pui chu thlangin khawchhak lamah a insawn a. Tichuan, an inṭhen ta a.
12 Abrama chu Kanaan ramah a awm a, Lota erawh chu Jordan phaizâwla khawpui chhehvêlahte chuan a awm thung a. A tâwpah, Sodom khaw bulah awmhmun a khuar ta a.
13 Sodom khaw mite chu an sual hle a, Jehova mit hmuhah thil sual nasa tak an ti ṭhîn a ni.
14 Lota a kal hran hnuah, Abrama hnênah Jehova chuan: “Khawngaihin han en kual la, tûna i awmna hmun aṭang khân chhim leh hmâr, chhak leh thlang han en teh.
15 I ram hmuh zawng zawng hi nangmah leh i thlahte hnênah in chatuan ro atân ka pe dâwn che u a ni.
16 Leia vaivut zâtin i thlahte ka tipung ang a. Leia vaivutte hi chhiar sên a nih loh ang bawkin, i thlahte pawh chhiar sên an ni lo vang.
17 He ram hi ka pêk dâwn che avângin tho la, a dung leh vâng fang chhuak rawh,” a ti a.
18 Tichuan, Abrama chu puan inahte a awm chhunzawm zêl a. A hnuah, Hebron-a thing lian tak takte awmna hmun Mamre chu thlengin awmhmun a khuar a. Chutah chuan Jehova tân maichâm a siam a ni.
Footnote-te
^ Chu chuan Jordan phaizâwl hnuai lam aṭanga Zoar thlengin a huam a ni.
