Genesis 21:1-34
21 Jehova chuan a sawi ang ngeiin Sari chu a hre reng a, a hnêna thu a tiam angin Jehova chuan a tihsak ta a.
2 Tichuan, Sari chu a rai a, Pathianin Abrahama hnêna a lo tiam tawh ang ngeiin a hun ruatah chuan fapa a hrinsak a. Chutih hun lai chuan Abrahama chu a upa tawh hle.
3 Abrahama chuan Sari’n a hrinsak a fapa hmingah chuan Isaaka a phuah a.
4 Pathian thupêk angin Isaaka a pian aṭanga ni riatnaah Abrahama’n a serh a tansak a.
5 Isaaka a pian lai chuan Abrahama chu kum 100-a upa a ni.
6 Sari chuan: “Pathianin min nuihtîr ta, a hria apiangin min nuihpui ang,” a ti a.
7 Sari vêk chuan: “Abrahama tân kei Sari hian fa ka hrinsak ang tih tuin nge ngaihtuah tehlul ang? Mahse, a upat hnuah fapa ka hrinsak tâk hi,” tiin a sawi belh a.
8 Isaaka chu lo ṭhang lian zêlin, hnute a nghei ta a. Hnute a nghei nî chuan Abrahama’n ruai ropui tak a buatsaih a.
9 Chumi nî chuan, Aigupta mi Hagari’n a hrinsak Ismaela’n Isaaka a nuihsawh lai chu Sari’n a hmu a.
10 Tichuan, Abrahama hnênah: “He bâwihnu leh a fapa hi hnawt chhuak rawh, he bâwihnu fapa hian ka fapa Isaaka hi ro a luahpui tûr a ni lo!” a ti a.
11 Ismaela chungchâng a sawite chuan Abrahama chu a tilungni lo ta hle a.
12 Mahse, Pathianin Abrahama hnênah: “I bâwihnu leh a fapa chungchânga i hnêna Sari thusawi khân tilungni lo che suh se. I thlahte chu Isaaka aṭanga an lo chhuah dâwn avângin a thusawi kha ngaithla rawh.
13 I bâwihnu fapa pawh i thlah tho a nih avângin hnam ropui takah ka siam ang,” a ti a.
14 Abrahama chu zîng hma takah a tho va, chhang leh savun tuithâwl lain Hagari chu a pe a. Chûngte chu a kokîah nghahsakin a fapa nên chuan a kal botîr ta a. Tichuan, Hagari chu a kal chhuak a, Beer-seba thlalêrah chuan a vâkvai a.
15 Savun tuithâwla tuite an in zawh hnu chuan, Hagari chuan a fapa chu hnimbuk hnuaiah a hnutchhiah a.
16 Ani erawh chu a kal zêl a, thal kah phâk vêla hla a thlen chuan a ṭhu a: “Ka fapa thi tûr ka en ngam lo,” a ti a. A ṭhutna hmunah chuan lungchhe takin a ṭap ta a.
17 A hnu lawkah Hagari fapa ṭap ri chu Pathianin a lo hria a; tichuan, Pathian vântirhkoh chuan Hagari chu kovin: “Hagar, engati nge i ṭah? Hlau suh, Pathianin i fapa ṭap ri chu a hria e.
18 Tho la, i fapa kha pawm tho la, chelh tlat rawh. Pathianin hnam ropui takah a la siam dâwn a ni,” a ti a.
19 Pathianin a mit a tihvârsak avângin Hagari chuan tuichhunchhuah a hmu a, chu chu va panin a savun tuithâwlah chuan a thun khat a, a fapa a intîr a.
20 Tichuan, Ismaela chu a lo ṭhan chhoh zêl rualin Pathianin a awmpui a. Thlalêrah chêngin thal kâp thiam a lo ni a.
21 A chênna hmun chu Paran thlalêr a ni a, a nuin Aigupta mi nupuiah a neihsak a ni.
22 Chutih lai chuan, Abimeleka leh a sipai hotu Phikola chuan Abrahama hnênah: “I thiltih apiangah Pathianin a awmpui che a ni.
23 Chuvângin, kei leh ka fate leh ka tute chunga thil ṭha lo ti lo tûr leh, i chunga hmangaihna rinawm ka lantîr anga kei leh i chênna ram chunga lantîr ve tûrin Pathian hmingin ka hnênah chhia chham rawh,” a ti a.
24 Abrahama chuan: “Chhia ka chham e,” a ti a.
25 Chutih rualin Abimeleka hnênah chuan, a chhiahhlawhte’n tharum hmanga tuichhunchhuah an chhuhsak chungchâng a hrilh a.
26 Abimeleka chuan: “Vawiinah min hrilh a, ka hre chauh a ni. Engvângin nge a hmaa min hrilh loh? Chutianga ti an awm tih rêng rêng ka hre lo,” a ti a.
27 Tichuan, Abrahama chuan Abimeleka hnênah berâm leh bâwng a pe a, an pahnih chuan thu an thlung ta a.
28 Abrahama’n ran rual zîng aṭanga berâm nu pasarih a han dah hran chuan,
29 Abimeleka’n a hnênah: “Engvângin nge berâm nu pasarihte kha i dah hran?” a ti a.
30 Abrahama chuan: “He tuichhunchhuah hi ka laih a ni tih min hriatpuina atân hêng berâm nu pasarihte hi ka pe a che,” tiin a chhâng a.
31 Chu hmun chu an pahniha chhia an chhamna hmun a nih avângin Beer-seba* tia koh a lo ni ta a ni.
32 Beer-seba-a thu an thlun zawh chuan, Abimeleka leh a sipai hotu Phikola chu Philistia ramah an lêt leh a.
33 Chumi hnuah, Beer-seba-ah chuan Abrahama’n tamarisk* thing a phun a. Chutah vêk chuan chatuan Pathian hming a lam bawk a.
34 Abrahama chu Philistia ramah chuan hun rei tak a awm a ni.
